ءىس-شارادا ءسوز سويلەگەن گ.ابدىقالىقوۆا ۇلتتىق مەرەكە – تاۋەلسىزدىك كۇنى قارساڭىندا ەل دامۋىنا ەرەكشە ەڭبەك ءسىڭىرىپ, ۇلەس قوسقان ازاماتتاردى ماراپاتتاۋ يگى داستۇرگە اينالعانىن اتاپ ءوتتى.
«جىلداعى يگى ءداستۇر بويىنشا, ەلباسى نۇرسۇلتان نازارباەۆ مەملەكەتىمىزدىڭ ءوسىپ, وركەندەۋىنە ۇلەس قوسىپ, ەرەن ەڭبەگىمەن كوزگە تۇسكەن ازاماتتاردى ماراپاتتايدى. بيىل 1700-دەن استام ادام جوعارى ناگراداعا يە بولدى. بۇل تاۋەلسىزدىك تۇعىرىن نىعايتۋعا, حالقىمىزدىڭ يگىلىگىنە ۇلەس قوسقان ازاماتتاردىڭ ەڭبەگى جوعارى باعالانعانىن كورسەتەدى», دەدى مەملەكەتتىك حاتشى.
گ.ابدىقالىقوۆا بيىل 115 ەل جانە 22 حالىقارالىق ۇيىم قاتىسقان ۇلتتىق جوبا – حالىقارالىق «استانا ەكسپو-2017» مامانداندىرىلعان كورمەسى تابىستى وتكىزىلگەنىنە توقتالدى. مەملەكەتتىك حاتشى قازاقستان تمد ەلدەر اراسىنان ءبىرىنشى بولىپ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى اتانعانىن دا ءسوز ەتتى.
«ەلباسى ن.نازارباەۆتىڭ حالىقتىڭ ءال-اۋقاتىن ارتتىرۋعا باعىتتالعان ستراتەگيالىق باعدارىنىڭ جۇزەگە اسىرىلۋى ارقاسىندا قازاقستان زاماناۋي مەملەكەتكە اينالدى. بۇگىندە ەلىمىز جاڭعىرتىلىپ جاتقان جۇيەلى وزگەرىستەر كەزەڭىن باستان وتكەرىپ وتىر. قازاقستان جاھاندىق باسەكەگە قابىلەتتىلىككە قول جەتكىزۋ ماقساتىمەن يندۋستريالاندىرۋدى جالعاستىرىپ كەلەدى. ۇزاق مەرزىمگە ارنالعان «قازاقستان-2050» ستراتەگياسى دايەكتى تۇردە ىسكە اسىرىلىپ جاتىر», دەدى گ.ابدىقالىقوۆا.
ناگرادا العانداردىڭ قاتارىندا مادەنيەت, ءبىلىم بەرۋ, عىلىم, دەنساۋلىق ساقتاۋ سالاسى قايراتكەرلەرى, مەملەكەتتىك قىزمەتشىلەر, ەكونوميكانىڭ ءتۇرلى سالاسىنىڭ وكىلدەرى, جۇمىسشىلار مەن اۋىل ەڭبەككەرلەرى بار.
ءىىى دارەجەلى «بارىس» وردەنى قازاقستان-امەريكا ەركىن ۋنيۆەرسيتەتىنىڭ پرەزيدەنتى ەرەجەپ مامبەتقازيەۆكە, قازاقستان جازۋشىلار وداعىنىڭ باسقارما توراعاسى نۇرلان ورازالينگە بەرىلدى. قازاقستان حالقى اسسامبلەياسى توراعاسىنىڭ ورىنباسارى دارحان مىڭباي, استانا اكىمىنىڭ ورىنباسارى ەرمەك امانشاەۆ, پرەزيدەنت اكىمشىلىگىنىڭ مەملەكەتتىك ينسپەكتورى جايساڭ احمەتوۆ, ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ اكتريساسى روزا اشىربەكوۆا, پرەزيدەنت اكىمشىلىگىنىڭ مەملەكەتتىك ينسپەكتورى قالدىبەك بايىمبەتوۆ, ش. ايمانوۆ اتىنداعى «قازاقفيلم» اق كينورەجيسسەرى بولات قالىمبەتوۆ «پاراسات» وردەنىن يەلەندى.
«قۇرمەت» وردەنىمەن قىزىلوردا وبلىسى اكىمىنىڭ كەڭەسشىسى ەرجان ءابدراحمانوۆ, پرەزيدەنت پروتوكولىنىىڭ باستىعى ءمادي اتامقۇلوۆ ناگرادتالدى. ءىىى دارەجەلى «ەڭبەك داڭقى» وردەنى جاڭاوزەن قالاسىنداعى «وزەنمۇنايگاز» اق-تىڭ اعا شەبەرى قوراباي جاڭاباەۆقا, سولتۇستىك قازاقستان وبلىسى شال اقىن اۋدانىنداعى «اگروسەۆەر» جشس مەحانيزاتورى ۆلاديمير شۋلتسكە تاپسىرىلدى.
بۇدان بولەك «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىمەن ۇلتتىق ۇلاننىڭ 5573 اسكەري ءبولىمى ءان جانە بي ءانسامبلىنىڭ مۋزىكانتى مارجان اراپباەۆا, ەكسپو-2017 حالىقارالىق كورمەسىنىڭ كوميسسارى ءراپىل جوشىباەۆ, ءانشى جۇبانىش توقسانباەۆ ماراپاتتالدى.
سونىمەن قاتار مەملەكەتتىك حاتشى بىرقاتار ازاماتتارعا ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىقتى تابىستادى. ءراسىم سوڭىندا گ.ابدىقالىقوۆا قاتىسۋشىلاردى الدا كەلە جاتقان تاۋەلسىزدىك كۇنىمەن قۇتتىقتاپ, مىقتى دەنساۋلىق, وتباسىلارىنا باق-بەرەكە جانە زور تابىس تىلەدى.
اباي اسانكەلدى ۇلى,
«ەگەمەن قازاقستان»
