وسىدان جارتى عاسىر بۇرىن قۇرىلعان ايرىقشا ورتالىقتىڭ بۇگىنگى تاڭدا دا ەلىمىزدە ەشقانداي بالاماسى بولماي وتىر. ءوز قىزمەتىن تاۋەلسىز ەلىمىزدە دەربەس ءوز جولى بارىن تانىتىپ ۇلگەرگەن استرونوميا جانە عارىش سالالارىمەن تىعىز بايلانىستى جۇرگىزىپ وتىرعان اقتوبە پلانەتاريىنىڭ ەلىمىزدىڭ قوعامدىق جانە مادەني ومىرىندە الاتىن ورنى بولەك. بۇل ەرەكشە ورتالىق اسپان دەنەلەرىن زەردەلەۋگە قاتىستى بارلىق تالاپتارعا جاۋاپ بەرە الادى. اسىرەسە ونىڭ الداعى ماقساتىن جوعارىدا اتالعان سالالارمەن بايلانىستىرعىسى كەلەتىن جەتكىنشەكتەرگە تيگىزەتىن شاپاعاتى مەن تاعىلىمىنا ەشقانداي باعا جەتپەيدى. اتالعان پلانەتاريدىڭ ديرەكتورى قورلان بولەكوۆ بىزگە ءوز وي پىكىرىن بىلايشا جەتكىزدى.
– قازىر ۇجىمدا جيىرما ادام جۇمىس ىستەيدى. بىزدە تۇنگى اسپاندا جىمىڭ قاققان جۇلدىزدارمەن ىشتەي سىرلاسقىسى كەلەتىندەرگە ارنالعان بولمە بار. وعان ءبىر مەزگىلدە ەلۋ ادام سيادى. وزگەشە ءبىر جۇلدىزدار الەمىنە ەنۋگە قىزىعۋشىلىق تانىتقاندار وسى ارادا دا ماقساتتارىنا جەتە الادى. دامۋدىڭ بۇگىنگى قارقىندى كەزەڭى پلانەتاريدەگى تەحنيكالار مەن قوندىرعىلاردى ۇدايى جاڭعىرتىپ تۇرۋدى قاجەت ەتەدى.
اقتوبە پلانەتاريى جاس تالعامايدى. ونىڭ قىزمەتىمەن تانىسقىسى كەلگەن ۇلكەن دە, كىشى دە مۇندا اسپان الەمىنىڭ قىر-سىرىنا قانىعا الادى. بۇل باعىتتا ارنايى اشىلعان ۇيىرمەلەرگە قاتىسۋعا ىقىلاس بىلدىرگەن ۇل-قىزدار دا جەتكىلىكتى. ولاردىڭ اراسىندا حالىقارالىق وليمپيادالاردا جۇلدەلى ورىندارعا يە بولىپ جۇرگەندەر دە بار. پلانەتاريگە كەلۋشىلەر قاي كەزدە دە تولاستاعان ەمەس.
تەمىر قۇسايىن,
«ەگەمەن قازاقستان»
اقتوبە
