«رۋحاني جاڭعىرۋ» باعدارلاماسى اياسىندا, ەل تاۋەلسىزدىگى مەرەكەسىنە وراي اقتاۋداعى «ماڭعىستاۋ-ارەنا» سپورت كەشەنىندە 2000-2001 جىلى تۋىلعان جاسوسپىرىمدەر اراسىندا دزيۋدودان حالىق باتىرى شوتان نازار ۇلىن ەسكە الۋعا ارنالعان III رەسپۋبليكالىق اشىق تۋرنير ءوتتى. تۋرنيرگە ماڭعىستاۋ, اتىراۋ, اقتوبە, باتىس قازاقستان وبلىستارى مەن شىعىس قازاقستان وبلىسىنان جانە قىزىلوردا وبلىسىنان 250-گە تارتا پالۋان قاتىستى.
16-17 جەلتوقسان كۇندەرى وتكەن, ياعني ەكى كۇنگە سوزىلعان سايىستا توپتىق ەسەپتە ماڭعىستاۋ وبلىسى ءبىرىنشى ورىندى يەلەنسە, ەكىنشى ورىندى شىعىس قازاقستان وبلىسىنىڭ, ءۇشىنشى ورىندى اتىراۋ وبلىسىنىڭ پالۋاندارى يەلەندى. توپتىق سايىستاعى 1-ورىن جەڭىمپازدارىنا 200 مىڭ تەڭگە, 2-ورىن يەگەرلەرىنە 100 مىڭ تەڭگە جانە 3-ورىن العاندارعا 50 مىڭ تەڭگە قارجىلاي سىيلىقتار تابىستالدى. ال, سالماق دارەجەسى بويىنشا جەڭىمپازدار مەدالدارمەن, العىس حاتتارمەن ماراپاتتالدى.
«شوتان باتىر تەك ءبىر رۋدىڭ نەمەسە ءوز ۇرپاقتارىنىڭ ماقتانىشى ەمەس, سەبەبى ول تەك ءوز ۇرپاقتارى ءۇشىن باسىن قاتەرگە بايلاعان جوق. سوندىقتان, باتىر بابامىزدى ەسكە الۋعا ارنالعان رەسپۋبليكالىق ءتۋرنيردى ۇيىمداستىرۋعا قولداۋ كورسەتكەن ماڭعىستاۋ وبلىسىنىڭ اكىمى ەرالى لۇقپان ۇلىنا, ماڭعىستاۋ وبلىستىق دزيۋدو فەدەراتسياسىنىڭ پرەزيدەنتى سامات بازارباي ۇلىنا, دەمەۋشىلىك جاساعان «اكتاۋBSستروي»,«Chem servise», «قازازوت» جانە «نۇر-جول قۇرىلىس», «اق جول قۇرىلىس», «كورپوراتسيا كاسپي ستروي سەرۆيس» سەرىكتەستىگىنە, بارلىق قاتىسۋشىلارعا العىسىمىز شەكسىز. «بولار ەلدىڭ بالاسى ءبىرىن-ءبىرى باتىر دەر» دەگەندەي, قازاقتىڭ جىگىتتەرى اۋىزبىرشىلىگىمىز بولىپ, جۇدىرىقتاي جۇمىلىپ, اركەز ءبىر-ءبىرىمىزدى قولداپ جۇرەيىك, دەگىم كەلەدى, دەيدى «حالىق باتىرى شوتان نازار ۇلى» قوعامدىق قورىنىڭ باسشىسى الىبەك دۇيسەنوۆ.
2017 جىلى ماڭعىستاۋلىق دزيۋدوشىلار الەم, ازيا چەمپيوناتتارىندا جانە ەل بىرىنشىلىكتەرىندە جۇلدەلى ورىندارعا يە بولدى. تۋرنيردە ماڭعىستاۋ وبلىستىق دزيۋدو فەدەراتسياسىنىڭ پرەزيدەنتى سامات مۇساباەۆ اتالمىش سپورت ءتۇرى بويىنشا 2017 جىلدى تابىستى قورىتىندىلاپ, وبلىس مەرەيىن وسىرگەن سپورتشىلار – قازاقستان چەمپيوناتىنىڭ چەمپيونى كامشات قاراسايقىزىنا 2 000 000 تەڭگەنىڭ, كازاقستان چەمپيوناتىنىڭ كۇمىس جۇلدەگەرلەرى اننا كازيۋلينا مەن باۋىرجان ساعىنعالي ۇلىنىڭ ارقايسىسىنا 1 000 000 تەڭگەنىڭ سەرتيفيكاتتارىن تابىس ەتتى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى
