بۇگىنگى شارانىڭ باستى ماقساتى - مەملەكەت ۇسىنىپ وتىرعان باعدارلامالار اياسىندا جاستاردى ەڭبەككە ىنتالاندىرۋ جانە ولاردى جۇمىسقا باۋلۋ, سونىمەن قاتار ەڭبەكشى جاستاردى قوعامعا تانىتۋ ارقىلى ولاردىڭ ەڭبەگىن باعالاۋ بولىپ وتىر.
بۇگىندە رەسپۋبليكا تۇرعىندارىنىڭ 4,5 ميلليوننان استام جاستار بولسا, ونىڭ ىشىندە 18 پايىزى نەمەسە 800 مىڭعا جۋىعى وڭتۇستىك قازاقستان جاستارى.
سوندىقتان دا جەرگىلىكتى بيلىك, ءوڭىر جاستارىن قوعامدىق جۇمىسقا تارتىپ, تۇراقتى جۇمىسپەن قامتۋ باعىتىندا جۇيەلى جۇمىستار اتقارىپ كەلەدى.
بۇگىنگى فورۋمعا مەملەكەتتىك باعدارلامالاردى ءتيىمدى پايدالانعان 300-گە جۋىق جاس, ولاردىڭ ىشىندە «ديپلوممەن اۋىلعا», «جاسىل ەل», «جاس ساقشى», «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان» باعدارلاماسى مەن ء«ار اۋىلدىڭ ءوز شەبەرى» جوبالارىنا قاتىسۋشى جاستار مەن كاسىپورىندارداعى جاس ماماندار, ەرىكتىلەر, وبلىستىق جاستار ۇيىمدارى قاتىستى.
فورۋم جۇمىسىنا ارنايى قاتىسقان وبلىس اكىمى جانسەيىت تۇيمەباەۆ جاس مامانداردىڭ يننوۆاتسيالىق جوبالارى مەن IT-تەحنولوگياسىنا ارنالعان قۇرالدار كورمەسىن تاماشالاپ, ەڭبەكشى جاستارمەن تىلدەستى.
«جاستار - ەلىمىزدىڭ بولاشاعى. ەل ەرتەڭى – جاستاردىڭ قولىندا. سىزدەر وزدەرىڭىزدىڭ اۋقىمدى جۇمىستارىڭىزبەن, قارقىندى قيمىلدارىڭىزبەن ەلىمىزدىڭ ءوسىپ-وركەندەۋىنە, گۇلدەنۋىنە ۇلكەن ۇلەس قوسىپ جۇرگەن جاس بۋىنسىزدار. بۇگىندە سىزدەر قوعامداعى قوزعاۋشى كۇشكە اينالدىڭىزدار. ولاي دەيتىنىمىز ەلىمىزدە جاستار ساياساتىنا ەرەكشە كوڭىل بولىنۋدە. ءاربىر جاڭا ۇرپاق ومىرگە وزىمەن بىرگە جاڭا لەپ, جاڭا احۋالدى قوسا اكەلەدى. بۇل وبەكتيۆتى قۇبىلىس»,-دەدى اكىم.
سونىمەن قاتار, ايماق باسشىسى بەلسەندى جاستار تۋرالى ءسوز قوزعاپ, كاسىپورىن ۇيىمدارىنىڭ ەڭبەك قاتىناستارىندا الاتىن ورنى مەن ماڭىزى تۋرالى ايتتى.
«قىسقا مەرزىمدى كاسىپتىك وقىتۋ باعدارلاماسى بويىنشا ماماندىعى جوق ازاماتتار مەن ەڭبەك نارىعىنىڭ سۇرانىسىنا وراي 12 159 ازامات ماماندىق السا, ونىڭ ىشىندە ء«ار اۋىلعا ءوز شەبەرى» اكتسياسى اياسىندا اۋىلدارداعى ءبىرىنشى كەزەكتەگى قاجەتتى ماماندار ءتىزىمى ناقتىلانىپ, 15 ماماندىق بويىنشا 9253 ازاماتقا كاسىپتىك ءبىلىم بەرىلدى, ولاردىڭ 5 150-ءى جاستار. وڭتۇستىك وڭىرىندەگى 306 ءوندىرىس ورىندارىندا 20 مىڭعا جۋىق جاس تەر توگۋدە. مىسالى ءۇشىن «الەم بت» ش ۇلىق زاۋىتى ۇجىمىنىڭ 90 پايىزعا جۋىعى سىزدەردىڭ قاتارلاستارىڭىزدان قۇرىلعان. ال «كەنتاۋ ترانسفورماتور زاۋىتى» اق, «قازترانسويل» اق, «قازاقتەلەكوم» اق, «بال تەكستيل» جشس, «ستاندارت تسەمەنت» جشس, «حيمفارم» اق, «اتامەكەن» كورپوراتسياسى» جشس 50 پايىزىنان استامى جاستار»,-دەدى ج.تۇيمەباەۆ.
فورۋم بارىسىندا ءوڭىر باسشىسى جينالعان جاستاردى كىرىپ كەلە جاتقان جاڭا جىل مەرەكەسىمەن قۇتتىقتاپ, ۇلتتىق «دەلفي» ويىندارىنىڭ جەڭىمپازدارى مەن «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسىنىڭ» قىسقا مەرزىمدى وقىتۋ كۋرسىنان وتكەن جاستارعا «العىس حاتتار» تابىستادى.
جۇمىسشى جاستار شارا سوڭىندا رەسپۋبليكالىق جانە وبلىستىق ەسترادا جۇلدىزدارىنىڭ ونەرىن تاماشالادى.
