نەگىزىنەن مۇنداي ەسەپ-قيساپپەن CIES Football Observatory دەگەن زەرتتەۋ كومپانياسى اينالىسادى. ولاردىڭ مالىمەتى بويىنشا 2018 جىلعى بىرىنشىلىكتەگى جاسى ۇلكەن كوماندا – پاناما. سوڭعى 32-ءشى جولدامانى اياق استى جەڭىپ كەتكەن پاناما ويىنشىلارىنىڭ ورتاشا جاسى - 29,4. تاريحىندا تۇڭعىش رەت عالامدىق دوداعا قاتىسقالى وتىرعان بۇل ۇجىم تاجىريبيەسى تولىسقان فۋتبولشىلارعا سەنىم ارتادى ەكەن.
ال ودان كەيىنگى ورىنداردا يسلانديا (29,0) جانە كوستا-ريكا (29,0). ەڭ جاس قۇراما ساناتىنا نيگەريا (24,9), گەرمانيا (25,7) جانە انگليا (25,9) جاتادى. جەر شارىنىڭ چەمپيونىن انىقتاۋعا كەلگەن بارلىق 32 كوماندانىڭ ورتاشا جاسى بولسا 27,4-ءتى قۇرايدى.
ەندى وسى جاس ماسەلەسىن قۇرلىقتارعا ءبولىپ قارايتىن بولساق, وندا مىنانداي تىزبەك شىعادى: كونكاكاف - 28,6, وڭتۇستىك امەريكا - 27,8, ازيا - 27,2, ەۋروپا - 27,2, افريكا - 26,5.
جاس ماسەلەسىن انىقتاپ بولساق, وندا كەزەكتى فۋتبولشىلاردىڭ بويىنا بەرسەك. 2018 جىلدىڭ بىرىنشىلىگىندەگى ەڭ ۇزىن قۇراما كوماندا ول – سەربيا. بالقان تۇبەگىنىڭ اياقدوپشىلارىنىڭ ورتاشا بويى 185,6 سانتيمەتردى قۇرايدى. ولاردىڭ قاتارىندا كەزىندە «استانا» ساپىندا ويناعان نەمانيا ماكسيموۆيچتە بولىپ قالۋى ابدەن ىقتيمال. سەربيا ۇلتتىق قۇراماسىنىڭ باس باپكەرى سلاۆوليۋب مۋسلين «ۆالەنسيا» ساپىندا اراكىدىك الماسىپ الاڭعا شىعىپ جۇرگەن جاس ويىنشىنى قوسالقى قۇرامعا الۋى مۇمكىن. سەربيادان ءسال عانا قالىپ تۇرعان قۇرامالاردىڭ ۇشتىگىن تۇگەلىمەن سكانديناۆتار باسىپ الدى. مىسالى - شۆەتسيا (185,2), يسلانديا (185,0) جانە دانيا (185,0). ال الەم بىرىنشىلىگىن قابىلدايتىن رەسەي بۇل تۇرعىدا 6 ورىندا (184,9). ەڭ ۇزىن قۇرامانى انىقتادىق, ال ەڭ قىسقالارى قايسى دەيسىز عوي؟ ول - وڭتۇستىك امەريكا وكىلى پەرۋ (178,3), ودان كەيىن جاپونيا (178,1) جانە ساۋد ارابياسى (176,2).
فۋتبولشىلارى تەگىس وزگە ەلدە وينايتىن حورۆاتيا قۇراماسى
ال ەندى مىنا قىزىققا قاراڭىز. افريكا قۇرلىعىنان شىققان موروككو قۇراماسىنىڭ فۋتبولشىلارىنىڭ 61,5 پايىزى موروككودا تۋىلماعان ازاماتتار. بۇل جونىنەن موروككوعا تەڭ كەلەر ەشكىم جوق. تەك سەنەگالدىڭ عانا 40 پايىزى وزگە ەلدە تۋىپ-وسكەندەر. سونىمەن قاتار, ايتسا سەنگىسىز, دەگەنمەن پورتۋگاليا فۋتبولشىلارىنىڭ 32,1 پايىزى پيرەنەي تۇبەگىندە تۋىلماعان ازاماتتار. جارىس قوجايىنى رەسەي بۇل ەسەپتە 5 پايىزدىق كورسەتكىشپەن 12 ورىندا. ودان بولەك برازيليا, ساۋد ارابياسى, يران, گەرمانيا, كولۋمبيا, مەكسيكا جانە وڭتۇستىك كورەيا قۇرامالارىندا دا اراكىدىك وسىنداي ويىنشىلار بار.
ءسوز سوڭىندا كەيبىر قۇرامالاردىڭ ويىنشىلارىنىڭ ونەر كورسەتەتىن بىرىنشىلىكتەرىنە توقتالىپ وتسەك. مىسالى حورۆاتيا, شۆەتسيا, يسلانديا قۇرامالارىنىڭ 23 فۋتبولشىسى تۇگەلىمەن وزگە بىرىنشىلىكتەردە وينايتىن اياقدوپشىلار. ياعني, وزگە چەمپيوناتتاردا ويناپ ناپاقا تاۋىپ جۇرگەن لەگيونەرلەر. ولاردان كەيىن, سەنەگال (97 پايىز), سەربيا (92,3 پايىز). ال بۇل جاعىنان 0 پايىز كورسەتكىش تىركەپ وتىرعان ەكى كوماندا بار. ولار – ساۋد ارابياسى مەن انگليا. ساۋد ارابيادا وزدەرىڭىز بىلەتىندەي فۋتبولشىلارعا وزگە ەلدە ونەر كورسەتۋگە تىيىم سالىنعان. باتىستىڭ ازعىنداعان ءومىرىن كورىپ, ادام بۇزىلادى دەپ سانايدى. ال انگليانىڭ جاعدايىن تۇسىندىرمەسە دە, وزدەرىڭىز ءبىلىپ تۇرسىزدار. الەمدەگى ەڭ مىقتى فۋتبول ليگاسى انگليادا ەكەنى قاتتى داۋ تۋدىرا قويماس.
ەرمۇحامەد ماۋلەن
