كەزدەسۋگە قاتىسقان ءباسپاسوز ارداگەرى, كەزىندە گازەتتىڭ جەزقازعان جانە قىزىلوردا وبلىستارىنداعى مەنشىكتى ءتىلشىسى بولعان وتەگەن جاپپارحان باس باسىلىمنىڭ تاريحىنان تەرەڭ سىر شەرتتى. باس باسىلىمنىڭ ءار جىلدار بەدەرىندەگى كەلبەتى, بەت-بەينەسى تۋراسىندا, قالام ۇستاعان قايراتكەرلەردىڭ باس رەداكتورلىق مەكتەبى جايىندا كەڭىنەن تولعاپ اڭگىمەلەدى. سونداي-اق گازەتتىڭ سوڭعى ۋاقىتتاعى باعىت-باعدارى, گازەتتەگى وزگەرىستەر حاقىندا بايان ەتتى.
«ەگەمەن قازاقستان» كەيىنگى ءبىر جىل ىشىندە ۇلكەن وزگەرىستەرگە ۇشىرادى. تالدامالىق, ساراپتامالىق ماقالالارعا ءجيى ورىن بەرىلەدى. حالىقارالىق جاعدايلاردى تەرەڭىنەن قاۋزاپ جازادى. سونىڭ ىشىندە شەتەلدىك ساراپشىلاردىڭ پىكىرىن جاريالايدى. بۇل «ەگەمەننىڭ» ءوز ىشىمىزدە عانا قايناماي, الەمدىك اقپارات ايدىنىنا شىققانىنىڭ بەلگىسى. مۇنىڭ ايقىن ايعاعى رەتىندە, گازەتتە جاريالانعان ماقالالاردى ءارىسى تۇركيا, فرانتسيا, بەرىسى قىرعىزستاننىڭ بەلدى باسىلىمدارىنىڭ اۋدارىپ باسىپ جاتقانىن ايتساق تا جەتكىلىكتى», دەدى ارداگەر جۋرناليست.
№2 «مۇراگەر» مەكتەبىنىڭ ديرەكتورى زاۋرە بايماعامبەتوۆا اقپارات عاسىرىندا اعا گازەتتىڭ باستى دەرەككوز بولىپ قالا بەرەتىنىن, قازىرگى كەزدە اقپاراتتىڭ ايتۋلى قاينار بۇلاعى بولىپ وتىرعانىن جەتكىزدى. ال مەكتەپ ديرەكتورىنىڭ وقۋ ءىسى جونىندەگى ورىنباسارى ايگۇل وتكەلباەۆا ء«تالىم» بەتىندە مۇعالىمدەردىڭ پەداگوگيكالىق, مەتوديكالىق ماقالالارى ءجيى جارىق كورىپ جۇرگەنىن, وسى ارقىلى وزگە مەكتەپتەردىڭ وزىق ۇلگىلەرى وقۋ بارىسىندا پايداعا اسىپ جاتقانىن اتاپ ءوتىپ, الداعى ۋاقىتتا مەكتەپ مۇعالىمدەرى ءبىلىم سالاسىن قاۋزاۋعا اتسالىسىپ, ءوز تاجىريبەلەرىمەن بولىسۋگە نيەتتى ەكەندەرىن جەتكىزدى. سونىمەن قاتار باسىلىمنىڭ ۇلتتىق بىرىڭعاي تەستىلەۋدىڭ سۇراقتارىن جاريالاۋى وقۋشىلاردى سىناققا دايىنداۋدا ۇلكەن ءرول اتقارعانىن ايتتى. ال قازاق ءتىلى مەن ادەبيەتى ءپانىنىڭ مۇعالىمى ايگۇل شادىبەكوۆا ەلباسى ۇسىنعان «رۋحاني جاڭعىرۋ» باعدارلاماسى اياسىندا كولەمدى ماقالالار ۇسىنىپ, ۇلت رۋحانياتىنا زور ۇلەس قوسىپ جاتقانىنا باسا ءمان بەردى.
كەزدەسۋ بارىسىندا لاتىن قارپىنە ءوتۋ, ءبىلىم سالاسىنداعى جاڭا ستاندارتتار, تاربيە مەن ءتالىم, سالت-ءداستۇر, قوعامداعى باسقا دا وزەكتى تاقىرىپتار جايىندا ءسوز قوزعالىپ, قىزۋ پىكىرتالاس بولدى. مۇعالىمدەر, وزگە دە گازەت رەداكتسيالارى وقىرماندارمەن وسىنداي كەزدەسۋلەر ۇيىمداستىرسا, وسى تەكتەس پىكىر الماسۋلار ءجيى بولسا دەگەن نيەتپەن تارقاستى.
ەرجان بايتىلەس,
«ەگەمەن قازاقستان»
قىزىلوردا
