14 جەلتوقسان كۇنى ايماق باسشىسى دانيال احمەتوۆ وڭىردەگى 22 مەكتەپتىڭ ديرەكتورىنا سۋ جاڭا اۆتوبۋستاردىڭ كىلتىن سالتاناتتى تۇردە تابىس ەتتى. DAEWOO BSD 106 ماركالى اۆتوبۋستار سەمەي قالاسىنداعى «سەماز» كولىك زاۋىتىندا قۇراستىرىلعان. جولاۋشىلار كولىگى قاۋىپسىز تاسىمالدىڭ بارلىق تالاپتارىنا جاۋاپ بەرەدى. قازىرگى تاڭدا وبلىستا مەكتەپ وقۋشىلارىن تاسىمالداۋعا ارنالعان 193 اۆتوبۋس بار ەكەن. ايماقتا «مەكتەپ اۆتوبۋسى» باعدارلاماسىمەن اۆتوپاركتەردىڭ جاڭارتىلىپ جاتقانىن دا ەرەكشە اتاپ وتۋگە بولادى. سالتاناتتى راسىمدە ءسوز العان ءوڭىر باسشىسى قازىرگى كۇنى شىعىستاعى بارلىق مەكتەپتەر اۆتوبۋسپەن تولىق قامتاماسىز ەتىلگەنىن, كولىكتەر ءوزىمىزدىڭ وبلىستا قۇراستىرىلىپ جاتقانىن تىلگە تيەك ەتتى.
بۇل كۇنى وبلىس ورتالىعىندا حالىقارالىق وسكەمەن اۋەجايىنىڭ جاڭا تەرمينالى اشىلىپ, ءوز جۇمىسىن باستادى. جولاۋشىلارعا ارنالعان تەرمينال ساعاتىنا 200 ادامدى وتكىزۋگە قابىلەتتى. كەدەن باقىلاۋىنىڭ جاڭا تەحنولوگيالارىمەن جانە زاماناۋي قۇرىلعىلارمەن جابدىقتالعان تەرمينالدا انا مەن بالاعا ارنالعان بولمە دە قاراستىرىلعان. «پرومتەحمونتاج» وسكەمەن باسقارماسى» اق ديرەكتورىنىڭ ورىنباسارى بولاتبەك ساقىلباەۆتىڭ ايتۋىنشا, تەرمينال قۇرىلىسىنا بيۋدجەتتەن 498 ميلليون تەڭگە قارجى بولىنگەن. «شىعىس قازاقستان رەسەيمەن, قىتاي حالىق رەسپۋبليكاسىمەن جانە موڭعوليامەن شەكارالاس بولعاندىقتان, اۋەجايدىڭ كەڭەيىپ, تەرمينالدىڭ اشىلعانى حالىقارالىق قاتىناسقا جاڭا سەرپىن بەرەرى ءسوزسىز. اۋەجاي جىلىنا 300 مىڭنان استام جولاۋشىنى قابىلداسا, الداعى ۋاقىتتا بۇل كورسەتكىشتىڭ ۇلعاياتىنىنا كامىل سەنىمدىمىن», دەدى تەرمينالدىڭ اشىلۋ سالتاناتىنا قاتىسقان وبلىس اكىمى.
شارا بارىسىندا كەلەسى جىلى حالىقارالىق اۋەجايدىڭ جوسپار بويىنشا ۇشۋ الاڭى, جۇك تەرمينالى, اۆتوتۇراق پەن جۇك قويماسى جوندەۋدەن ءوتىپ, حالىقارالىق ستاندارتتارعا ساي جاڭارتىلاتىنى ايتىلدى.
سونىمەن قاتار وسكەمەندەگى وبلىستىق دراما تەاتردا ءوڭىر ونەرپازدارىنىڭ قاتىسۋىمەن تاۋەلسىزدىك كۇنىنە ارنالعان مەرەكەلىك كونتسەرت ءوتىپ, ايماق باسشىسى د.احمەتوۆ ءوڭىر جۇرتشىلىعىن ەلىمىزدىڭ باس مەيرامىمەن قۇتتىقتادى. «تاۋەلسىزدىك كۇنى – ەل تاريحىنداعى ەڭ ەلەۋلى, ەڭ ماڭىزدى مەرەكەلەردىڭ ءبىرى. بۇل كۇن – ازاتتىقتى اڭساعان بابالارىمىزدىڭ ارمانىنىڭ ورىندالعان كۇنى. بۇگىندە ءبىزدىڭ ەلىمىزدە جايلى ءومىر سۇرۋگە بارلىق مۇمكىندىك بار. مۇنىڭ ءبارى – تاۋەلسىزدىكتىڭ ارقاسى», دەدى ايماق باسشىسى.
ازامات قاسىم,
«ەگەمەن قازاقستان»
وسكەمەن
