نەبارى وتىز ءبىر جاسىندا جارىق جۇلدىزداي جارق ەتىپ, ومىردەن ەرتە وتكەن تۇلعانىڭ كەۋدە ءمۇسىنىنىڭ قوس قاپتالىنان سۋرەتتەرى مەن ماراپاتتارى, اينەك سورەدەن ول تۋرالى جازىلعان ماقالالار, ەستەلىكتەر مەن ءوزىنىڭ قولجازبالارى ورىن الىپتى. ەسكەرتكىش ءمۇيىستىڭ لەنتاسىن اقىن, جازۋشى الىبەك قاڭتارباەۆ پەن مارقۇمنىڭ اپكەسى باعدات ورازبايقىزى قيدى.
«ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا «الەم ءبىزدى قارا التىنمەن نەمەسە سىرتقى ساياساتتاعى ءىرى باستامالارىمىزبەن عانا ەمەس, مادەني جەتىستىكتەرىمىزبەن دە تانۋى كەرەك» دەپ جازىلعان. ەندەشە ءبىز رۇستەم ەسداۋلەتتەي دارىنىمىزدى دارىپتەپ, ۇرپاق جادىندا قالدىرۋعا ءتيىسپىز. رۇستەم باۋىرىمىزدىڭ تەاتر ونەرىنىڭ دامۋىنا قوسقان ۇلەسى زور. جاس تا بولسا باس بولا بىلگەن ونىڭ قويعان سپەكتاكلدەرى رەسپۋبليكالىق قانا ەمەس, حالىقارالىق دودالاردان دا سان مارتە جۇلدە الىپ كەلدى», – دەدى تەاتر ديرەكتورى دىنمۇحامەد ۇياباي ەسكەرتكىشتىڭ اشىلۋ سالتاناتىندا.
بۇل كۇنى جاستار تەاترىنىڭ اكتەرلەرى وبلىس ورتالىعىنداعى ونەر ورداسىنىڭ قازاق ترۋپپاسىن باسقارعان 7 جىلدا 25 قويىلىم ساحنالاعان تالانت يەسىنىڭ ولەڭدەرىن وقىدى. كەش سوڭىندا رەجيسسەردىڭ ءتول تۋىندىسى «اتىمدى ادام قويعان سوڭ...» قويىلىمى كورەرمەندەر نازارىنا ۇسىنىلدى.
ازامات قاسىم,
«ەگەمەن قازاقستان»
وسكەمەن
