سوندىقتان ماجىلىستەگى حالىقتىق كوممۋنيستەر فراكتسياسى قوعامنىڭ نانعا دەگەن سولعىن كوزقاراسىن جويىپ, ونىڭ قاسيەتىنە تەرەڭ بويلاۋدى ارتتىرۋ ءۇشىن «نان كۇنىن» اتاپ ءوتۋدى ۇسىنىپ, پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى اسقار مىرزاحمەتوۆكە ۇسىنىس جاسادىق. ونداي مەرەكەلەر دامىعان ەلدەردىڭ ءبىرازىندا بار. مىسالى, يتاليا قىزاناق, نيدەرلاند قىزعالداق پەن ىرىمشىك, گەرمانيا سىرا كۇندەرىن اتاپ وتەدى. بۇل تاماق ونىمدەرى وسى ەلدەردىڭ ماقتانىشى, ءارى كوپ, ءارى جوعارى ساپادا وندىرىلەدى. سول سياقتى ءبىزدىڭ ماقتانىشىمىز – نان. قازاقستان نانمەن 100 ملن ادامدى ءبىر جىل بويى قامتاماسىز ەتە الادى. ونىڭ ساپاسى دا بىزدە ءبىرشاما جوعارى. كوپتەگەن شەتەلدەرگە بارعاندا ءوزىمىزدىڭ نانىمىزدى ساعىنىپ كەلەمىز. سوندىقتان نانعا ايرىقشا قۇرمەت رەتىندە ونىڭ كۇنىن بەلگىلەپ, حالىققا قاسيەتىن ءبىلدىرىپ وتىرعاننىڭ ارتىعى بولماس ەدى. اتالارىمىز بەن اپالارىمىز اشتىق جىلدارىندا ءبىر ءۇزىم ناندى اڭساپ, وعان جەتۋدى ارمانداپ وتكەن. قازاق حالقى دا ناندى استىڭ تورەسى دەپ ەجەلدەن توردەن ورىن بەرەدى.
«نان كۇنىن» كەڭىنەن اتاپ ءوتۋ – اس تورەسىنە دەگەن قۇرمەتتى, ونىڭ قادىرى مەن قاسيەتىن ءوسىپ كەلە جاتقان ۇرپاقتىڭ ساناسىنا ءسىڭىرۋ ءۇشىن كەرەك. قارنى تويعاندا قولىنداعى نانىن لاقتىرا سالاتىن بالدىرعاندار ونىڭ قاسيەتتى اس ەكەنىن بىلسە مۇندايدى جاساماس ەدى. سونىمەن بىرگە وسى كۇنى نان ونىمدەرىنىڭ كورمەسىن ۇيىمداستىرىپ, باۋىرساق, تابا نان, كۇلشە, بولكە, كاراۆاي, توقاشتاردىڭ ءدامىن حالىققا تاتتىرسا – ولاردىڭ ساپاسى تۋرالى حالىقتىڭ ءوزى دە اڭىز قىلىپ ايتاتىن بولادى. وسى كۇنى ناۋبايشىلار مەن تەحنولوگتارعا, نان ساپاسىن تەكسەرەتىن مەديتسينا قىزمەتكەرلەرىنە قۇرمەت كورسەتىلسە نۇر ۇستىنە نۇر. سونىمەن قاتار ديحاندار مەن ەلەۆاتور, ديىرمەن قىزمەتكەرلەرى, ماماندار ەڭبەكتەرى دە ەسكەرىلۋى كەرەك. سىرقات جاندارعا, جۇرە المايتىن ادامدارعا وسى كۇنى نان ونىمدەرى تەگىن تاراتىلسا – مەرەكە داڭقى ارتا تۇسەدى. نان ساتاتىن ءاربىر دۇڭگىرشەك, دۇكەندەر بۇل مەرەكەگە اتسالىسسا – ول جالپى حالىقتىق سيپات الار ەدى. ال قوعام قايراتكەرلەرى, ساياساتكەرلەر, جازۋشىلار, باق ءوز تاراپىنان ناننىڭ قادىرى تۋرالى حالىققا ايتىپ, مەرەكەگە ءۇن قوسسا – ەلدىڭ ەڭ ۇلكەن ونىمىنە دەگەن قۇرمەت ارتا تۇسەدى. مەكتەپتەر مەن بالاباقشالار دا ءوز حال-قادەرىنشە «نان كۇنىن» اتاپ جاتسا – جاس وسكىندەردىڭ ساناسىنا نانعا دەگەن قۇرمەت ەرتە باستان سىڭە تۇسەر ەدى.
ۆلاديسلاۆ كوسارەۆ,
ءماجىلىس دەپۋتاتى
