بيىل وبلىس اكىمى دانيال احمەتوۆتىڭ تاپسىرماسىنا سايكەس شىعىس قازاقستانداعى 10 كول مەن سۋ قويماسىنىڭ سۋىنا بالنەلوگيالىق زەرتتەۋ جۇرگىزىلىپ,وسىنىڭ ناتيجەسىندە وڭىردەگى قاي وزەن-كولدىڭ سۋى شيپالى ەكەنىن انىقتاۋعا مۇمكىندىك تۋىپتى.
«اتالمىش زەرتتەۋ جۇمىستارى كورسەتكەندەي, بەسقاراعاي اۋدانىندا ورنالاسقان شوشقالى كولىنىڭ جاعاسىندا كۋرورتتىق ايماق قۇرۋعا مول مۇمكىندىك بار. ماماندار بۇل كولدىڭ سۋىنىڭ ءبىر ليترىندە 15 گرامنان ارتىق پايدالى زاتتار بار ەكەنىن انىقتادى. وعان قوسا كول سۋىنىڭ مينەرالدىعى جوعارى دەڭگەيدە, ياعني, شيپالىق قاسيەتتەرى مول. شوشقالىعا شومىلۋ ءۇشىن عانا ەمەس, ەمدەلۋ ماقساتىندا دا ساپارلاۋعا بولادى», - دەيدى وبلىستىق تۋريزم جانە سىرتقى بايلانىستار باسقارماسىنىڭ باسشىسى جاسۇلان سارسەباەۆ.
باسقارما باسشىسى جۇرگىزىلگەن زەرتتەۋ جۇمىستارى بارىسىندا شوشقالىنىڭ مينەرالدىعى وبلىس بويىنشا ەڭ جوعارعى كورسەتكىشتەرگە يە ەكەندىگىنە كوز جەتكىزىلگەنىن, كول جاعاسىندا زاماناۋي ستاندارتتارعا ساي شيپاجاي اشۋعا بولاتىندىعىن ايتتى. وسى ماقساتتا الداعى ۋاقىتتا كولدە ناقتى قانداي اۋرۋلاردى ەمدەۋگە بولاتىنىن انىقتاۋ جۇمىستارى قولعا الىناتىنىن جەتكىزدى.
اۋدان تۇرعىندارىنىڭ سوزىنە سەنسەك, سۋىنىڭ قۇرامى يزرايلدەگى ءولى تەڭىزدىڭ سۋىمەن بارا-بار شوشقالىعا شەت ەلدەن كەلەتىن تۋريستەر قاتارى دا از ەمەس. اسىرەسە رەسەيدەن اعىلاتىن تۋريستەر كوپ. ءساۋىر ايىندا وسكەمەندە وتكەن بريفينگتە اۋدان اكىمىنىڭ ورىنباسارى ەربولات راحمەتۋللين كول جاعالاۋىندا سالىناتىن جاڭا شيپاجاي كەشەنىنىڭ جوباسى ازىرلەنىپ جاتقانىن,سونىمەن قاتار كولگە اپاراتىن جولدى جوندەۋ جوسپارلانىپ وتىرعانىن ايتقان بولاتىن.
ازامات قاسىم,
«ەگەمەن قازاقستان»
شىعىس قازاقستان وبلىسى,
بەسقاراعاي اۋدانى
