دەپارتامەنت توراعاسى ورىنباسارىنىڭ ءمالىم ەتۋىنشە, قازىرگى تاڭدا مەملەكەتتىك قىزمەتكەرلەردىڭ شتاتتىق سانى – 5939, ال قىزمەتتىك لاۋازىمدا وتىرعاندار – 5436 ادام. وتكەن جىلمەن سالىستىرعاندا قىزمەتتىك لاۋازىمدارعا ورنالاستىرۋدا ءوسىم بايقالىپ, 89 پايىزعا جەتىپتى. مەملەكەتتىك قىزمەتكەرلەردىڭ ورتاشا جاسى 39 بولسا, ال 2000 جىلى ول 41 جاستى قۇراعان. بۇگىنگى تاڭدا مەملەكەتتىك قىزمەتتە جۇرگەندەردىڭ 88,5 پايىزى جوعارى ءبىلىمدى. 2000 جىلدارى جوعارى بىلىمدىلەردىڭ قاتارى 62 پايىزدان اسپاعانى تاعى بەلگىلى. بۇل ءوز كەزەگىندە مەملەكەتتىك قىزمەتشىلەردىڭ ساپالىق دەڭگەيىنىڭ ءوسىپ كەلە جاتقاندىعىنىڭ كورسەتكىشى, دەيدى رايحان عازيزقىزى. ونىڭ ايتۋىنشا, مەملەكەتتىك قىزمەتكەرلەردىڭ ورتاشا ەڭبەك ءوتىلى 10 جىلدى قۇراسا, لاۋازىمدا جۇمىس ىستەۋ ءوتىلى 3,4 جىل. 2000 جىل بۇل كورسەتكىش 8 جىل دەڭگەيىندە قالىپتاسىپتى. ءسوز رەتى كەلگەندە مەملەكەتتىك قىزمەتشىلەردىڭ 64 پايىزى (3451 ادام) ايەلدەر ەكەندىگىن دە ايتا كەتكەن ورىندى.
«100 ناقتى قادام» ۇلت جوسپارىنىڭ «كاسىبي مەملەكەتتىك اپپارات قۇرۋ» باعىتى بويىنشا اتقارىلعان جۇمىستارعا كەڭىنەن توقتالعان ر.براتاەۆا تومەنگى لاۋازىمدارعا كانديداتتاردى ىرىكتەۋدە وڭتايلى جاعدايدىڭ قالىپتاسقانىن جەتكىزدى. سونىڭ ناتيجەسىندە وتكەن جىلدارمەن سالىستىرعاندا جاستاردىڭ قاتارى ارتا باستاعان (2015 جىلى – 23 پايىز, ال 2017 جىلى 25 پايىزدى قۇراپتى). ۇستىمىزدەگى جىلدىڭ 9 ايىندا وتكىزىلگەن كونكۋرستا 688 ادام مەملەكەتتىك قىزمەتكە ورنالاستىرىلسا, ال تومەنگى لاۋازىمدارعا 360 ادام قابىلدانعان.
بيىل جۇرگىزىلگەن ىشكى كونكۋرس ناتيجەسىندە 246 مەملەكەتتىك قىزمەتشى لاۋازىمدارعا تاعايىندالسا, سونىڭ جارتىسىنا جۋىعى نەمەسە 52,4 پايىزى جوعارى لاۋازىمعا جىلجىتىلىپتى.
تەستىلەۋ ەرەجەسىنە ەنگىزىلگەن وزگەرىستەردىڭ ناتيجەسىندە ودان سۇرىنبەي وتۋشىلەر قاتارى ارتا تۇسكەن. 2015 جىلى بۇل كورسەتكىش 32 پايىز دەڭگەيىندە بولسا, 2016 جىلى ول 49 پايىزعا ارتقانى كورىنىپ تۇر. بيىلعى تەست تاپسىرۋ قورىتىندىسى بويىنشا ودان وتكەندەردىڭ قاتارى 51 پايىزعا جەتكەن. ونىڭ ۇستىنە كونكۋرستىق كوميسسيا وتىرىستارىنا مىندەتتەلگەن بايقاۋشىلاردىڭ قاتىسۋى پىكىرلەسۋ پروتسەسىنە وڭ اسەر ەتپەي قويمادى جانە دە قاتىسۋشىلاردىڭ جاۋاپكەرشىلىگىن ارتتىردى, دەيدى دەپارتامەنت توراعاسىنىڭ ورىنباسارى.
جاس ماماننىڭ مىندەتتى سىناق مەرزىمىنەن ءوتۋى جونىندەگى نورما دا ءوزىن اقتاعاندىعىمەن بولىسكەن ر.براتاەۆا جاڭادان مەملەكەتتىك قىزمەتكە كەلىپ جاتقان جاس مامانعا تالىمگەردىڭ بەكىتىلىپ بەرىلۋى ونىڭ ۇجىمعا تەز ءسىڭىسىپ كەتۋىنە جانە جۇمىسقا دەگەن ىڭتاسىنىڭ ويانۋىنا وڭ ىقپال ەتەتىندىگىن ورتاعا سالدى. بيىلعى جىلدىڭ 9 ايىندا 385 مەملەكەتتىك قىزمەتشىگە سىناق مەرزىمى بەلگىلەنسە, سونىڭ 265-ءى ودان سۇرىنبەي ءوتىپتى. ال قالعان 19-ى ءالى ءوتۋ كەزەڭىندە جۇرگەن كورىنەدى.
«100 ناقتى قادام» ۇلت جوسپارىنىڭ 10-قادامىن جۇزەگە اسىرۋ بارىسىندا 2016 جىلدىڭ 1 قاڭتارىنان باستاپ جاڭادان قابىلدانعان «قازاقستان رەسپۋبليكاسىنداعى مەملەكەتتىك قىزمەت تۋرالى» زاڭىنا سايكەس بارلىق مەملەكەتتىك ورگاندار قىزمەتكەرلەرى تەست تاپسىرا باستاعان. ۇستىمىزدەگى جىلدىڭ 9 ايىندا ءبىرىنشى رەت قۇقىق قورعاۋ سالاسىنا قىزمەتكە كەلۋشىلەردىڭ 639 نەمەسە 43 پايىزى تەستىلەۋدەن وتكەنى ءمالىم بولىپ وتىر. جالپى, وڭىردە 3887 مەملەكەتتىك قىزمەتكەر اتتەستاتتاۋدان وتسە, سولاردىڭ 91 پايىزى وزدەرىنىڭ ءتيىمدى جۇمىس ىستەپ كەلە جاتقاندىقتارىن دالەلدەپتى.
اسقار تۇراپباي ۇلى,
«ەگەمەن قازاقستان»
اقمولا وبلىسى
