ايتسە دە اتار جىلدىڭ اق تاڭىندا اقشات اۋىلىندا بۇعان كەرىسىنشە جاعىمدى جاڭالىق ورىن الدى. مۇنداعى باستاۋىش مەكتەپ ىرگەسىن كەڭەيتىپ جالپى ءبىلىم بەرەتىن ۇلكەن مەكتەپكە اينالدى. مەكتەپ بولعاندا قانداي؟! سىڭعىرلاعان سۋ جاڭا عيماراتتىڭ سىرتى قانداي ءساندى بولسا, ءىشى سونداي ءماندى. جاڭا مەكتەپكە الاش ارىستارى كوسەمدەرىنىڭ ءبىرى ءاليحان بوكەيحانوۆتىڭ ەسىمى بەرىلگەنى دە جاراسىپ تۇرعانداي.
300 وقۋشىعا ءوز ەسىگىن ايقارا اشقان مەكتەپ عيماراتى بار-جوعى ءبىر-اق جىلدىڭ ىشىنىدە تۇرعىزىلعان. ونىڭ تاعى ءبىر ەرەكشەلىگى بۇگىنگى الەمدىك ءبىلىم بەرۋ ستاندارتتارىنا ساي – تىرەك جانە قيمىل-قوزعالىس مۇشەلەرى بۇزىلعان بالالاردىڭ دا مەكتەپتكە ەمىن-ەركىن كەلىپ كەتۋى ءۇشىن قاجەتتى جاعدايلاردىڭ تۋعىزىلعانى. مۇنىڭ ءوزى ارنايى جەدەل ساتى, پاندۋس تۇرىندە كورىنىس تاۋىپ وتىر. جاڭا ۇلگىدەگى مەكتەپتىڭ تەز ءارى ساپالى سالىنۋىنا «نۇرلى جول» مەملەكەتتىك باعدارلاماسىنىڭ شاپاعاتى ءتيىپتى. بۇل ءۇشىن بيۋدجەت ەسەبىنەن تابانى كۇرەكتەي 864 ميلليون تەڭگە جۇمسالعان.
اقشات اۋىلىنىڭ تۇرعىندارىن, كارىسى مەن جاسىن كول-كوسىر قۋانىشقا بولەگەن وڭ قۇبىلىس ەڭ بىرىنشىدەن مۇنداعى دەموگرافيالىق تابيعي ءوسىم مەن ىشكى كوشى-قون ءۇردىسىنىڭ جوعارى ەكەنىنەن حابار بەرە الادى. ءدال وسىنداي بايىپتى بايلامدى اقتوبە قالاسىنداعى بولاشاق شاعىن اۋدانىندا اشىلعان ورتا مەكتەپتىڭ جاڭا عيماراتىنا قاتىستى دا جاساۋعا بولادى. ونىڭ قۇنى -755 ميلليون تەڭگە.
تەمىر قۇسايىن,
«ەگەمەن قازاقستان»
