ماسەلەن, 2016 جىلى كەپىلزات جەتكىلىكسىز بولعان جاعدايدا قوردىڭ كەپىلدىگىن الۋعا مۇمكىندىك بەرەتىن قىزمەتتى اۆتوماتتاندىرۋ تۋرالى شەشىم قابىلدانعانى بەلگىلى. سودان بەرى «ەلەكتروندى ۇكىمەتتىڭ» www.egov.kz پورتالىنا 561 ءوتىنىم ءتۇسىپ, ونىڭ 493-ءى ماقۇلدانعان. قازىر قاراۋدا 68 ءوتىنىم جاتىر. وسى ۋاقىت ارالىعىندا «دامۋ» قورى 2000 كەپلدىك بەرگەن. ياعني, كەپىلدىك سۇراعان ونلاين-وتىنىمدەر ۇلەسى 25% قۇرادى.
كەپىلدىك ارقىلى قولداۋ العان نەسيە قورجىنىنىڭ سوماسى 16,2 ملرد تەڭگەنى قۇرادى. ال كەپىلدىكتىڭ قۇنى 5 ملرد تەڭگەگە جەتتى. ەكىنشى دەڭگەيلى بانكتەر اراسىندا كوش باستاپ تۇرعان «قازاقستان حالىق بانكى» اق – 147, «سبەربانك» اق ەب – 124 جانە «تسەنتركرەديت بانك» اق – 112 جوبانى قارجىلاندىرعان. بۇل جاعىنان ەڭ بەلسەندى وڭىرلەر قاتارىندا اقتوبە وبلىسى – 87, اتىراۋ – 70 جانەقوستاناي وبلىسى – 55 جوبا ۇسىنعان.
«دامۋ» قورىنىڭ كەپىلدىگى – ەلەكتروندى ۇكىمەتتىڭ پلاتفورماسىنا ەنگىزىلگەن تۇڭعىش قارجىلىق قۇرال. بۇل ارقىلى كاسىپكەرلەر بيزنەس اشۋعا, كاسىبىن دامىتۋعا كەپىلزاتى جەتپەگەن جاعدايدا مۇمكىندىك الادى. ال ونلاين-جۇيە كاسىپكەردىڭ ۋاقىتىن ۇنەمدەيدى. 180 ملن تەڭگەگە دەيىنگى نەسيەگە كەپىلدىك سۇراۋشىلارقىزمەتكە egov.kz پورتالى قول جەتكىزە الادى. ول ءۇشىن تەك پورتالعا تىركەلىپ, ءوتىنىمدى تولتىرىپ, بانكتىڭ وڭ شەشىم شىعارعان حاتىنىڭ ەلەكتروندى نۇسقاسىن قىستىرىپ, ەلەكتروندى ساندى قولىن قويۋ كەرەك. جەكە كابينەتى ارقىلى ءوتىنىم قاراۋ قاي كەزەڭدە ەكەنىن قاداعالاپ وتىرۋعا بولادى, دەپ حابارلايدى اتالمىش قوردىڭ ءباسپاسوز قىزمەتى.
2018 جىلدان باستاپ كاسىپكەرلەر «دامۋ» قورىنان سىياقى مولشەرلەمەسىن سۋبسيديالاۋ ءۇشىن دە ونلاين ءوتىنىم بەرە الاتىن بولدى.
ايناش ەسالي,
«ەگەمەن قازاقستان».
الماتى
