21 جاستاعى استانالىق سپورتشىنىڭ ميىنا ەكى رەت وتا جاسالعانىمەن, ءحالى مۇشكىل. ەكى كۇنگە سوزىلعان جارىستا ول 54 كيلو سالماق بويىنشا جۇدىرىقتاسىپ, كۇمىس جۇلدەگەر اتانعان. اقتىق شايقاستا قارسىلاسىنان 15 رەت سوققى العانىن كەيىن باپكەرلەر كامەرا ارقىلى ساناپ شىققان. بىراق ولار كيكبوكسشىنىڭ ومىرىنە قاۋىپ توندىرەتىندەي قاتتى سوققى تيگەنىن جوققا شىعارىپ وتىر. ماراپاتتاۋ سالتاناتىندا ول ءوزىن بىرقالىپتى ۇستاعان. تەك ارادا ءبىر جارىم ساعات وتكەننەن كەيىن ەسىنەن تانىپ قالعان ونى اۋرۋحاناعا جەتكىزۋگە تۋرا كەلگەن.
«ازامات ءبىر ايدىڭ ىشىندە ەكى ۇلكەن سايىسقا قاتىسقان. وسىدان ءبىراز بۇرىن ۆەنگريادا وتكەن الەم چەمپيوناتىندا قولا جۇلدەگەر اتانعان. قاي جارىستا دەنساۋلىعى سىر بەرگەنىن ءدوپ باسىپ ايتۋ قيىن. قازىلار القاسى مەن سۋپەرۆايزەرلەرگە قوياتىن ەش كىنامىز جوق. ولار دۇرىس تورەلىك جاساعان», دەدى وبلىستىق دەنە شىنىقتىرۋ جانە سپورت باسقارماسىنىڭ باسشىسى رۋسلان ەسەنالين.
ءومىر ەسقالي.
«ەگەمەن قازاقستان».
سولتۇستىك قازاقستان وبلىسى.
