«2017 جىلى 28 جەلتوقساندا ەلباسى قازاقستان رەسپۋبليكاسىنىڭ اكىمشىلىك قۇقىقبۇزۋشىلىق تۋرالى كودەكسىنە وزگەرىستەر ەنگىزۋ تۋرالى زاڭىنا قول قويدى. زاڭ رەسمي تۇردە جاريالانعان كۇننەن باستاپ, 10 كۇننەن كەيىن كۇشىنە ەنەدى. اكىمشىلىك قۇقىقبۇزۋشىلىق كودەكسىنە ەنگىزىلگەن ەرەجەلەرگە سايكەس, جول ەرەجەلەرىنىڭ بۇزىلۋىنا قاتىستى ايىپپۇلدىڭ 22 ءتۇرى ازايتىلدى», - دەيدى نۇرسەيىت ابىشەۆ استانادا وتكەن ءباسپاسوز ءماسليحاتى بارىسىندا.
قر ءىىم وكىلىنىڭ ايتۋىنا قاراعاندا, بەلگىلى ءبىر شەكتى جىلدامدىقتى 10-نان 20 شاقىرىمعا اسىرعان جاعدايدا ايىپپۇل مولشەرى قازىر 10 اەك بولسا, بۇدان بىلاي 5 اەك-كە ازايادى.
«سونىمەن قاتار, مۇگەدەكتەردىڭ كولىكتەرىن قويۋعا ارنالعان ورىنعا باسقا جۇرگىزۋشىلەر كولىكتەرىن قويعان جاعدايدا قازىرگى ايىپپۇل 50 اەك بولسا, ونىڭ مولشەرى زاڭعا ەنگىزىلگەن وزگەرىستەرگە سايكەس 10%-عا ازايادى. سونىمەن قاتار, ىشكى ىستەر ورگاندارى توقتاۋ تۋرالى بەلگى بەرگەندە, جول ساقشىسىنىڭ زاڭدى تالابىنا باعىنباعان جاعدايدا جۇرگىزۋشىلەرگە قازىرگى كەزدە 1 جىلعا دەيىن كولىك قۇرالدارىن باسقارۋ قۇقىعىن ايىرىلادى. ال اتالعان زاڭمەن وسى جازانى 6 ايعا دەيىن قىسقارتۋ كوزدەلگەن», - دەيدى ول.
نۇرسەيىت ابىشەۆ سونىمەن بىرگە, جولدىڭ قارسى بەتىنە شىعىپ كەتكەن جاعدايدا قازىرگى كەزدە اكىمشىلىك قۇقىقبۇزۋشىلىق تۋرالى كودەكس بويىنشا 1 جىلعا دەيىن جۇرگىزۋشى كۋالىگى مەن كولىكتى باسقارۋ قۇقىعىنان ايىرۋ جازاسى قاراستىرىلعان. ال جاڭا وزگەرىس بويىنشا اتالعان جازانى 30 اەك مولشەرىندەگى ايىپپۇلعا اۋىستىرۋ كۇتىلىپ وتىر.
«اتالعان زاڭ بويىنشا ايىپپۇل 7 كۇننىڭ ىشىندە تولەنسە, 50%-دىق جەڭىلدىك جاساۋ مۇمكىندىگى بۇرىنعىداي قالدىرىلدى», - دەيدى نۇرسەيىت ابىشەۆ.
