تاياۋدا الەۋمەتتىك جەلىلەردە جانە اقپارات قۇرالدارىندا ۇلتتىق بانك تانىستىرىلىمىن وتكىزگەن 500 تەڭگەلىك جاڭا بانكنوتقا قاتىستى قىزۋ پىكىرتالاستار ءجۇردى. وعان قاتىستى قارجىلىق رەتتەۋشى ورگان رەسمي تۇسىنىكتەمە بەرۋگە دە ءماجبۇر بولدى. جاڭا 500 تەڭگەلىكتە كەسكىندەلگەن ەلورداداعى «موسكۆا» كوممەرتسيالىق بيزنەس ورتالىعىنىڭ بۇكىل قازاقستان ءۇشىن ەش سيمۆولدىق ءمانىنىڭ جوقتىعى ءسوزسىز. بۇكىل الەمدە ۇلتتىق ۆاليۋتادا تاڭبالاناتىن بەينە سيمۆولدىق مانگە يە بولىپ تابىلادى. سوندىقتان وعان قوعام دا, ورتالىق بانكتەر دە بەيجاي قارامايدى. مۇنى دامىعان ەلدەر تاجىريبەسىنەن دە بايقاۋعا بولادى. ءتىپتى كورشى رەسەيدىڭ ءوزى بيىل اينالىمعا تۇسەتىن 200 جانە 2000 ءرۋبلدىڭ جاڭا بانكنوتتارىندا نە كەسكىندەلۋ كەرەكتىگىن بۇكىل رەسەي بويىنشا جۇرگىزىلگەن اشىق كونكۋرس پەن داۋىس بەرۋ ارقىلى تاڭداپ الدى.
سوندىقتان مۇنداي ماڭىزدى ءىستى ۇلتتىق بانك ديزاينەرلەرىنىڭ جەكە تاڭداۋىنا عانا تاستاماي, قوعامدىق تالقىعا شىعارعان ماڭىزدى. وسىعان وراي ەلباسى جاريالاعان «رۋحاني جاڭعىرۋ» ستراتەگياسى ۇلتتىق ۆاليۋتادا دا كورىنىس بەرگەنى ءجون دەپ سانايمىن. جانە بۇل تەڭگەمىزدەگى جازۋلاردى كەيىن تەك لاتىن گرافيكاسىنا كوشىرۋمەن عانا شەكتەلمەۋى قاجەت. سونىمەن قاتار ۇلتتىق ۆاليۋتادا بارشا قازاقستاندىقتار, سونداي-اق كۇللى تۇركى دۇنيەسى قاسيەت تۇتار كيەلى جەرلەر كورىنىس تاپقانى ابزال.
ولاردى الىستان ىزدەۋدىڭ نەمەسە ينتەرنەتتەن قاراۋدىڭ قاجەتى جوق. ولاردىڭ ءبارى, سونىڭ ىشىندە فوتودەرەكتەر رۋحاني جاڭعىرۋ اياسىندا قولعا الىنعان «قازاقستاننىڭ كيەلى جەرلەرى» جوباسى اياسىندا جيناقتالۋدا. تاڭداۋ ءورىسى دە كەڭ. عالىمدار مەن قوعام قايراتكەرلەرى قازىردىڭ وزىندە 100 جالپىۇلتتىق جانە 500-دەي وڭىرلىك مادەني ەسكەرتكىشتەردى ىرىكتەپ العانى ءمالىم.
ەلباسى «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا ولاردىڭ باستىلارى قاتارىندا ۇلىتاۋ تورىندەگى جادىگەرلەر كەشەنىن, تارازدىڭ ەجەلگى ەسكەرتكىشتەرىن, بەكەت اتا كەسەنەسىن, التايداعى كونە قورىمدار مەن جەتىسۋدىڭ كيەلى مەكەندەرىن جانە باسقا دا جەرلەردى جاتقىزدى.
بۇل رەتتە پرەزيدەنتتىك جوباداعى «حالقىمىزدىڭ ۇلتتىق بىرەگەيلىگىنىڭ مىزعىماس نەگىزىن قۇرايتىن» تاڭداۋلى كيەلى ورىنداردى كەزەك-كەزەكپەن ۇلتتىق ۆاليۋتادا بەينەلەۋ – ولاردى بارشا قازاقستان حالقىنا, جاس ۇرپاققا جانە ەلىمىزگە كەلەر شەتەلدىك تۋريستەر مەن مارتەبەلى مەيماندارعا, سونداي-اق جاھاندىق كوللەكتسيونەرلەر اراسىندا ناسيحاتتاۋدىڭ ءبىر مۇمكىندىگى بولارى ءسوزسىز. سوندا بۇل قازاقستاندىقتاردى, اسىرەسە جاس وسكىندەردى پاتريوتتىق تاربيەلەۋگە, كيەلى ورىندارعا دەگەن قۇرمەتكە باۋلۋعا ۇلەس قوسادى. بۇدان بولەك, بۇل قادام كيەلى جەرلەردى الەم جۇرتشىلىعىنىڭ نازارىنا ىلىكتىرىپ, وتاندىق تۋريزمگە سەرپىن بەرۋگە ىقپال ەتەر ەدى. جاۋاپتى تۇلعالار وسىعان كوڭىل بولسە, بۇل دا رۋحاني جاڭعىرۋدىڭ ءبىر باستاۋىنا اينالارى انىق.
باقىتبەك سماعۇل,
ءماجىلىس دەپۋتاتى
