سەنات توراعاسى قاسىم-جومارت توقاەۆ مەملەكەت باسشىسى ن.نازارباەۆتىڭ ءبىزدىڭ ەڭ باستى بايلىعىمىز – تاۋەلسىزدىك ەكەنىن ايتقان ءسوزىن ەسكە سالدى.
پارلامەنت جوعارعى پالاتاسىنىڭ باسشىسى «قازاقستان رەسپۋبليكاسى پرەزيدەنتىنىڭ كورەگەن ساياساتىنىڭ ارقاسىندا ەلىمىز تاۋەلسىزدىك جىلدارى نەبىر سىن-قاتەرلەردەن سۇرىنبەي ءوتىپ, تالاي بەلەستەر مەن بيىكتەردى ەڭسەردى. بىرلىگى جاراسقان, الەم تانىعان ەلگە اينالدىق. ماڭگىلىك ەل بولۋدى باعدار ەتكەن قۋاتتى مەملەكەتتى قالىپتاستىردىق», دەپ اتاپ ءوتتى.
سەنات باسشىسى دەپۋتاتتار مەن پالاتا اپپاراتىنىڭ قىزمەتكەرلەرىنە ەلباسىنىڭ كەشەندى باعدارلامالارىن, ەل ەگەمەندىگى مەن مەملەكەتىمىزدىڭ قارقىندى دامۋىن زاڭنامالىق تۇرعىدا قامتاماسىز ەتكەنى ءۇشىن العىس ءبىلدىرىپ, بىرقاتار ازاماتتارعا مەملەكەتتىك جانە قوعامدىق قىزمەتتە سىڭىرگەن ەڭبەگى, الەۋمەتتىك-ەكونوميكالىق جانە مادەني دامۋىنا قوسقان ۇلەسى, حالىقتار اراسىنداعى دوستىق جانە ىنتىماقتاستىقتى نىعايتقانى ءۇشىن ناگرادالار تابىس ەتتى. اتاپ ايتقاندا, سەناتور سەرىك بەكتۇرعانوۆ, بەكمىرزا ەلامانوۆ, سەرگەي پلوتنيكوۆ «پاراسات» وردەنىمەن, مۇراتباي جولداسباەۆ II دارەجەلى «دوستىق» وردەنىمەن, نۇرلان قىلىشباەۆ «قۇرمەت» وردەنىمەن, سەناتور داريعا نازارباەۆا تمد پارلامەنتارالىق اسسامبلەياسىنىڭ شەشىمىمەن «سودرۋجەستۆو» وردەنىمەن, راشيت اكىموۆ, مۇرات باقتيار ۇلى, بەكمىرزا ەلامانوۆ, دۋلات قۇسداۋلەتوۆ, ولگا پەرەپەچينا, مارات تاعىموۆ تمد پارلامەنتارالىق اسسامبلەياسىنىڭ «پارلامەنتارالىق ىنتىماقتاستىقتى نىعايتقانى ءۇشىن» مەدالىمەن ماراپاتتالدى.
قاجىرلى قىزمەتى ءۇشىن دەپۋتاتتار ءالي بەكتاەۆ, سەرىك بەكتۇرعانوۆ, مۇراتباي جولداسباەۆ, دارحان كالەتاەۆ, گەورگي كيم, نۇرلان قىلىشباەۆقا تمد پارلامەنتارالىق اسسامبلەياسىنىڭ قۇرمەت گراموتاسى تابىس ەتىلدى.
پارلامەنت سەناتى اپپاراتىنىڭ بىرقاتار قىزمەتكەرلەرىنە دە ماراپاتتار تابىس ەتىلدى.
