مەرەيتويلىق ءىس-شارا اياسىندا «تۇران-استانا» ۋنيۆەرسيتەتى تۋريزم يندۋسترياسى كوميتەتىمەن بىرلەسە وتىرىپ «ينتەراكتيۆتى تەحنولوگيالاردى ەنگىزۋ – ءتۋريزمنىڭ تۇراقتى دامۋ فاكتورى» اتتى رەسپۋبليكالىق عىلىمي-پراكتيكالىق سەمينارىن ۇيىمداستىردى. ۇستازدار مەن ىزدەنۋشىلەر قاۋىمى باس قوسقان القالى جيىنعا تۋريزم يندۋسترياسى كوميتەتىنىڭ توراعاسى ماينيۋرا مۋرزاماديەۆا, «تۇران-استانا» ۋنيۆەرسيتەتىنىڭ رەكتورى گۇلجامال جاپاروۆا, ايماقتىق اكىمشىلىكتەردىڭ وكىلدەرى مەن تۋريستىك وپەراتورلار, سونداي-اق تۋريزم سالاسىندا ماماندار دايىندايتىن جوو وكىلدەرى, ماگيسترانتتار جانە تۋريزم كافەدراسىنىڭ پروفەسسورلىق-وقىتۋشىلىق قۇرامى قاتىستى.
«جالپى الەمدىك تۋريزمدە IT – تەحنولوگيا تاقىرىبىنىڭ وزەكتىلىگى كەزدەيسوق پايدا بولعان جوق. ويتكەنى, اقپاراتتىق تەحنولوگيا دامىعان مەملەكەتتەردىڭ قوعامدىق قارىم-قاتىناس جۇيەسىنىڭ ايقىن ەرەكشەلىكتەرىنىڭ ءبىرى بولىپ سانالاتىندىقتان, ادامزات بارلىق قىزمەت سالالارىندا وركەنيەت جەتىستىكتەرىن يگىلىككە جاراتۋدا جانە ول زور ماڭىزعا يە بولعاندىقتان قارىشتى دامۋ كەزەڭىنە اياق باستى» دەدى گ.جاپاروۆا جيىننىڭ اشىلۋ سالتاناتىندا سويلەگەن سوزىندە.
ونىڭ ايتۋىنشا, دۇنيەجۇزىندە كومپيۋتەرلىك جەلى – Internet قارقىندى دامىپ كەلە جاتقاندىعى سونشالىق, جىل سايىن ونى پايدالانۋشىلاردىڭ سانى مەن اقپاراتتىق رەسۋرستاردىڭ كولەمى ۇدايى ەسەلەنۋدە.
ال تۋريزم يندۋسترياسى كوميتەتىنىڭ توراعاسى ماينيۋرا مۋرزاماديەۆا بولسا, تەحنولوگيالىق مۇنداي جەتىستىكتەن ەلىمىزدىڭ تۋريستىك نارىعى دا قالىسپاي, ءتيىستى دەڭگەيدە دامىپ جاتقانىن ايتادى.
«تۋريزم سالاسى قازىرگى تاڭدا ءىرى اۋەكومپانيالارى مەن زاماناۋي قوناق ءۇي جەلىلەرى سىندى الىپ كومپانيالاردىڭ الەۋەتىنە تەڭەستىرىلگەن. سوندىقتان دا ءبىز ەلىمىزدەگى جوعارعى وقۋ ورىندارى دايىندايتىن سالالىق مامانداردى دايارلاۋ ىسىندە الەمدىك دەڭگەيدەگى وزىق ۇلگىلەردى نەگىزگە الۋىمىز كەرەك», دەدى ول.
ايتا كەتەيىك, وسىدان 20 جىل بۇرىن ەل استاناسىنىڭ استانا قالاسىنا كوشىرىلۋىنە بايلانىستى, 1998 جىلدىڭ مامىر ايىندا «تۇران» ۋنيۆەرسيتەتىنىڭ الماتىداعى باسشىلىعى جاڭا استانادا فيليال قۇرۋ تۋرالى شەشىم قابىلدايدى. ناتيجەسىندە, 2004 جىلى «تۇران» ۋنيۆەرسيتەتىنىڭ فيليالى تاۋەلسىز «تۇران-استانا» ۋنيۆەرسيتەتى رەتىندە اشىلعان. بۇگىندە بۇل ۋنيۆەرسيتەتتە 16 ماماندىق بويىنشا باكالاۆريات جانە 10 ماماندىق بويىنشا ماگيسترانتتار ءبىلىم الۋدا.
سونداي-اق, وقۋ ورنى سوڭعى جىلدارى كاسىپكەرلىك باعىتتان يننوۆاتسيالىق كاسىپكەرلىككە دەن قويا باستادى. بۇل تۇرعىدا ۋنيۆەرسيتەتتە ءبىلىم, عىلىم جانە قوعام سالالارىندا يننوۆاتسيالىق قىزمەتپەن اينالىساتىن قىزمەتكەرلەردى, وقىتۋشىلاردى جانە ستۋدەنتتەردىڭ ءوزىن تارتۋدا ۇلكەن جۇمىستار جۇرگىزىلۋدە.
20 جىلدىق جۇمىستا ۋنيۆەرسيتەت ناقتى ەكونوميكالىق سەكتوردا جۇمىس ىستەيتىن, مەملەكەتتىك جانە ديپلوماتيالىق قىزمەتتە, بانكتىك جانە قارجىلىق سالالارىندا, ءارتۇرلى وندىرىستەردە, كوممەرتسيالىق, زاڭدى, تۋريستىك فيرمالاردا جانە ەلىمىزدەگى سان قيلى كاسىپورىنداردا قىزمەت اتقاراتىن 10 مىڭنان استام مامان يەلەرىن دايىنداپ شىعاردى.
نۇرلىبەك دوسىباي,
«ەگەمەن قازاقستان»
