بۇگىن استانا قالاسىنىڭ پروكۋراتۋراسىندا «جاسوسپىرىمدەر اراسىنداعى قىلمىستىڭ الدىن الۋىن جاڭارتۋ» الەۋمەتتىك جوباسىنىڭ العاشقى كەزەڭىنىڭ قورىتىندىلارى شىعارىلدى.
اتالمىش جوبانى قالا پروكۋراتۋراسى استانا اكىمدىگىمەن, ءىىد-مەن, قر باس پروكۋراتۋراسى جانىنداعى قۇقىق قورعاۋ ورگاندارىنىڭ اكادەمياسىمەن بىرلەسىپ اعىمداعى جىلدىڭ تامىز ايىنان جۇزەگە اسىرا باستاعان. ول جاسوسپىرىمدەر اراسىنداعى قىلمىستىلىقتىڭ تەرىس ءۇردىسىن توقتاتۋعا, وسكەلەڭ ۇرپاقتىڭ تولىمدى دامۋىنا, ولاردىڭ تۇلعا بولىپ قالىپتاسۋىنا ىقپال ەتۋگە باعىتتالعان.
جوباعا سايكەس قۇقىقبۇزۋشىلىقتاردىڭ الدىن الۋ ىسىنە جاسوسپىرىمدەردىڭ وزدەرى ارالاسادى. دالىرەك ايتقاندا, ەنگىزىلگەن «بيوينفورماتيكا جانە سينەرگەتيكا» تەحنولوگياسىنىڭ ارقاسىندا بالالار ءتارتىپتىڭ شەگىنەن شىقپاي, ەرەسەكتەردىڭ كومەگى ارقىلى قويىلعان ماقساتتارعا قول جەتكىزۋ مۇمكىندىگىن الدى.
استانا قالاسى پروكۋرورىنىڭ اعا كومەكشىسى دانا مۇلاقوۆانىڭ مالىمەتىنشە, «جاسوسپىرىمدەر اراسىنداعى قىلمىستىڭ الدىن الۋىن جاڭارتۋ» الەۋمەتتىك جوباسى 50 مىڭنان استام جاس ازاماتتى قامتىعان.
«2016 جىلدىڭ 11 ايىنىڭ قورىتىندىلارىنا سايكەس, يۋۆەنالدى پوليتسيانىڭ ەسەبەىندە 287 كامەلەتكە تولماعان ازامات تۇرسا, بيىل بۇل كورسەتكىش 213-كە دەيىن تومەندەگەن. ناقتىراق ايتقاندا, كورسەتكىش 25 پايىزعا تومەندەپ وتىر», - دەدى قالا پروكۋرورىنىڭ اعا كومەكشىسى.
ايتا كەتەيىك, «جاسوسپىرىمدەر اراسىنداعى قىلمىستىڭ الدىن الۋىن جاڭارتۋ» الەۋمەتتىك جوباسى 2018 جىلدىڭ سوڭىنا دەيىن جۇزەگە اسىرىلاتىن بولادى.
