استانا قالاسى اكىمدىگىندە «قوعامدىق سانانى جاڭعىرتۋ – قازاقستاندىق ءپاتريوتيزمنىڭ نەگىزى» اتتى تاقىرىپپەن استانا قالاسى قازاقستان حالقى اسسامبلەياسىنىڭ XVI سەسسياسى ءوتتى.
ءىس-شاراعا قر پرەزيدەنتى اكىمشىلىگىنىڭ وكىلدەرى, دەپۋتاتتار, قازاقستان حالقى اسسامبلەياسىنىڭ مۇشەلەرى, مەملەكەتتىك ورگانداردىڭ جانە ەتنومادەني بىرلەستىكتەردىڭ وكىلدەرى قاتىستى.
كەلەر جىلى ەلوردانىڭ 20 جىلدىعىن اتاپ وتۋگە بايلانىستى اۋماقتىق ءىس-شارالار وتكىزۋ جوسپارلانعان. وسىعان بايلانىستى سەسسيا جۇمىسى بارىسىندا قازاقستان حالقى اسسامبلەياسى توراعاسىنىڭ ورىنباسارى – قر پرەزيدەنتى اكىمشىلىگى قازاقستان حالقى اسسامبلەياسى حاتشىلىعىنىڭ مەڭگەرۋشىسى د.مىڭباي ەلوردامىزداعى ەتنومادەني بىرلەستىكتەر وكىلدەرىن قالا مەرەيتويىن ۇيىمشىلدىقپەن اتاپ وتۋگە شاقىردى.
استانا قالاسى اكىمىنىڭ ورىنباسارى ەرمەك امانشاەۆ استانا قالاسى قازاقستان حالقى اسسامبلەياسىنىڭ ەڭ نەگىزگى باعىتتارىنىڭ ءبىرى – «رۋحان جاڭعىرۋ» باعدارلاماسىن جۇزەگە اسىرۋ ەكەنىن ايتىپ ءوتتى.
«باعدارلامالىق ماقالانىڭ ماقساتى – ءبارىمىز بىرگە بولاشاقتىڭ جاسامپازدىعىن ودان ءارى وركەندەتۋ ءۇشىن جۇمىلا اتسالىسۋىمىز كەرەك. ونىڭ ءبىرىنشى شارتى – قازاقستان حالقى اسسامبلەياسى قىزمەتىنىڭ باستى مىندەتىنە اينالعان ۇلتتىق كودىمىزدى جانە ۇلتتىق مادەنيەتىمىزدى ساقتاۋ پارىزىمىز», دەدى ەرمەك امانشاەۆ.
ەلوردالىق اسسامبلەيانىڭ XVI سەسسياسىن قورىتىندىلاۋ بارىسىندا قارار قابىلدانىپ, ول بويىنشا استانا قالاسى قازاقستان حالقى اسسامبلەياسىنىڭ ەلوردا دامۋىنا ايتارلىقتاي ۇلەس قوسقان ەڭبەگىنە وڭ باعا بەرىلدى.
ايتا كەتەيىك, استانادا 24 ەتنومادەني بىرلەستىك بار. ولار قازاقستان حالقى اسسامبلەياسى جۇمىس ىستەگەن 22 جىلدا قوعامدىق كەلىسىم مەن تاتۋلىقتى قامتاماسىز ەتۋدە ناتيجەلى جۇمىس ىستەپ كەلەدى.
