ءبىر مارتە نۇرسۇلتان ءابىش ۇلى استاناداعى مەشىتتە اۋزاشار بەردى. پروتوكول بويىنشا مەن ەلباسىنىڭ قاسىنا جايعاستىم. قۇران وقىلىپ ەل اسقا وتىرعاندا نۇرسۇلتان اعا ماعان قاراپ: «جاقسىلىق, قالايسىڭدار؟ اۋىل-ايماق امان-ەسەن بە؟» دەدى. «جاقسى, اعا» دەدىم. «بيىل الماتى وبلىسىنىڭ قىزىلشاسى قالاي بولادى, جۇگەرىنىڭ جايى شە...» الماتى وبلىستىق ءماسليحاتىنىڭ دەپۋتاتى ەمەسپىن بە, وبلىستىڭ ەڭبەككەرلەرىمەن بارلىق جيىن-باسقوسۋدا قويان-قولتىق بىرگەمىن, ەگىس دالاسىندا بىرگە جۇرەمىن. بار جايدى بايانداپ, «بيىل ءونىم ەرەكشە بولماق, ءتاتتى ءتۇبىر دە جامان ەمەس, جۇگەرى دە كۇشتى ءوستى», دەدىم. ء«تىپتى تالدىقورعانعا كەلسەڭىز كورەسىز, قالانى تانىماي قالاسىز, اكىم دە ءبىر ءسات قاراپ وتىرمايدى», دەدىم. مەن ويىمدى ءاردايىم اشىق ايتاتىن جانمىن. وتىرىككە جوقپىن. «وي, سەن اۋىلىڭدى تىم ماقتاپ جىبەرگەن جوقسىڭ با ءوزى؟» دەپ ك ۇلىمسىرەگەن پرەزيدەنت, «ەكى ايدان سوڭ بارامىن, كورەمىن», دەدى. راسىندا دا ەكى ايدان سوڭ ەلباسى ۋادەسىندە تۇرىپ, تالدىقورعانعا ات باسىن تىرەدى. پرەزيدەنت قالانى ارالاپ بولعان سوڭ ەگىس دالاسىنا كەلدى. قىزىلشا دەگەن مىنانداي, جۇگەرى دەگەن جايقالىپ ءوسىپ تۇر. اللا تاعالانىڭ بەرگەنى دە. ءبىر ۋاقىتتا قاتار كەلە جاتقانىمىزدا نۇرسۇلتان ءابىش ۇلى «جاقسىلىق, دۇرىس ايتىپسىڭ. سەندەردەن باسقالار ۇلگى السىن», دەدى. توبەم كوككە ەكى ەلى جەتپەي قالدى. شارۋا ادامى ەكەنىمدى سوندا شىن سەزىندىم. وبلىس اكىمى اماندىق باتالوۆتىڭ تىنىمسىز ەڭبەگى, حالىقتىڭ اۋىزبىرلىكپەن اتقارعان ءىس-ارەكەتىنىڭ شىنايى كورىنىسى عوي بۇل. ەلباسى جەتىسۋدان ريزا بولىپ اتتاندى. تالپىنعان ەل, ايتەۋىر, ءبىر تابىسقا, جەڭىسكە جەتەدى, سپورتتا دا سولاي عوي...
راس, ەڭبەكتەگەن بالادان ەڭكەيگەن كارىگە دەيىن مەنىڭ ەڭ الدىمەن اتاقتى سپورتشى ەكەنىمدى بىلەدى. كەڭەستىك وليمپيادا چەمپيونى بولسام دا تاۋەلسىز ەلدە اتاق-داڭقىم ارتتى. مەن ونى قالاي ۇمىتامىن!؟ قازىر شە... مالىم بار, جايىم بار, ءبىر كۇن قاراپ وتىرا المايمىن. تاڭەرتەڭ تالدىقورعاندا بولسام, ءتۇس اۋا باقاناستاعى فەرمالارعا جول تارتامىن. جاي تاڭدامايمىن, كۇي تاڭدامايمىن. قاجەت بولسا باقتاشىمەن دالاداعى لاشىقتا جاتا كەتەمىن. ءبىز ءبارىمىز تەڭبىز. مۇددەمىز ءبىر. ول ەلىمىزدىڭ – داۋلەتتى بولاشاعى.
جاقسىلىق ۇشكەمپىروۆ,
قازاقستاننىڭ ەڭبەك ەرى,
گرەك-ريم كۇرەسىنەن
وليمپيادا جانە الەم چەمپيونى
الماتى
