ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» ماقالاسىنداعى باسىم باعىتتار مەن مىندەتتەردى ناسيحاتتاۋ ماقساتىندا «اتىراۋ-اقپارات» مەدياحولدينگى وبلىس كولەمىندە «تۋعان جەر» ەتنومادەني جوباسىن ۇيىمداستىرعان بولاتىن. وسى ەتنومادەني ءىس-شارالار كەشەنى اياسىندا مەكتەپ وقۋشىلارى اراسىندا «عاجايىپ ولكە» اتتى وبلىستىق شىعارمالار بايقاۋى جاريالانىپ, وعان بارلىعى 314 تالاپكەر قاتىستى. بولاشاقتا ءتىلشى اتانعىسى كەلەتىن وسى تالاپكەرلەردىڭ اراسىنان 40 جەڭىمپاز انىقتالىپ, ولار مۇنايلى وڭىردە تۇڭعىش رەت وتكىزىلىپ وتىرعان ء«ورىمتال» جاس تىلشىلەر فەستيۆالىنە جولداما الدى.
ءۇش كۇنگە سوزىلعان شارادا مەدياحولدينگتىڭ ءباسپاسوز ورتالىعىندا فەستيۆالدىڭ سالتاناتتى تۇردە تۇساۋى كەسىلىپ, وعان قاتىسۋشىلار وبلىستىق «اتىراۋ» جانە «پريكاسپيسكايا كوممۋنا» گازەتتەرىنىڭ باس رەداكتورلارى يساتاي بالماعامبەتوۆ پەن ءناسىپ شالاباەۆا باستاعان جۋرناليستەرمەن كەزدەسىپ, كوكەيلەرىندە جۇرگەن كوپتەگەن ساۋالدارعا جاۋاپ الدى. باتىس وڭىرىندەگى ەڭ ءىرى مەدياحولدينگ سانالاتىن «اتىراۋ-اقپارات» سەرىكتەستىگىنىڭ تىنىس-تىرشىلىگىمەن تانىستى. سەرىكتەستىككە قاراستى ەكى وبلىستىق باسىلىمنىڭ تىرشىلىگىنە, ءباسپاسوز ورتالىعى مەن جاقىندا عانا اشىلعان مەديا مەكتەپتىڭ قىزمەتىنە كۋا بولدى.
وبلىستىق «اتىراۋ» تەلەارناسىندا قوناقتا بولىپ, ءتۇرلى باعدارلامالار دايىنداۋ جۇمىسىنا اتسالىستى.
جاس قالامگەرلەر بۇدان كەيىن تاريحى تەرەڭدە جاتقان ءبىلىم ورداسى – ح.دوسمۇحامەدوۆ اتىنداعى اتىنداعى اتىراۋ مەملەكەتتىك ۋنيۆەرسيتەتىنىڭ رەكتورى, پروفەسسور ابزال تالتەنوۆتىڭ قابىلداۋىندا بولىپ, ءبىلىم ورداسىنداعى وقۋ پروتسەسىمەن تانىستى. جوعارى وقۋ ورنىن ارالاپ, ونىڭ جەتىستىكتەرىنە كۋا بولعان وقۋشىلار بيىل عانا ءوز الدىنا جەكە كافەدرا بولىپ ءبولىنىپ شىققان «جۋرناليستيكا» كافەدراسى تۋرالى جان-جاقتى ماعلۇمات الدى.
فەستيۆال بارىسىندا ەلىمىزگە جانە وڭىرىمىزگە تانىمال جۋرناليستەر مەن قوعام قايراتكەرلەرىنىڭ شەبەرلىك سىنىپتارى مەن دارىستەرى دە جوعارى دەڭگەيدە ۇيىمداستىرىلدى. ۇزاق جىلدار بويى «قازاقستان» ۇلتتىق ارناسىندا ەڭبەك ەتكەن تانىمال تەلەجۋرناليست, «شەتەلدەگى قازاق بالالارى» جوباسىنىڭ اۆتورى ءارى پروديۋسەرى جانار بايسەمىزوۆا وتكىزگەن شەبەرلىك سىنىبى جاس ورەندەرگە ەرەكشە قانات ءبىتىردى. ال, قازاقستاننىڭ ەڭبەك سىڭىرگەن قايراتكەرى, اقىن اقۇشتاپ باقتىگەرەەۆانىڭ فەستيۆالگە ورال قالاسىنان ارنايى كەلىپ, قاتىسۋشىلارعا ءدارىس وتكىزۋى – جاستارعا ۇلكەن سىي بولدى. وبلىستىق جاس تىلشىلەر فەستيۆالى ولارعا گازەت-جۋرنال, تەلەارنا, بولاشاق تىلشىلەردى وقىتۋ جۇمىستارىمەن كەڭىنەن تانىستىرىپ قانا قويماي, وقۋشىلار مەن ولاردىڭ جەتەكشىلەرىنە مادەني-رۋحاني دەمالىس تا سىيلادى.
ءۇش كۇن بويى جاس وركەندەردىڭ قاناتتارىن قاتايتىپ, ەستەن كەتپەس ەرەكشە ساتتەر مەن دۋمانعا تولى قىزىقتاردى سىيلاعان تۇڭعىش رەت ۇيىمداستىرىلعان جاس تىلشىلەر فەستيۆالى ن.ءجانتورين اتىنداعى وبلىستىق فيلارمونيادا قورىتىندىلاندى.
– وبلىستىق جاس تىلشىلەر فەستيۆالىن ۇيىمداستىرۋداعى باستى ماقسات – جاس جەتكىنشەكتەردىڭ بويىنداعى تۋعان ەل مەن جەرگە دەگەن سۇيىسپەنشىلىكتى ارتتىرىپ, پاتريوتتىق سەزىمدەرىن جانىپ قانا قويماي, يساتاي مەن ماحامبەت تۇلپارلارىنىڭ تۇياعى دۇبىرلەتكەن اتىراۋ ايماعىنان شىققان ابىز ءابۋ, ارىستان جۇرەكتى حاميت ەرعاليەۆ, پوەزيا پاديشاسى فاريزا وڭعارسىنوۆا, جۇمباق اقىن جۇمەكەن, ۇلت ۇستازى زەينوللا قابدولوۆ سەكىلدى ۇلىلاردىڭ ءىزىن باسقان جاس وركەن تىلشىلەردى حالىققا تانىتۋ, كورىنبەي, كومىلىپ جاتقان التىننىڭ سىنىعىن تاۋىپ, بۇلاقتىڭ كوزىن اشۋ, ەلگە جارقىراتىپ كورسەتۋ, قابىلەت-قارىمىنا سايكەس جول سىلتەۋ بولاتىن. ء«ورىمتال» جاس تىلشىلەر فەستيۆالى – «اتىراۋ-اقپارات» مەدياحولدينگىنىڭ «تۋعان جەر» ەتنو-مادەني جوبالارى ىشىندەگى ەڭ ماڭىزدى شارانىڭ ءبىرى, – دەپ اتاپ ءوتتى فەستيۆالدىڭ قورىتىندى كەشىندە ءسوز العان مەدياحولدينگ ديرەكتورىنىڭ ورىنباسارى راۋان ءسابيت ۇلى.
ال, قوعام قايراتكەرى اقۇشتاپ باقتىگەرەەۆا: ء«ورىمتال» جاس تىلشىلەر فەستيۆالى وبلىستىق دەڭگەيدە وتكەنىمەن, رەسپۋبليكامىزعا تانىمال باسىلىمداردىڭ ارنايى جۇلدەلەرىنىڭ تاعايىندالعانى, ۇمىتتەرىن ۇكىلەگەن جاس ورەندەردىڭ قازاق ادەبيەتىندە, جۋرناليستيكاسىندا ايرىقشا ورىن الاتىن تۇلعالار اتىنداعى ماراپاتتارعا يە بولعانى, ارينە, ولارعا ۇلكەن قولداۋ بولدى. وسىنىڭ وزىنەن بۇل جوبانىڭ قوعام ومىرىنە, جۇرتشىلىققا تيگىزەتىن پايداسى كوپ ەكەندىگ كورىپ وتىرمىز. ەلباسىنىڭ «بولاشاققا باعدار: رۋحاني جاڭعىرۋ» ماقالاسى اياسىندا ۇيىمداستىرىلىپ وتىرعان شارا وزگە دە وڭىرلەرگە ۇلگى بولسا دەپ ويلايمىن», دەگەن تىلەگىن ارنادى.
جاس تىلشىلەر فەستيۆالىنىڭ قورىتىندىسى بويىنشا وعان قاتىسۋشىلار «ەگەمەن قازاقستان», «ايقىن», «قازاق ادەبيەتى», «قازاقستان Zaman», «قازاقستان ايەلدەرى», «پاراسات» جانە «قازاق گازەتتەرى», «جاس وركەن», «قازاق راديولارى» سەرىكتەستىكتەرىنە قاراستى باسىلىمدار مەن راديولاردىڭ ارنايى جۇلدەلەرىنە يە بولدى.
جارىق كورگەنىنە عاسىرعا جۋىقتاعان, العاش رەت ءوز وقىرماندارىنىڭ قولىنا «ۇشقىن» دەگەن اتپەن 1919 جىلعى 17 جەلتوقساندا تيگەن, سودان بەرى بۇل گازەتتە ءار جىلدارى بەرنياز كۇلەەۆ, سماعۇل سادۋاقاسوۆ, جۇسىپبەك ايماۋىتوۆ, مۇحتار اۋەزوۆ, بەيىمبەت مايلين, ساكەن سەيفۋللين, تۇرار رىسقۇلوۆ, وراز جاندوسوۆ, عابيت مۇسىرەپوۆ, شەرحان مۇرتازا, ءابىش كەكىلباەۆ سىندى ۇلتىمىزدىڭ ءبىرتۋار ازاماتتارىنىڭ قولتاڭباسى قالعان ەل گازەتى – «ەگەمەن قازاقستان» جالپىۇلتتىق رەسپۋبليكالىق گازەتى فەستيۆال جەڭىمپازدارىنا ارناپ ەكى ارنايى جۇلدەسىن تاعايىنداعان بولاتىن.
«ەگەمەن قازاقستان» گازەتىنىڭ ارنايى جۇلدەلەرىن وسى باسىلىمنىڭ اتىراۋ وبلىسىنداعى مەنشىكتى ءتىلشىسى, تانىمال اقىن باقىتگۇل باباش فەستيۆالدىڭ ەڭ جاس قاتىسۋشىسى, №34 اتىراۋ قالالىق لينگۆيستيكالىق گيمنازياسىنىڭ 6-سىنىپ وقۋشىسى ارداقتىم نيەتقاليەۆا مەن يندەر اۋدانىنداعى بوران نىسانباەۆ اتىنداعى اتىنداعى ورتا مەكتەپتىڭ 10-سىنىپ وقۋشىسى ءالي عالىموۆقا تابىس ەتتى. بارلىق جەڭىمپازدارعا ارنايى سىيلىقتار بەرىلدى.
«جانام دەگەن جۇرەككە وت بەرەمىن» دەپ اقيىق اقىن تولەگەن ايبەرگەنوۆ جىرلاعانداي, بۇل فەستيۆال بولاشاق جاس تىلشىلەرگە قانات ءبىتىرىپ, ماڭگىلىك ەستەرىندە قالاتىنى انىق.
نۇرسۇلتان مىقتىباي,
جۋرناليست
سۋرەتتەردى تۇسىرگەن ءانۋار ابىلعازيەۆ.
اتىراۋ قالاسى
