سالتاناتتى شارادا ەلباسى الدىمەن قازاقستان حالقىن ۇلى مەرەكەمەن قۇتتىقتاپ, ودان ءارى ەگەمەن ەل رەتىندە دامىعان جىلدارىمىزداعى ايرىقشا جەتىستىكتەرىمىزدى اتاپ ءوتتى.
«ەگەمەندىككە يە بولعان سوڭ ءبىز مىقتى ءارى وركەندەۋ جولىنا تۇسكەن قازاقستاندى قۇرۋعا كىرىستىك. وسى جىلدار ىشىندە ەلىمىز كوپتەگەن ەلەۋلى جەتىستىكتەر مەن جەڭىستەرگە قول جەتكىزدى. اۋقىمدى جاڭعىرۋ ۇدەرىسى اياسىندا ازاماتتارىمىزعا جوعارى الەۋمەتتىك كەپىلدىك بەرىپ, ءال-اۋقاتىنىڭ ارتۋىن قامتاماسىز ەتتىك. ءبىز قازاقستاننىڭ حالىقارالىق بەدەلىن نىعايتىپ, جاھاندىق دەڭگەيدەگى اۋقىمدى ءىس-شارالاردى لايىقتى وتكىزدىك», دەدى پرەزيدەنت. سونداي-اق ەلىمىزدىڭ جەتىستىكتەرى مەن ينستيتۋتتىق رەفورمالاردى ىسكە اسىرۋداعى ءاربىر قازاقستاندىقتىڭ ءرولى مەن كۇش-جىگەرى جونىندە ايتتى.
«بۇگىن ءبىز وتانىمىزدىڭ دامۋىنا ءوز ۇلەسىن قوسىپ, ەڭبەك سىڭىرگەن ازاماتتارىمىزدى ناگرادالارمەن جانە سىيلىقتارمەن ماراپاتتايمىز. بيىل «قازاقستاننىڭ ەڭبەك ەرى» اتاعى احمەتجان ەسىموۆكە بەرىلدى. ول مەنىڭ سەنىمدى سەرىكتەرىمنىڭ ءبىرى رەتىندە تاۋەلسىز قازاقستاننىڭ ىرگەسىن قالاۋعا زور ۇلەس قوستى», دەدى مەملەكەت باسشىسى.
بۇدان ءارى ەلباسى «قازاقستاننىڭ ەڭبەك ەرى» اتاعىمەن ماراپاتتالعان ينجەنەر رۋسلان قۋاتوۆتىڭ سىڭىرگەن ەڭبەگىن اتاپ ءوتتى. «جوعارى بىلىكتى ينجەنەر رەتىندە ول مۇناي ءوندىرۋ ءىسىن تەحنولوگيالىق تيىمدىلىگى تۇرعىسىنان قامتاماسىز ەتۋگە زور ۇلەس قوستى. ەلىمىزدىڭ مۇناي-گاز سالاسىنداعى حالىقارالىق سەرىكتەستىك رەتىندە دامۋىنا اتسالىستى. وسىنداي كاسىبي مامانداردىڭ ەڭبەگىنىڭ ارقاسىندا مەملەكەتىمىزدىڭ يندۋستريالىق الەۋەتى ارتىپ, ەنەرگەتيكالىق ەگەمەندىگى نىعايا تۇسۋدە», دەدى نۇرسۇلتان نازارباەۆ.
سونداي-اق مەملەكەت باسشىسى «قازاقستاننىڭ ەڭبەك ەرى» اتاعىمەن داڭقتى بالۋان, وليمپيا ويىندارىنىڭ چەمپيونى جاقسىلىق ۇشكەمپىروۆتى ماراپاتتادى. «بۇگىندە جاقسىلىق ۇشكەمپىروۆ اۋىل شارۋاشىلىعىن دامىتۋمەن اينالىسىپ, اۋىلدى وركەندەتۋگە زور ۇلەس قوسۋدا. ول ءوز قاراجاتىنا سپورت كەشەنىن, بالاباقشالار, جاس وتباسىلارعا ارنالعان ۇيلەر سالىپ, اۋىلداستارىنىڭ قۇرمەتى مەن ريزاشىلىعىنا بولەندى», دەدى پرەزيدەنت.
نۇرسۇلتان نازارباەۆ «وتان» وردەنىمەن ماراپاتتالعان امانعوس تولەۋوۆتىڭ اۋىل شارۋاشىلىعىن دامىتۋداعى ءرولىن جانە ءىىى دارەجەلى «بارىس» وردەنىمەن ماراپاتتالعان انەس سارايدىڭ شىعارماشىلىق ەڭبەگىن اتاپ ءوتتى.
ءىىى دارەجەلى «ەڭبەك داڭقى» وردەنىن يگور اناتولەۆيچ كيتاەۆقا, «قازاقستاننىڭ ەڭبەك سىڭىرگەن قايراتكەرى» اتاعىن ەلتاڭبامىزدىڭ اۆتورى جانداربەك مالىبەك ۇلىنا جانە «استانا بالەت» تەاترى» جشس باس بالەتمەيستەرى م.ابۋباحريەۆاعا تابىستادى.
قازاقستان پرەزيدەنتى سونىمەن قاتار ءورت كەزىندە ءوز ومىرىنە قاۋىپ تونگەنىنە قاراماستان ءۇش ادامدى, سونىڭ ىشىندە كىشكەنتاي بالانى ولىمنەن قۇتقارىپ قالعان رۋسلان بازارباەۆتىڭ ەرلىگىن دە ەرەكشە اتاپ ءوتتى.
«بۇگىن ءبىز ءوز ءىسىنىڭ بىلىكتى ماماندارى, وتانىمىزدىڭ ناعىز پاتريوتتارى بولىپ سانالاتىن قازاقستاندىقتارعا قۇرمەت كورسەتەمىز. مەملەكەتتىك ناگرادالارعا مادەنيەت پەن ونەر, ءبىلىم بەرۋ مەن دەنساۋلىق ساقتاۋ ءىسىنىڭ قايراتكەرلەرى, بيزنەس پەن ءوندىرىس سالاسىنىڭ وكىلدەرى, اسكەري قىزمەتشىلەر مەن قۇقىق قورعاۋ ورگاندارىنىڭ قىزمەتكەرلەرى, سوعىس جانە ەڭبەك ارداگەرلەرى, سپورتشىلار مەن مەملەكەتتىك قىزمەتشىلەر يە بولۋدا.
ءوز ىستەرىڭىزگە دەگەن ادالدىقتىڭ, ەڭبەكقورلىقتىڭ, قاجىر-قايرات پەن ەرلىكتىڭ ارقاسىندا سىزدەر ارىپتەستەرىڭىزدىڭ قۇرمەتىنە بولەنىپ, قوعامدا زور بەدەلگە يە بولدىڭىزدار», دەدى ەلباسى. ءسويتىپ, «ەرلىگى ءۇشىن» مەدالى سولتۇستىك قازاقستان وبلىسى توتەنشە جاعدايلار دەپارتامەنتىنىڭ ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ جەدەل كەزەكشىسى ر.بازارباەۆقا جانە سىبايلاس جەمقورلىققا قارسى ءىس-قيمىل ۇلتتىق بيۋروسى باسقارما باسشىسىنىڭ ورىنباسارى ا.يۋگايعا تابىستالدى.
مەملەكەت باسشىسى ەلىمىزدىڭ زياتكەرلىك-يننوۆاتسيالىق الەۋەتىنىڭ دامۋىنا نازار اۋدارىپ, بۇل ىستەگى وتاندىق عىلىم قايراتكەرلەرىنىڭ رولىنە توقتالدى. جۇرگىزىلگەن عىلىمي زەرتتەۋلەردىڭ ناتيجەسىندە قازاقستاننىڭ ەكونوميكالىق جانە الەۋمەتتىك دامۋىنىڭ تۇبەگەيلى جاڭا مودەلىن قالىپتاستىراتىن وزىق ازىرلەمەلەر جاسالىپ جاتقانىن, بيىل عىلىم مەن تەحنيكا سالاسىنداعى مەملەكەتتىك سىيلىق ەكى اۆتورلىق زەرتتەۋ مەن ەكى عىلىمي ۇجىمعا بەرىلگەنىن ايتتى. وسىلايشا, قازاقستان رەسپۋبليكاسىنىڭ ءال-فارابي اتىنداعى عىلىم مەن تەحنيكا سالاسىنداعى 2017 جىلعى مەملەكەتتىك سىيلىعىن «قازاقستاندىق ىرگەلى عىلىمدى الەمدەگى وزىق جەتىستىكتەر دەڭگەيىنە شىعارۋعا يكەمدەۋشى ناقتى عالامنىڭ قاسيەتتەرىن سيپاتتايتىن گراۆيتاتسيا تەورياسىن دامىتۋ» تاقىرىبىنداعى جۇمىسى ءۇشىن فيزيكا-ماتەماتيكا عىلىمدارىنىڭ دوكتورى, پروفەسسور ءراتباي مىرزاقۇلوۆقا, «ەرتە جانە ورتا عاسىرلارداعى قازاقستانداعى كەنتتەنۋ» تاقىرىبىنداعى جۇمىسى ءۇشىن اكادەميك كارل بايپاقوۆقا, «بولات ءوندىرىسىنىڭ باسەكەگە قابىلەتتىلىگىن ارتتىرۋدى قامتاماسىز ەتەتىن, تومەن ساپالى جانە تەحنوگەندى شيكىزاتتاردى وڭدەۋگە تارتۋ بويىنشا الەمدىك دەڭگەيدەگى تەحنولوگيالاردى ازىرلەۋ جانە ولاردى كوممەرتسيالاندىرۋ» تاقىرىبىنداعى جۇمىسى ءۇشىن تەحنيكا عىلىمدارىنىڭ كانديداتى ابىلقاسىم احمەتوۆكە, «بەلسەندى ۇزاق ءومىر ءسۇرۋدى قامتاماسىز ەتۋدىڭ عىلىمي دالەلدەنگەن ادىستەرى» تاقىرىبىنداعى جۇمىستار تسيكلى ءۇشىن مەديتسينا عىلىمدارىنىڭ دوكتورى, پروفەسسور ۆالەري بەنبەرينگە تابىس ەتتى.
ءراسىم بارىسىندا ەلىمىزدى ەكونوميكالىق, الەۋمەتتىك-گۋمانيتارلىق تۇرعىدان دامىتۋداعى ۇزدىك جەتىستىكتەرى ءۇشىن «وتان» وردەنىمەن شىعىس قازاقستان وبلىسىنىڭ اكىمى د.احمەتوۆ, اقتوبە وبلىسىنىڭ اكىمى ب.ساپارباەۆ جانە اقتوبە وبلىسىنداعى «ستەپنوە» جشس ديرەكتورى ا.تولەۋوۆ ماراپاتتالدى. ءىىى دارەجەلى «بارىس» وردەنى «كاسپي قۇبىر كونسورتسيۋمى-ق» اق باس ديرەكتورىنىڭ قازاقستان رەسپۋبليكاسى ۇكىمەتىمەن بايلانىس جونىندەگى ورىنباسارى ق.قابىلدينگە, قازاقستان پرەزيدەنتىنىڭ كومەكشىسى ن.ونجانوۆقا جانە جازۋشى ءا.سارايعا بەرىلدى.
اقپارات جانە كوممۋنيكاتسيالار ءمينيسترى د.اباەۆ, بۇرىنعى باس پروكۋرور, جوعارعى سوت توراعاسى ج.اسانوۆ, ادىلەت ءمينيسترى م.بەكەتاەۆ, ينۆەستيتسيالار جانە دامۋ ءمينيسترى ج.قاسىمبەك, «م.اۋەزوۆ اتىنداعى قازاق مەملەكەتتىك اكادەميالىق دراما تەاترى» رمقك ءارتىسى م.وتەكەشەۆا «پاراسات» وردەنىمەن ماراپاتتالدى.
«قۇرمەت» وردەنىمەن بەلگىلى عالىمدار, مادەنيەت قايراتكەرلەرى, ءوندىرىس پەن الەۋمەتتىك سالا وكىلدەرى ماراپاتتالدى. ولاردىڭ قاتارىندا «مەكتەپكە دەيىنگى شاعىن ورتالىعى بار قاستەك ورتا مەكتەبى» كمم مۇعالىمى ب.بەردىكەنوۆا, بوكسشى ق.يسلام, «پاۆلودار وبلىستىق بالالار اۋرۋحاناسى» كمك دارىگەرى ت.مۇتىشەۆ, ءبىلىم جانە عىلىم ءمينيسترى ە.ساعاديەۆ, كينواكتريسا ءا.سادۋاقاسوۆا بار.
اسكەري جانە قىزمەتتىك بورىشىن ۇلگىلى اتقارعانى, زاڭدىلىق پەن قۇقىقتىق ءتارتىپتى قامتاماسىز ەتۋ, ەلدىڭ ۇلتتىق قاۋىپسىزدىگى مەن قورعانىس قابىلەتىن نىعايتۋ كەزىندە كورسەتكەن ەرلىگى مەن قاجىرلىلىعى ءۇشىن اسكەري قىزمەتشىلەر مەن قۇقىق قورعاۋ ورگاندارى وكىلدەرىنىڭ ءبىر توبى ءىى دارەجەلى «داڭق» وردەنىمەن, ءىى جانە ءىىى دارەجەلى «ايبىن» وردەندەرىمەن, «ەرلىگى ءۇشىن» جانە «جاۋىنگەرلىك ەرلىگى ءۇشىن» مەدالدارىمەن ماراپاتتالدى.
ءىى دارەجەلى «داڭق» وردەنىنە اۋماقتىق قورعانىس باس باسقارماسىنىڭ باستىعى – قازاقستان رەسپۋبليكاسى قارۋلى كۇشتەرى اۋماقتىق اسكەرلەرىنىڭ باستىعى س.قامالەتدينوۆ جانە ۇلتتىق ۇلان «وڭتۇستىك» وڭىرلىك قولباسشىلىعى قولباسشىسىنىڭ ءبىرىنشى ورىنباسارى – شتاب باستىعى ا.كاسكەلەنوۆ يە بولدى.
ءىى دارەجەلى «ايبىن» وردەنى قورعانىس مينيسترلىگى اسكەري ءبولىمىنىڭ كومانديرى ج.ەرمۇحانوۆقا جانە ۇلتتىق قاۋىپسىزدىك كوميتەتىنىڭ تەرروريزمگە قارسى قىزمەتى تەرروريزمگە قارسى ورتالىعىنىڭ شتاب باستىعى ج.سايپولداەۆقا تابىس ەتىلدى.
ءىىى دارەجەلى «ايبىن» وردەنىمەن مەملەكەتتىك كۇزەت قىزمەتىنىڭ پرەزيدەنتتىك «ايبىن» پولكى اسكەري ءبولىمىنىڭ بولىمشە كومانديرى ە.جاقاەۆ ماراپاتتالدى.
دينارا بىتىك,
«ەگەمەن قازاقستان»
