ءىس-شارا ل.ن.گۋميلەۆ اتىنداعى ەۇۋ-دە ەۋرازيالىق ينتەگراتسيا ينستيتۋتى تاراپىنان ۇيىمداستىرىلدى. مونوگرافيالار ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىن ىسكە اسىرۋ تۇرعىسىنان جارىققا شىققان.
عىلىمي ەڭبەكتەر كەشەندى الەۋمەتتىك زەرتتەۋلەردىڭ ناتيجەلەرى جانە ەلىمىزدىڭ عالىمدارى مەن ساراپشىلارىنىڭ اۋقىمدى تالداۋلارىنا سۇيەنە وتىرىپ جاسالعان. ماسەلەن, مونوگرافيالاردا قازاقستاندىقتاردىڭ الەۋمەتتىك كوڭىل كۇيى مەن حالىقتىڭ مەملەكەتتىك ورگان قىزمەتىنە سەنىمىنىڭ دەڭگەيى سەكىلدى بىرقاتار تاقىرىپتار قامتىلعان.
جيىندا ءسوز سويلەگەن ەۋرازيالىق ينتەگراتسيا ينستيتۋتىنىڭ ديرەكتورى عاني نىعمەتوۆ وسى مونوگرافيالاردا مەملەكەتتىڭ كوممۋنيكاتسيالىق جانە الەۋمەتتىك ساياساتىن قوعامنىڭ قابىلداۋى تۇرعىسىنان مۇقيات جانە جان-جاقتى زەرتتەۋ جاسالعانىن جەتكىزدى. وسى ەڭبەكتىڭ ناتيجەسىندە عىلىمي قولدانىسقا «ينتەگراتسيالىق-كوممۋنيكاتسيالىق ساياسات» اتتى تەرمين ەنگىزىلىپ, ونى ءتيىمدى ىسكە اسىرۋ پراكتيكاسى كورسەتىلدى. ع.نىعمەتوۆتىڭ ايتۋىنشا, زەرتتەۋ ناتيجەلەرىنە سۇيەنىپ ناقتى ۇسىنىمدار ازىرلەۋ بارىسىندا اشىق تالقىلاۋ الاڭدارى قولدانىلعان.
ءىس-شاراعا عىلىمي-ساراپشىلىق قاۋىمداستىقتاردىڭ وكىلدەرى, مونوگرافيا اۆتورلارى مەن رەتسەنزەنتتەرى قاتىستى. مونوگرافيالاردا تىڭ دەرەكتەر, تۇجىرىمدامالىق ماسەلەلەر قامتىلعانى, ەڭبەكتەردىڭ عىلىم مەن ءبىلىم بەرۋدەگى ماڭىزى جوعارى ەكەنى اتاپ ءوتىلدى. جينالعانداردىڭ ايتۋىنشا, جۇرگىزىلگەن زەرتتەۋلەر ەلباسى ۇسىنعان اۋقىمدى وزگەرىستەردى قازاقستاندىقتاردىڭ كەڭىنەن قولداپ وتىرعانىن ايعاقتايدى. سونىمەن قاتار ۇسىنىلعان ماتەريالداردىڭ زاڭ شىعارۋ پروتسەسىن جەتىلدىرۋگە دە ۇلەس قوساتىنى ايتىلدى. مونوگرافيالاردى الداعى ۋاقىتتا 50-گە جۋىق جوعارى وقۋ ورىندارىنىڭ الەۋمەتتىك-گۋمانيتارلىق كافەدرالارى مەن قازاقستان حالقى اسسامبلەياسىنىڭ كافەدرالارىندا وقۋ-ادىستەمەلىك قۇرال رەتىندە قولدانۋ جوسپاردا بار.
شارادا ۇجىمدىق مونوگرافيالاردىڭ بىرلەسكەن اۆتورلارى مەن رەتسەنزەنتتەرى ءسوز سويلەپ, قوعامدىق سانانىڭ قۇندىلىق نەگىزدەرىن ساقتاۋعا قازاقستاندىقتاردىڭ تارتىلۋ دەڭگەيىن جۇيەلى تۇردە ولشەۋ فورماتىن جالعاستىرا بەرۋ قاجەت ەكەنىن اتاپ ءوتتى.
اباي اسانكەلدى ۇلى,
«ەگەمەن قازاقستان»
