ەلوردانىڭ ۇشجىلدىق بيۋدجەتىن تانىستىرعان استانا قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ەرعالي ەگەمبەردىنىڭ ايتۋىنشا, ونىڭ جالپى سوماسى 997 ملرد تەڭگەنى قۇرايدى. اتالعان سومانىڭ 369 ملرد تەڭگەسى 2018 جىلى, 320 ملرد تەڭگەسى 2019 جىلى جانە 308 ملرد تەڭگەسى 2020 جىلى جۇمسالاتىن بولادى. ال 2018 جىلعا جوسپارلانعان قاراجاتتىڭ 124 ملرد تەڭگەسى الەۋمەتتىك سالاعا ارنالعان. ونىڭ 47 ملرد تەڭگەسى ءبىلىم سالاسىنا, 9,5 ملرد تەڭگەسى جۇمىسپەن قامتۋ, الەۋمەتتىك قورعاۋ ماسەلەلەرىنە جۇمسالادى. مۇنان بولەك, شامامەن 218 مىڭ ازاماتقا الەۋمەتتىك كومەك كورسەتۋگە 2,8 ملرد تەڭگە ءبولىنىپ وتىر. دەنساۋلىق ساقتاۋ سالاسىنا 30 ملرد تەڭگە قاراستىرىلعان. ال سپورت سالاسىنا بولىنەتىن قاراجات كولەمى 16,6 ملرد تەڭگە مولشەرىندە بولماق.
«ەلورداداعى قوعامدىق ءتارتىپ پەن قاۋىپسىزدىكتى قامتاماسىز ەتۋ ءۇشىن 10 ملرد تەڭگە بولىنەدى. ونىڭ 8 ملرد تەڭگەسى ءتۇرلى بولىمشەلەردىڭ قىزمەتكەرلەرىنە جالاقى تولەۋگە جانە ماتەريالدىق-تەحنيكالىق قامتاماسىز ەتۋگە جۇمسالادى. 21 ملرد تەڭگە قاراجاتتى جولاۋشىلار كولىگى باسقارماسىنا ءبولۋ كوزدەلگەن»,- دەدى ول.
ال اۆتوموبيل جولدارى باسقارماسىنا 42,6 ملرد تەڭگە جۇمسالادى. مۇنان بولەك, تابيعي رەسۋرستار جانە تابيعاتتى پايدالانۋدى رەتتەۋ باسقارماسىنا 4 ملرد, قارجى باسقارماسىنا 27 ملرد, كوممۋنالدىق شارۋاشىلىق باسقارماسىنا 21 ملرد, تۇرعىن ءۇي باسقارماسىنا 4,9 ملرد, قۇرىلىس باسقارماسىنا 37 ملرد تەڭگە بولىنەدى.
