«مەملەكەتىمىزدىڭ قاۋىپسىزدىگى مەن تۇراقتىلىعىن ساقتاۋدا قوعامىمىزداعى ءدىني احۋال ۇلكەن ماڭىزعا يە. بۇل سالاعا قاتىستى سوڭعى جىلدارى الەمدە ورىن الىپ جاتقان قۇبىلىستار قوعامدىق قاتىناستار جۇيەسى مەن مەملەكەتتىك قۇرىلىمدى تۇبەگەيلى وزگەرتىپ جىبەرۋى مۇمكىن ەكەنىن كورسەتۋدە. قولدانىستاعى ء«دىني قىزمەت جانە ءدىني بىرلەستىكتەر تۋرالى» زاڭ 2011 جىلى قابىلداندى. ول مەملەكەت پەن ءدىني بىرلەستىكتەر اراسىندا ءوزارا مىندەتتەر مەن قۇقىقتاردى بەكىتتى. بۇل زاڭ ءدىن سالاسىندا جاۋاپكەرشىلىك قاتىناستاردىڭ قالىپتاسۋىندا ءوز مىندەتىن ورىندادى. دەگەنمەن, 2011 جىلدان بەرى ءدىن سالاسىندا الەمدىك دەڭگەيدەگى جاعىمسىز ۇردىستەر كۇشەيە ءتۇستى. ءبىزدىڭ ەلىمىزدە قوعامنىڭ جاعدايى مەن ونىڭ ءدىني سالاداعى سۇرانىستارى وزگەردى. ءدىنشىل ادامداردىڭ ۇلەسى ارتتى, ءدىني اۋديتورياعا شەتەلدەن ىقپال ەتۋ ەداۋىر كۇشەيدى. بۇعان اقپاراتتىق كەڭىستىكتىڭ اشىقتىعى جانە جاھاندانۋ پروتسەستەرى اسەر ەتۋدە. بۇگىندە بىزدەر ءدىني ۇيىمدارمەن بىرلەسىپ ەڭسەرەتىن بىرقاتار قاۋىپ-قاتەرلەر پايدا بولدى. سوندىقتان, دامۋىمىزدىڭ جاڭا كەزەڭىندە ءدىني قاتىناستاردى رەتتەۋدىڭ قۇقىقتىق تەتىكتەرىن جەتىلدىرۋ ۇسىنىلادى. وسى نەگىزدە ءبىز ەلىمىزدىڭ تاريحى مەن ەرەكشەلىكتەرىنە سايكەس دىنگە دەگەن وزىندىك ۇستانىم جاساۋدامىز. ول ءۇشىن مەملەكەت پەن ءدىننىڭ ءوزارا ءىس-قيمىلىنىڭ قازاقستاندىق مودەلى قالىپتاسۋدا. ونىڭ نەگىزىندە ناقتى ۇستانىم جاتىر – ول ءدىننىڭ ساياسيلانباۋى. بۇدان بولەك, دىنگە قىزىعۋشىلىق تانىتاتىن تۇرعىنداردىڭ ءدىني ساۋاتتىلىعىن كوتەرۋگە ەرەكشە ءمان بەرىلەدى. زاڭ جوباسىنىڭ يدەولوگيالىق نەگىزىن ەلباسى جارلىعىمەن بەكىتىلگەن ء«دىن سالاسىنداعى مەملەكەتتىك ساياساتتىڭ 2017-2020 جىلدارعا ارنالعان تۇجىرىمداماسى» قابىلداندى», دەدى بەرىك ارىن.
سونىمەن قاتار ول, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ جونىندەگى» زاڭ جوباسى ءدىني بىرلەستىكتەر مەن باسقا دا قوعامدىق ۇيىمداردىڭ, ساراپشىلار مەن بۇقارالىق اقپارات قۇرالدارى, شەتەلدىك ديپلوماتيالىق كورپۋس پەن ەۋروپاداعى قاۋىپسىزدىك جانە ىنتىماقتاستىق ۇيىمى, بۇۇ وكىلدەرىنىڭ قاتىسۋىمەن وتكەن كوپتەگەن وتىرىستاردا كەڭىنەن تالقىلانعانىن جەتكىزدى.
راۋان قايدار,
«ەگەمەن قازاقستان»
