– ەلباسىمىز ن.نازارباەۆتىڭ «بولاشاققا باعدار: رۋحاني جاڭعىرۋ» ماقالاسىنداعى مىندەتتەردى ورىنداۋ ماقساتىندا «مەنىڭ مەكتەبىم» جوباسى اياسىنداعى روبوت-تەحنيكا پانىنە كەرەكتى قۇرال-جابدىقتاردى د.سەرىكباەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىنىڭ ۇستازدارى سىيلادى. ءبىز وسى وقۋ ورنىنىڭ رەكتورى جاسۇلان شايماردانوۆقا, قامقورلىق قولىن سوزعان پرورەكتور ساۋلە راحمەتۋلليناعا العىس ايتامىز. بۇل اۋداندا تۇڭعىش ورناتىلعان عىلىمي جوبا بولعاندىقتان جاۋاپكەرشىلىك مول. بۇگىنگى تاڭدا ادام كۇشىن ۇنەمدەپ, ارنايى باعدارلامالىق جۇيە ارقىلى جۇمىس جاسايتىن روبوتتار ەلىمىزدىڭ مەكتەپتەرىندە قولدانىلا باستادى. مەكتەپ وقۋشىلارى اراسىندا عىلىمي جوبالارعا قاتىسىپ, حالىقارالىق, رەسپۋبليكالىق بايقاۋلاردا جۇلدە الىپ جۇرگەن تالاپتى جاستار بارشىلىق. بيىل «ۇزدىك شىعارماشىلىق توپ» بايقاۋىندا باس جۇلدەنى, «ۇزدىك پەداگوگ» بايقاۋىندا قازاق ءتىلى مەن ادەبيەتى ءپانىنىڭ مۇعالىمى ج.دۇبەرباەۆا باس جۇلدەنى جەڭىپ السا, اۋداندىق «جىل سىنىپ جەتەكشىسى» بايقاۋىندا باستاۋىش سىنىپ مۇعالىمى گ.بايمۋرزينا ۇزدىك دەپ تانىلدى. سونداي-اق تمد ەلدەرىنىڭ كوماندالارى قاتىسقان سايىستا ءبىزدىڭ وقۋشىلار ەكىنشى ورىندى يەلەندى. قىتايدىڭ بەيجىڭ قالاسىندا وتكەن ونەر سايىسىندا نۇربەك نازەركە باس جۇلدەنى الىپ, ابىرويىمىزدى اسقاقتاتتى, – دەدى روبوت-تەحنيكا سىنىبىنا جەتەكشىلىك جاساپ جۇرگەن, مەكتەپ ديرەكتورىنىڭ ادىستەمەلىك-يننوۆاتسيالىق ىستەر جونىندەگى ورىنباسارى, ءبىلىم بەرۋ سالاسىنىڭ ۇزدىگى باقىت كامەشوۆا.
وسى ورايدا شاكىرتتەردىڭ شىعارماشىلىق ىزدەنىستە تابىسقا جەتۋىنە زور ۇلەس قوسىپ كەلە جاتقان ءبىر توپ ۇستازداردىڭ ەسىمىن اتاپ وتكەن ورىندى بولار. مەكتەپ ديرەكتورى قابدىسادىق بايسينوۆ ۇزاق جىلدار اۋدان اكىمىنىڭ ورىنباسارى, ەكى مارتە اۋداندىق ءماسليحاتتىڭ حاتشىسى قىزمەتىن ابىرويمەن اتقاردى. قازىر دە ۇستازداردى ورتاق تابىسقا ىسكەرلىكپەن جۇمىلدىرۋدا. مەكتەپ ديرەكتورىنىڭ ورىنباسارلارى باقىت كامەشوۆا مەن ەركىن قادىروۆ ء«بىلىم بەرۋ سالاسىنىڭ ۇزدىگى» اتاعىنا يە بولدى.
ءۇرجار اۋدانىنىڭ اكىمى سەرىك ءزاينۋلديننىڭ ايتۋىنشا, الداعى ۋاقىتتا دا ءبىلىم وشاقتارى زاماناۋي روبوت-تەحنيكامەن قامتاماسىز ەتىلمەك.
وڭداسىن ەلۋباي, جۋرناليست
شىعىس قازاقستان وبلىسى,
ءۇرجار اۋدانى
سۋرەتتە: روبوت-تەحنيكا سىنىبىندا
سۋرەتتى تۇسىرگەن اۆتور
ۇيرەنگەنىمىز دە, ۇيرەنەرىمىز دە كوپ
ەلىمىزدە ءبىلىم بەرۋدىڭ مازمۇنى جاڭارىپ, وعان جاڭاشا كوزقاراس قالىپتاسا باستادى. ۇستازعا قويىلاتىن تالاپ تا جىل وتكەن سايىن ارتا ءتۇسىپ, وقىتۋدىڭ ءادىس-تاسىلدەرىن, ونى ءتيىمدى قولدانا ءبىلۋ, ۇيرەتۋ مىندەتى جۇكتەلۋدە.
ححI عاسىر – ءبىلىم مەن وقۋدىڭ عاسىرى. سوندىقتان دا مۇعالىمدەر قاۋىمىنان, ونىڭ ىشىندە ءتىل ماماندارىنان جاڭا پەداگوگيكالىق ءادىس-تاسىلدەردى قولدانۋ ارقىلى ساپالى ءبىلىم بەرىپ, ءتىل مارتەبەسىن كوتەرۋ تالاپ ەتىلەدى. وسىعان وراي بۇگىنگى كۇن تالابىنا سايكەس بارلىق ءپان مۇعالىمدەرىنە ورتا ءبىلىم بەرۋ مازمۇنىن جاڭارتۋ مازمۇنى بويىنشا بىلىكتىلىكتى ارتتىرۋ كۋرسى جۇرگىزىلۋدە.
جاڭارتىلعان باعدارلامانىڭ باستى ماقساتى – قازاق ءتىلى ءپانى بويىنشا ءبىلىم بەرۋ باعدارلاماسىن جاڭارتۋ جانە كريتەريلى باعالاۋ جۇيەسىن ەنگىزۋ تۇرعىسىنان مۇعالىمدەردىڭ شەبەرلىگىن شىڭداۋ. وقۋشىنىڭ ءوز بەتىمەن بىلىمگە يە بولۋى ماقساتىندا ونىڭ بەلسەندى ءىس-ارەكەتىن ۇيىمداستىرۋدا مۇعالىمدەر جاڭارتىلعان ءبىلىم بەرۋ باعدارلاماسىنىڭ مازمۇنىن, قۇرىلىمىن بىلۋمەن قاتار, وقۋ ماتەريالدارىن قولدانۋدى مەڭگەرۋدە. كريتەريلى باعالاۋ جۇيەسىن ەنگىزۋ جانە وقىتۋدىڭ ءادىس-تاسىلدەرىن قولدانۋ ارقىلى ءبىلىم الۋشىلاردىڭ توپپەن, جەكە جانە جۇپتاسىپ جۇمىس جاساۋى ءتيىمدى ەكەنىنە ساباق بارىسىندا كوز جەتكىزدىك. جاڭارتىلعان ءبىلىم بەرۋ باعدارلاماسىنىڭ ەرەكشەلىگى – سپيرالدى قاعيداتپەن بەرىلۋى. باعدارلاما وقۋشىنىڭ ءتورت تىلدىك داعدىسىن, ياعني تىڭدالىم, ايتىلىم, وقىلىم, جازىلىمدى جەتىلدىرۋگە ارنالعان. بۇل ءتورت داعدى ءبىر-بىرىمەن تىعىز بايلانىستى, سىنىپ وسكەن سايىن تىلدىك ماقسات تا كۇردەلەنە تۇسەتىنى ءسوزسىز. قورىتا ايتقاندا, وقۋشى ءوزىنىڭ مەكتەپ قابىرعاسىندا العان ءبىلىمىن ومىردە قاجەتىنە اسىرا الۋى كەرەك. ۇيرەنگەنىمىز دە, ۇيرەنەرىمىز دە كوپ.
جاڭاشا ىزدەنىس, جاڭا كوزقاراس جالعاسىن تاۋىپ, ەل ەرتەڭى – كەلەشەك ۇرپاقتىڭ ءبىلىم الۋداعى جەتىستىككە جەتۋ جولىندا ناتيجەلى ەڭبەك ەتە بەرەتىنىمىزگە سەنىمدىمىن.
الماگۇل نۇرمۇحانبەتوۆا
قوستاناي وبلىسى,
امانگەلدى اۋدانى
