فوتو: ايباتىر نۇراش
سۋ قۇبىرى تورابىنىڭ ۇزىندىعى 62,3 شاقىرىم. قۇرىلىس جۇمىسى بيىل ءساۋىر ايىندا باستالعان ەدى. مەردىگەر «KazConstructionGroup» كومپانياسى كوپ جۇمىستى از ۋاقىتتا ساپالى اتقارىپ شىققان.
- اۋىلعا ورتالىقتاندىرىلعان تازا اۋىز سۋ جەتىپ وتىر. بۇل جۇمىسقا «نۇرلى جەر» باعدارلاماسى اياسىندا قاراجات ءبولىندى. قۇرىلىس جازدا باستالعان بولاتىن. بۇل جەردە ەكى سۋ قويماسى بار. جوبا اياسىندا وسى ەلدى مەكەننىڭ ازاماتتارى جۇمىسپەن قامتىلدى. ايتا كەتەيىن, بيىل ءبورلى اۋدانىندا 57 نىسانعا 12 ملرد.500 ملن تەڭگە ءبولىندى. بۇل ۇلكەن قولداۋ. وبلىس اۋداندارىنداعى 55 ەلدى مەكەندى تازا اۋىز سۋمەن قامتۋ ءۇشىن 11 ملرد.تەڭگە ءبولىندى. قۋانىش ۇزاعىنان بولسىن! - دەدى باتىفس قازاقستان وبلىسىنىڭ اكىمى التاي كولگىنوۆ سۋ تورابىنىڭ اشىلۋ سالتاناتىندا.
ءدال وسى كۇنى ءبورلى اۋىلىندا جوندەۋدەن وتكەن مادەنيەت ءۇيى دە تۇرعىندارعا ەسىگىن ايقارا اشتى. بۇل جوباعا اۋداندىق بيۋدجەتتەن 30 ملن.تەڭگە بولىنگەن ەدى. تامىز ايىندا باستالعان قۇرىلىس جۇمىستارى جەلتوقساندا اياقتالدى.
كەڭتۇبەك اۋىلدىق وكرۋگىندە دە ۇلكەن قۋانىش. مۇندا 50 بالاعا ارنالعان بالاباقشا اشىلدى. بۇل قۇرىلىسقا 10 683 7976 تەڭگە جۇمسالعان.
- وسى جازدا كەڭتۇبەك اۋىلىنا كەلىپ, بالاباقشانىڭ كىرپىشىن قالاۋعا قاتىسىپ ەدىك. ەندى, مىنە, تاۋەلسىزدىك كۇنى قارساڭىندا قۋانىشتا باس قوسىپ وتىرمىز. اۋىلدىڭ بالاباقشا جاسىنداعى بالالارى وسىعان دەيىن مەكتەپتىڭ جانىنداعى شاعىن ورتالىققا باراتىن ەدى. وڭىردە 24 ءبىلىم بەرۋ نىسانى سالىنۋدا. ونىڭ ىشىندە 10 جەكە بالاباقشا, 10-نان استام مەكتەپ بار, - دەدى ا.سەيدىر ۇلى.
بۇل كۇنى ءبورلى اۋدانى ورتالىعى اقساي قالاسىندا دا بىرنەشە تۇرعىن ءۇي پايدالانۋعا بەرىلدى. ءوڭىر باسشىسى التاي كولگىنوۆ قاراشىعاناق شاعىن اۋدانىندا سالىنعان 75 پاتەرلىك تۇرعىن ءۇيدىڭ كىلتىن پاتەر يەلەرىنە تابىستادى.
بيىل اقساي قالاسىندا قۇرىلىس قارقىندى ءجۇردى. الەۋمەت اسىرەسە قاراشىعاناق كەنىشىنىڭ ەكولوگيالىق اۋماعىنان كوشىرىلۋى ءتيىس بەرەزوۆكا اۋىلى تۇرعىندارىنىڭ جاڭا باسپانا الۋىنا ەرەكشە كوڭىل اۋدارعان بولاتىن. بۇل ماسەلەنى ەلباسى ءوزى تىكەلەي باقىلاۋدا ۇستايتىنىن دا ەسكەرتكەن بولاتىن. ۇلىق مەيرام قارساڭىندا بۇل ماسەلە دە تولىعىمەن شەشىلدى.
اقساي قالاسىنىڭ جانىنداعى قىزىلتال اۋىلىنان سالىنعان 100 ۇيلىك شاعىناۋدان وسىدان بىرنەشە اي بۇرىن پايدالانۋعا بەرىلگەن ەدى. ەندى كوپقاباتتى جايلى پاتەر الۋدى تاڭداعان بەرەزوۆتىقتارعا 9 قاباتتى ەكى ءۇيدىڭ كىلتى تابىس ەتىلدى. جاڭا پاتەرلەردىڭ كىلتىن سالتاناتتى جاعدايدا تابىس ەتكەن ءوڭىر باسشىسى التاي كولگىنوۆ بيىل باتىس قازاقستان وبلىسىندا ەلباسى باعدارلامالارىنا ساي ون ءتورت كوپ قاباتتى ءۇي قۇرىلىسى سالىنعانىن, ونىڭ ناتيجەسىندە بارلىعى 1700 وتباسى پاتەرلى بولعانىن ايتىپ ءوتتى.
التاي كولگىنوۆ وسى ساپارىندا «قپو ب.ۆ.» كومپانياسىنىڭ باس ديرەكتورى رەناتو ماروليمەن بىرگە بەرەزوۆتىق تۇرعىندارعا ارناپ سالىنعان تۇرعىن ۇيگە باس سۇعىپ, پاتەر يەلەرىمەن تىلدەستى. سونىمەن قاتار بەرەزوۆتان كوشىرىلگەندەرگە ارناپ سالىنعان 300 ورىندىق مەكتەپ قۇرىلىسىمەن تانىستى. قۇرىلىسى اياقتالعان بۇل مەكتەپ قاڭتار ايىنان, ياعني بيىلعى وقۋ جىلىنىڭ ءۇشىنشى توقسانىنان باستاپ قىزمەتكە كىرىسپەك.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
