وبلىس ورتالىعىنداعى №35 «ەرتوستىك» بالاباقشاسىندا وتكەن «اسىق party» ويىنىنا باسقا بالاباقشالاردان كەلگەن 360 بالا قاتىستى. اسىقتاردى دەنەشىنىقتىرۋ ساباعىندا ەمەس, اينالامەن تانىسۋ, ءتىل دامىتۋ, ماتەماتيكا ساباقتارىندا دا قولدانادى. دويبىنى اق جانە قارا ءتۇستى اسىقتارمەن وينايدى, سانداردى الىپ-قوسۋدى دا ءتۇرلى-تۇسكە بويالعان اسىقتار ورناتىلعان ەسەپشوتتار ارقىلى مەڭگەرەدى. تاربيەشىلەر حالىقتىق پەداگوگيكانىڭ ادىستەرىن قولدانۋدى جەتىلدىرىپ, ىزدەنىس ۇستىندە جۇرەدى.
بۇدان كەيىن وبلىس ورتالىعىنداعى №10 اباي اتىنداعى مەكتەپ-ليتسەيدە قالالىق ءبىلىم ءبولىمى مەن «التىن ساقا» باستاماشىل توبىنىڭ ۇيىمداستىرۋىمەن وقۋشىلار اراسىندا اسىق اتۋ ويىنىنان قالالىق تۋرنير ءوتتى. ۇيىمداستىرۋشىلار جارىستى اسىق ويىنىنىڭ تۇرلەرىنە ساي ءبولدى. مىسالى, قۇمار ويىنعا 2-4 وقۋشىدان قاتىستى. ويىنشىلار كەزەك-كەزەك ءتورت اسىقتى ءيىردى. ءيىرۋشى ءتورت بۇك, ءتورت شىك, ءتورت الشى, ءتورت تايكە ءتۇسىردى دە, جۇلدەنىڭ جارتىسىن الدى. ەكىنشىسىندە, ءتورت اسىق ءتورت ءتۇرلى ءتۇستى, ياعني تىگىلگەن جۇلدەنى تۇگەلدەي الدى. جۇگىرەسىڭ, سەكىرەسىڭ, تەرلەيسىڭ, كوزدەيسىڭ, تيگىزەسىڭ, ەرەگىسەسىڭ, جەڭەسىڭ, جەڭىلەسىڭ, ۇتاسىڭ, ۇتىلاسىڭ. باسەكە. شەبەرلىككە, مەرگەندىككە, باتىلدىققا تاربيەلەيدى.
جالپى, تۋرنير وتكەن اباي اتىنداعى №10 ليتسەي-مەكتەبىندە جىلدار بويى وقۋشىلار اسىق ۇيىرمەسىنە قاتىسىپ كەلەدى. تۋرنيرگە قاتىسقان 11 مەكتەپتىڭ اراسىنان 1-ورىندى №35 قابدىكارىم ىدىرىسوۆ اتىنداعى مەكتەپ وقۋشىلارى يەلەندى. ال 2-ورىن اباي اتىنداعى №10 ليتسەي-مەكتەبى, 3-ورىندى «جاس دارىن» مەكتەبىنىڭ وقۋشىلارى جەڭىپ الدى. جەڭىمپازدار مەن جۇلدەگەرلەر ديپلومدارمەن, مەدالدارمەن, اقشالاي جانە زاتتاي سىيلىقتارمەن ماراپاتتالدى.
وقۋشىلارعا اسىق ويىنىن كاسىبي تۇردە ۇيرەتىپ جۇرگەن اقسۋ قالاسىنا قاراستى جامبىل ورتا مەكتەبىنىڭ تەحنولوگيا ءپانىنىڭ مۇعالىمى جيەنحان قاماناي ۇلى «اسىق party» جوباسىن جالعاستىرماقشى. جيەنحاننىڭ ايتۋىنشا, اسىق ويىنىنىڭ 80-گە تارتا ءتۇرى بار ەكەن. قازىر شەڭبەرگە اسىقتى ءتىزىپ, ءبىر عانا تۇرىمەن وينايدى. ال ۇيىرمەگە كەلەتىن جيەنحاننىڭ وقۋشىلارى اسىق ويىنىنىڭ اتۋ, قاعۋ, قۇمار, ات جارىسى, حانتالاپاي, بەس اسىق, ۇتۋ دەگەن تۇرلەرىن ۇيرەنۋدە.
– سوندىقتان اسىق ويناۋ جوباسى باستالعانى دۇرىس. ەندى بىزگە ويىن تۇرلەرىنىڭ بىرىڭعاي ستاندارتىن بەكىتىپ, ەرەجەسىن جاساۋ كەرەك. ەكىنشىدەن, ءاربىر جارىس, تۋرنير وتكەندە وسى ەرەجەگە باعىنۋ قاجەت, – دەيدى جيەنحان قاماناي ۇلى.
ول ايتىپ وتىرعان جوبانى جەرگىلىكتى «ەرتىس مەديا» جشس ديرەكتورىنىڭ ورىنباسارى جۇمابەك سمانوۆ جازعان-دى. الەۋمەتتىك جەلىدە تاراعان اسىق ويىنى جوباسى جايلى اقپارات بالاباقشالارعا دا جەتتى. ياعني «اسىق party» ينتەرنەت جوباسى وي سالدى دەگەن ءسوز. وسىدان كەيىن وبلىستىق «ەرتىس مەديا» جشس, «نايزاتاس» جۋرنالىنىڭ باس رەداكتورى اسىل ابىشەۆ باستاعان وڭىرلىك باق وكىلدەرىنىڭ تىلشىلەرى قولداپ, جوبا باستاعان-دى. بالاباقشالاردا بالالاردى ۇلتتىق ويىندارمەن تانىستىرۋ, اسىق ويناۋدىڭ تۇرلەرىنە, حالقىمىزدىڭ سالت-داستۇرلەرىنە ولاردىڭ قىزىعۋشىلىعىن وياتۋ ماقساتىنا وراي كوتەرگەن جوبانىڭ ۇسىنىستارىن اتا-انالار, بالاباقشالار ۇجىمى قولدادى.
جوبانى قولداۋشىلاردىڭ ءبىرى وبلىستىق مادەنيەت جانە قۇجاتتار, ارحيۆتەر باسقارماسىنىڭ باسشىسى ارداق رايىمبەكوۆتىڭ ايتۋىنشا, وڭىرىمىزدە توعىزقۇمالاق ويىنى بارلىق مەكتەپتە وينالادى, جىل سايىن اۋداندىق, وبلىستىق جارىستار وتەدى. قىزىعۋشىلىق باسىم, ۇلتتىق ويىنعا دەگەن قۇمارلىق بار. سوندىقتان الداعى ۋاقىتتا مەكتەپتەر مەن بالاباقشالاردا اسىق ويىنىن ۇيرەتەتىن ۇيىرمەلەردىڭ سانىن كوبەيتەتىن بولساق, بۇل ويىندى دا توعىزقۇمالاق ويىنىنىڭ دەڭگەيىنە جەتكىزە الامىز, – دەيدى «التىن ساقا» باستاماشىل توبىنىڭ جەتەكشىسى اسىل ابىشەۆ.
فاريدا بىقاي,
«ەگەمەن قازاقستان»
پاۆلودار
