كوپتەن بەرى بار تەحنيكاسىن سايلاپ ءازىر وتىرعان, ارەڭ وتىرعان كوممۋنالدىق قىزمەت ۇيىمى قيۋلاسقان كوشەلەردىڭ قارىن تازالاۋدى ساعات 05.00-دەن باستاپ كەتكەنىمەن, ءۇزىلىسسىز قوزعالىستاعى كولىكتەر كوشە تازالاۋ جۇمىستارىن مەيلىنشە قيىنداتقانى دا راس.
ۇيقىدان كوزىن اشقان قالا حالقىن جانە ءبىر قاتتى تاڭداندىرعانى – جاپالاقتاپ ءاپ-ادەمى جاۋىپ تۇرعان اپپاق قاردىڭ كەنەت الاي-دۇلەي قاتتى قۇيىنداتقان بورانعا ۇلاسۋى ەدى. نەبارى 20-25 مينۋتتاي ۇيىتقىپ سوققان قارلى قۇيىن ءزاۋلىم اعاشتاردى, جول جاعالاي ءتىزىلىپ تۇرعان باعاندارعا ىلىنگەن جارناما قالقاندارىن شايقاپ-شايقاپ اياقاستىنان قالاي باستالسا, ءبىر مەزەتتە سولاي ساپ تىيىلدى. ءبىر كۇن بۇرىن عانا 8 گرادۋس جىلىلىقتى كورسەتكەن تەرمومەتر باعانى –8 گرادۋسقا دەيىن تومەندەدى.
قالا اكىمىنىڭ ءباسپاسوز قىزمەتى كولىك كەپتەلىسىنە قاراماستان, كوشەلەردى قاردان بوساتۋ «مايدانىنا» 604 ارناۋلى تەحنيكانىڭ قاتىسقانىن حابارلاپ جاتتى. ولارعا كوممۋنالدىق قىزمەتتىڭ 2322 جۇمىسشىسى كومەكتەسكەن. بارلىعى 184 ارنايى جاساقتالعان اۆتوكولىك كليماتتىڭ اياقاستى اۋىسۋىنان بولاتىن كوكتايعاقتىڭ الدىن الۋ ءۇشىن كوشەلەرگە قۇم قوسپالارىن اياماي شاشتى. ارينە, مۇنداي ناۋقاننىڭ بابىمەن جۇرۋىنە قالاداعى مىڭعىرعان قوعامدىق جانە جەكە كولىك ءنوپىرىنىڭ قوزعالىسى كەدەرگى كەلتىرەتىنى بار. وسىعان وراي قاربالاس اتقارىلعان بارلىق جۇمىس قالالىق ءىىد جول-كولىك پوليتسياسىنىڭ كومەگىمەن جۇزەگە استى. توتەنشە جاعدايلار دەپارتامەنتىنىڭ مالىمەتىنشە تابيعاتتىڭ وقىس مىنەز كورسەتۋىنە وراي مەگاپوليستە ەشقانداي دا وقىس وقيعا تىركەلمەگەن.
...ءتۇس اۋا الماتىنىڭ اسپانى شايداي اشىلدى. بۇل جولعى ۇلپا قار ادەتتەگىدەي تەز ەرىگەن دە جوق. قىس ايىنىڭ ناعىز ىزعارى سەزىلە باستادى. الماتىعا كوپتەن كۇتكەن قىس ءتۇستى...
تالعات ءسۇيىنباي,
«ەگەمەن قازاقستان»
الماتى
سۋرەتتى تۇسىرگەن
نۇرمانبەت قيزات ۇلى
