قالالىق ءماسليحاتتىڭ دەپۋتاتى, كاسىپكەر سەرگەي كوروتيننىڭ دەمەۋشىلىگىمەن ەسىگىن ايقارا اشقان ورتالىقتىڭ لەنتاسىن «قازاق ءتىلى» بىرلەستىگىنىڭ ءتورايىمى روزا ءداۋىتوۆا مەن «نۇر وتان» پارتياسى وبلىستىق فيليالى توراعاسىنىڭ ورىنباسارى ولەگ چۋگۋنكوۆ قيدى. و.چۋگۋنكوۆ ورتالىقتىڭ اشىلۋى مەملەكەتتىك دەڭگەيدەگى ماڭىزدى رەفورمانى جۇزەگە اسىرۋدىڭ العاشقى قادامدارىنىڭ ءبىرى ەكەندىگىن اتاپ ءوتتى. «ورتالىق قاجەتتى ماتەريالدىق-تەحنيكالىق قۇرالدارمەن تولىق جابدىقتالعان. وقۋلىقتاردى, 1929-1939 جىلدارى لاتىن قارپىندە جاريالانعان كىتاپتار مەن ماقالالاردى وسى جەردەن تابۋعا بولادى. جاڭادان اشىلعان كابينەتتىڭ ەڭ العاشقى كەلۋشىلەرى حالىققا لاتىن قارپىن ۇيرەتەتىن ۇستازدار قاۋىمى بولادى دەپ ويلايمىز», - دەيدى كىتاپحانا قىزمەتكەرى اسەل وماروۆا.
شارا بارىسىندا جاڭا الىپبيمەن تانىستىراتىن العاشقى بەينەجازبا ساباعى وتكىزىلدى. بەينەجازبا ساباعىن الماتى قالاسىنداعى احمەت بايتۇرسىنوۆ اتىنداعى ءتىل ءبىلىمى ينستيتۋتى ديرەكتورىنىڭ عىلىمي جۇمىس جونىندەگى ورىنباسارى, فيلولوگيا عىلىمدارىنىڭ كانديداتى انار فازىلجانوۆا جۇرگىزدى.
جاڭا ءالىپبيدى وقىپ-ۇيرەنۋ ورتالىعىندا پايدالانۋشىلارعا كىتاپتار مەن ينتەرنەتتى اقىسىز پايدالانۋعا بولادى. كىتاپحانا قىزمەتكەرلەرى الداعى ۋاقىتتا ءتۇرلى سالا ماماندارى ءۇشىن ونلاين كەڭەستەر مەن ساباقتار ۇيىمداستىرىلاتىنىن ايتادى.
ازامات قاسىم,
«ەگەمەن قازاقستان»
وسكەمەن
