«قازاقستاننىڭ ءۇشىنشى جاڭعىرۋى اياسىندا مەديا رەسۋرستار نارىعىنىڭ دامۋى» تاقىرىبىمەن وتكەن جيىنعا اقپارات جانە كوممۋنيكاتسيالار ءمينيسترى داۋرەن اباەۆ, قازاقستانداعى اقش ەلشىسى دجوردج كرول قاتىستى.
شارانى «قازاقستان» تەلەراديوكورپوراتسياسى, ءباسپاسوز كلۋبى جانە قازاقستانداعى اقش ەلشىلىگى ۇيىمداستىردى. فورۋمنىڭ ماقساتى – قازاقشا سايتتاردى دامىتۋ, كونتەنت ساپاسىن ارتتىرۋ جانە وسى سالاداعى وزەكتى ماسەلەلەردىڭ شەشىمىن تابۋ.
جيىندا ءسوز سويلەگەن اقپارات جانە كوممۋنيكاتسيالار ءمينيسترى د.اباەۆ بۇقارالىق اقپارات قۇرالدارىنا قاتىستى زاڭ جوباسىن ءتۇسىندىرىپ, وسى سالانىڭ جاڭا دامۋ ستراتەگياسى جونىندە اڭگىمەلەپ بەردى.
«كەلەسى جىلدان باستاپ بۇقارالىق اقپارات سالاسىنداعى ستراتەگيالىق ماڭىزى بار قۇجات ازىرلەۋ جوسپاردا بار. كەلەشەكتە قاي باعىتتا جۇمىس ىستەيتىنىمىز جانە دامۋ باسىمدىقتارىمىز انىقتالادى. 2018 جىلدىڭ سوڭىنا دەيىن قۇجاتتى تانىستىرىپ ۇلگەرەمىز», دەدى مينيستر.
بۇدان بولەك, ۆەدومستۆو باسشىسى اقپاراتتىق-كوممۋنيكاتسيالىق تەحنولوگيالاردىڭ دامۋىنا توقتالدى. ونىڭ ايتۋىنشا, قازىرگى تاڭدا الەۋمەتتىك جەلىلەر باق-قا باسەكەلەسكە اينالعان. سونىڭ ناتيجەسىندە الەۋمەتتىك جەلىلەرگە شىققان وتىرىك اقپارات ءجۋرناليستىڭ ەڭبەگىن جوققا شىعارۋى مۇمكىن. د.اباەۆتىڭ پىكىرىنشە, جاعدايدىڭ وسىلاي ءوربۋى كاسىبي ماماندارعا سۇرانىستى ارتتىرىپ وتىر. سونداي-اق, مينيستر قازاق سايتتارى رەداكتورلارى فورۋمىنىڭ ماڭىزدىلىعىنا توقتالدى.
«ينتەرنەتتىڭ قارقىندى دامۋى كوممۋنيكاتسيا قۇرالدارىن ءبىر ارنادا توعىستىرىپ, ءداستۇرلى باق پەن جاڭا مەديانىڭ ساباقتاستىعى كۇشەيتە ءتۇستى. سوندىقتان وسى سالاداعى ەڭ ماڭىزدى ماسەلەلەردى بىرلەسە تالقىلاۋعا شاقىردىق. فورۋمدا تالقىلانعان پىكىرلەر ەلدەگى اقپارات سالاسىنىڭ دامۋىنا ۇلەس قوسادى دەپ سەنەمىن», دەدى د.اباەۆ.
فورۋم بارىسىندا جان-جاقتان جينالعان ماماندار قازاق ءتىلدى سايتتارعا قاتىستى ءوز ويلارىن ورتاعا سالىپ, تاجىريبەلەرىمەن ءبولىستى. جيىندا كونتەنت ساپاسى مەن وقىرمان تالابى, جارناما مەن مونەتيزاتسيا ماسەلەلەرى تالقىلاندى. سونىمەن قاتار, جاڭا مەديا مەن ءداستۇرلى باق-تىڭ ايىرماشىلىعى مەن ۇقساستىعى, قازىرگى ترەندتەر مەن جاڭا تەحنولوگيالار ءسوز بولدى.
اباي اسانكەلدى ۇلى,
«ەگەمەن قازاقستان»
