وتكەن عاسىردىڭ الپىسىنشى جىلدارى قۇرىلعان الماتى قالالىق مۇعالىمدەر ءبىلىمىن جەتىلدىرۋ ينستيتۋتى بۇگىنگە دەيىن ءوزىنىڭ ورنالاسقان جەرىن بىرنەشە مارتە اۋىستىردى. ينستيتۋت ەكى رەت بالاباقشا عيماراتىندا, ودان مۋزىكالىق جانە جالپى ءبىلىم بەرەتىن مەكتەپ جانىنا اۋىسىپ, كوشپەلى كۇي كەشتى. ينستيتۋتتىڭ جەكە عيماراتىنىڭ بولماۋى ءبىلىم بەرۋ قىزمەتتەرىنىڭ مىندەتتەرىن ءوز دارەجەسىندە ىسكە اسىرۋدا ايتارلىقتاي قيىندىق تۋعىزىپ كەلگەن ەدى. ەندى كوپتەن كوكەيدە جۇرگەن ماسەلە وڭ شەشىمىن تاپتى. ءبىلىم جانە عىلىم مينيسترلىگى جانە «ورلەۋ» باۇو» اق باسقارماسىنىڭ قامقورلىعىنىڭ ارقاسىندا الماتى قالاسى بويىنشا پەداگوگيكالىق قىزمەتكەرلەردىڭ بىلىكتىلىگىن ارتتىرۋ ينستيتۋتى جەكە عيماراتقا ورنالاسىپ, ال قالا مۇعالىمدەرى ۇستاز قاۋىمىنىڭ ورتاق شاڭىراعى – «ۇستازدار ۇيىنە» قول جەتكىزىپ وتىر. قالا پەداگوگتەرى «ۇستازدار ۇيىندە» بىلىكتىلىگىن ارتتىرۋ كۋرستارىندا وقىتىلىپ, ادىستەمەلىك كومەك الا الادى. وعان قوسا ورتالىق مۇعالىمدەردىڭ تاجىريبە الماسۋ الاڭىنا اينالىپ, پەداگوگيكالىق يننوۆاتسيالاردى جۇزەگە اسىرۋىنا جول اشپاق.
– «ۇستازدار ءۇيىنىڭ» ەسىگى قالا مۇعالىمدەرى ءۇشىن ارقاشان اشىق. جاڭا عيماراتتا زاماناۋي قۇرال-جابدىقتارمەن جابدىقتالعان اۋديتوريالار, روبوت-تەحنيكا, مونتەسسوري كابينەتتەرى, بەينە جانە دىبىس جازۋ ستۋديالارى, 200 ادامعا ارنالعان سالتانات زالى بار. قازىرگى ۋاقىتتا الماتى قالاسى مۇعالىمدەرىنىڭ كاسىبي دەڭگەيىن دامىتۋ ءۇشىن بارلىق جاعداي جاسالعان. زامان تالابىنا ساي جابدىقتالعان, ەڭسەسى بيىك, مۇعالىمدەرگە ارنالعان بىلىكتىلىكتى ارتتىرۋ ۇلتتىق ورتالىعى ءبىلىم سالاسىنىڭ كەڭگە قانات جايۋىنا سەپتىگىن تيگىزىپ, ۇستاز بەدەلىن ارتتىرا تۇسۋگە قىزمەت ەتەدى. قازىرگى تاڭدا مەكتەپتەردە جاڭارتىلعان ءبىلىم باعدارلاماسى ەنگىزىلۋدە. مۇعالىم بىلىكتى بولسا, ماقسات-مىندەتتەرىن جاقسى بىلسە, شاكىرتتەر دە ناعىز بىلىكتى ازامات بولىپ قالىپتاسادى, دەيدى «ورلەۋ» باۇو» اق باسقارما ءتورايىمى گۇلناز احمەتوۆا.
سۋ جاڭا ورتالىقتىڭ اشىلۋ راسىمىمەن قاتار «ورلەۋ» بىلىكتىلىكتى ارتتىرۋ ۇلتتىق ورتالىعى» اق «Microsoft Kazakhstan» كومپانياسىمەن بىرلەسىپ, مەكتەپ مۇعالىمدەرى مەن كوللەدج وقىتۋشىلارى ءۇشىن ۇيىمداستىرعان «Smart-پەداگوگ ورلەۋ: كاسىبي تابىسقا اپارار جول» رەسپۋبليكالىق كونكۋرسىنىڭ جەڭىمپازدارىن ماراپاتتادى. بايقاۋ قورىتىندىسى بويىنشا جەڭىمپازدار مەن جۇلدەگەرلەرگە ديپلوم جانە اقشالاي سىيلىقتار, ال بارلىق قاتىسۋشىلارعا سەرتيفيكاتتار تابىس ەتىلدى.
ارمان وكتيابر,
«ەگەمەن قازاقستان»
