كوماندا كاپيتانى ارتۋر ارداۆيچۋستىڭ سوزىنە سەنسەك ەلوردالىق توپ «داكارعا» تىڭعىلىقتى دايىن. بيىل ەڭ قاۋىپتى راللي مارافونىندا كوماندا ءوز ەكيپاجىن ەكى سانات بويىنشا جارىس جولىنا شىعارماق. ناقتىراق ايتساق, جۇك كولىكتەرى ساناتىندا كوماندا نامىسىن ءداستۇرلى تۇردە ارتۋر ارداۆيچۋستىڭ جەتەكشىلىگىمەن شتۋرمان سەرج بريۋنكەنس پەن مەحانيك مايكل حيۋسمان قورعايتىن بولادى. ولار جارىس جولىنا كوكتەم ايلارىندا «جىبەك جولى» رالليىندە سىناقتان ءساتتى وتكەن IVECO جۇك كولىگىمەن شىقپاق. اتالعان توپقا «508» دەگەن ءنومىر بەرىلگەن.
ال كۆادروتسيكلشىلەر دميتري شيلوۆ پەن ماكسيم انتيميروۆ «استانا» اتىنان «داكار-2018» رالليىنە تۇڭعىش رەت قاتىسقالى وتىر. كۆادروتسيكلشىلەر ەكيپاجىنىڭ ەنشىسىنە «265» جانە «266» نومىرلەرى بۇيىرعان. جىل بويى «داكارعا» قاتىساتىن كۆادروتسيكلشىلەر قۇرامى جاساقتالىپ, 12 ۇمىتكەردىڭ ىشىنەن ەكى ۇزدىك ازامات ىرىكتەلىپ شىققان. ەلوردالىق كوماندا وكىلدەرى جاڭا سپورتشىلارىمىز ويداعىداي ونەر كورسەتىپ, كاردوباعا قازاقستاننىڭ بايراعىمەن جەتەدى دەگەن سەنىمدە.
– «داكار» شىن مانىندە الەمدەگى ەڭ قاۋىپتى ءارى قىر-سىرى كوپ جارىس. ءبىزدىڭ كوماندا بۇل مارافونعا ارقاشان جاۋاپكەرشىلىكپەن ءارى مۇقيات دايىندالادى. سوڭعى ايدى ءبىزدىڭ كوماندا ىلە الاتاۋى تاۋلارىندا وتكىزدى – بوليۆيالىق جارىس جولىنا دايىندالدىق, مۇندا كەزەڭدەر 3000 مەتردەن بيىكتە وتەدى. «داكار» قاتىسۋشىلاردان ءجۇز پايىز دايىندىقتى تالاپ ەتەدى – بارلىعىنا دا تەحنيكالىق تۇرعىدان دا, فيزيكالىق جاعىنان دا دايىن بولۋىڭ كەرەك. «استانانىڭ» قازىر ساقاداي-ساي ەكەنىن ايتا الامىن – بارلىق انىقتاما مەن قۇجاتتار قولىمىزدا. ەندىگى كەزەكتە جارىس جولىن اسىعا كۇتىپ وتىرمىز, – دەيدى «استانا» كومانداسىنىڭ باس مەنەدجەرى ءارى كاپيتانى ارتۋر ارداۆيچۋس. ايگىلى مارافونعا قاتىسۋعا بيىل ءار ءتۇرلى سانات بويىنشا الەمنىڭ ءار قيىرىنان 500-دەن اسا سپورتشى تىركەلگەن. مارافوننىڭ جالپى قاشىقتىعى توعىز مىڭ شاقىرىم.
ەسكە سالساق, «استانا» راللي 2011 جىلدان باستاپ «داكار» حالىقارالىق جىل سايىنعى ترانسقۇرلىقتىق راللي-مارافونىنا قاتىسىپ جۇرگەن العاشقى ءارى ازىرگە جالعىز قازاقستاندىق كوماندا. كوماندا وسىعان دەيىن «جۇك كولىكتەرى ت2» كاتەگورياسىنداعى راللي رەيدتەر بويىنشا الەمنىڭ ەكى دۇركىن چەمپيونى جانە «داكاردىڭ» ەكى مارتە قولا مەدال يەگەرى اتانعان. وعان قوسا 2012 جىلى جۇك كولىكتەرى ساناتىندا, سونداي-اق, «جۇك كولىكتەرى ت2»كاتەگورياسىندا «Silk Way Rally-2016» حالىقارالىق ءىرى ترانسقۇرلىقتىق راللي دوداسىنىڭ جەڭىمپازدارى. «سپورتشىلاردىڭ جىل بويى جارىسقا دايىندىق ۇستىندە تىنىمسىز توككەن تەرىن ەسكەرسەك, كوماندامىز الداعى باسەكەدە العا قويىلعان ماقساتتاردى ورىندايتىنىنا كۇمانىم جوق», دەيدى «استانا» پرەزيدەنتتىك كلۋبىنىڭ اتقارۋشى ديرەكتورى امانبەك كۋلچيكوۆ. ەندەشە الەمنىڭ ەڭ ازۋلى كوماندالارى باس قوساتىن باسەكەدە ەل نامىسىن ارقالايتىن ازاماتتارعا سەنىم ءبىلدىرىپ, جەڭىستى جولدىڭ جالعانا بەرۋىن تىلەيىك.
ارمان وكتيابر,
«ەگەمەن قازاقستان»
الماتى
