جارمەڭكەگە 150 كاسىپكەر قاتىستى. ونىڭ 130-ى «سارايشىق» بازارىندا تۇراقتى تۇردە ونىمدەرىن ۇسىنىپ جۇرگەن كاسىپكەرلەر, ال قالعان 20-سى كوتەرمە ساۋدامەن اينالىساتىن كاسىپكەرلەر. سونداي-اق, ماحامبەت, يندەر اۋداندارىنان كەلگەن كوكونىس ساتۋشىلارى ءوز ونىمدەرىن حالىققا ۇسىندى.
اتىراۋ قالالىق كاسىپكەرلىك جانە تۋريزم ءبولىمى باسشىسىنىڭ مىندەتىن اتقارۋشى التىناي سارسەنقىزىنىڭ ايتۋىنشا, جارمەڭكەدەگى ونىمدەر قازىرگى بازار نارىعىنان 20-30 پايىزعا ارزان باعامەن ساتىلىپ جاتىر. ادەتتە ەت 1500 تەڭگە بولسا, بۇگىنگى باعا 1300-1350-گە تۇسكەن, قازىعا 2000, جۇمىرتقاعا 19 تەڭگە باعاسى قويىلدى. ال العاشقى 45 مينۋتتا ساتىلعان 5 توننا كارتوپ ساۋدانى قىزدىرا ءتۇستى.
«بۇگىنگى جارمەڭكەدە ءار كاسىپكەر ءارتۇرلى جەڭىلدىكتەر جاساپ جاتىر. سول ءۇشىن بۇل جارمەڭكەنىڭ وتكىزۋ ۋاقىتى حالىقتىڭ ىڭعايىنا قاراي تاڭدالدى. سونداي-اق, بۇل جەرگە جينالعان كوپ تۇرعىننىڭ بارىپ-كەلۋىن ارنايى ەكى مارشرۋت قامتيدى. تۇتىنۋشىلاردى تاسيتىن سارايشىق بازارى-اۆانگارد ىقشام اۋدانى, سارايشىق بازارى-اكادەميا ايالداماسى ارالارىن جالعايتىن 6 اۆتوبۋس ءبولىندى»,-دەپ مالىمدەدى اتىراۋ قالالىق كاسىپكەرلىك جانە تۋريزم ءبولىمى باسشىسىنىڭ مىندەتىن اتقارۋشى التىناي سارسەنقىزى.
ايتا كەتەيىك, حالىقتىڭ ۇسىنىسى بويىنشا ەرتەڭ كۇندىز دە جارمەڭكە جالعاسىن تابادى. جاڭا جىل قارساڭىندا تاعى دا وسىنداي جارمەڭكە وتكىزۋ جوسپارلانۋدا.
باقىتگۇل باباش,
«ەگەمەن قازاقستان»
