- يگور روگوۆ زەينەت جاسىنا جەتتى. زاڭناماعا سايكەس ول اتقارىپ وتىرعان قىزمەتىنەن بوساتىلدى. سىڭىرگەن ەڭبەگى مەن اتقارعان جەمىستى جۇمىسى ءۇشىن وعان العىس ايتامىن. كونستيتۋتسيالىق كەڭەستىڭ توراعاسى بولىپ قايرات ابدىرازاق ۇلى ءمامي تاعايىندالدى, - دەدى ەلباسى. وسىعان بايلانىستى, نۇرسۇلتان نازارباەۆ قايرات ءماميدى جوعارعى سوت توراعاسى لاۋازىمىنان بوساتۋ تۋرالى ۇسىنىس ەنگىزىپ, بۇل قىزمەتكە جاقىپ اسانوۆتىڭ كانديداتۋراسىن ۇسىندى.
- بۇل كەزدەيسوق تاڭداۋ ەمەس. ءبىز جاڭا زاڭنىڭ قابىلدانۋىنا بايلانىستى سوت-قۇقىق قورعاۋ جۇيەسىن جاڭعىرتۋدىڭ كەلەسى كەزەڭىنە قادام باستىق. سوندىقتان سوت ورگاندارىنىڭ جاڭا باسشىسى ونى ءتيىمدى ءارى جىلدام ىسكە اسىرۋدى قامتاماسىز ەتۋى كەرەك. ناتيجەسىندە قازاقستانداعى سوت تورەلىگى نەعۇرلىم دامىعان ءارى ادىلەتتى بولۋعا ءتيىس. جاقىپ اسانوۆتىڭ كانديداتۋراسى وسى جوعارى تالاپتارعا تولىق ساي كەلەدى دەپ ويلايمىن, - دەدى قازاقستان پرەزيدەنتى.
قازاقستان پرەزيدەنتى جوعارعى سوت توراعاسى لاۋازىمىنا ۇسىنىلعان كانديداتتىڭ جەكە قاسيەتتەرى مەن كاسىبي ماشىقتارىن اتاپ ءوتتى, سونداي-اق قايرات ماميگە ەلىمىزدىڭ سوت جۇيەسىن دامىتۋعا قوسقان ۇلەسى ءۇشىن العىس ايتتى. بۇدان بولەك, نۇرسۇلتان نازارباەۆ باس پروكۋرور لاۋازىمىنا قايرات قوجامجاروۆتىڭ كانديداتۋراسىن پارلامەنت سەناتىنا كەلىسۋ ءۇشىن ۇسىندى.
- ول مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىندە ۇزاق جىل جۇمىس ىستەدى. باسشىلىق قىزمەتتەگى جانە پروكۋراتۋرا ورگاندارىنداعى تاجىريبەسى مول. ونىڭ باس پروكۋرور لاۋازىمىنا اۋىسۋىنا بايلانىستى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى بولىپ اليك شپەكباەۆ تاعايىندالادى, - دەدى مەملەكەت باسشىسى.
پارلامەنت سەناتىنىڭ دەپۋتاتتارى اشىق داۋىس بەرۋ ارقىلى ق.ءماميدى جوعارعى سوت توراعاسى لاۋازىمىنان بوساتۋ جانە وسى قىزمەتكە ج.اسانوۆتى تاعايىنداۋ تۋرالى قاۋلى قابىلداپ, سونداي-اق ق.قوجامجاروۆتىڭ كانديداتۋراسىن باس پروكۋرور لاۋازىمىنا تاعايىنداۋعا كەلىسىم بەردى. سوڭىندا قازاقستان پرەزيدەنتى ەلىمىزدىڭ سوت جانە قۇقىق قورعاۋ جۇيەسىندە ساپالى ءارى ۋاقتىلى رەفورمالار جۇرگىزۋدىڭ ماڭىزدىلىعىنا تاعى دا نازار اۋداردى.
