اسان قايعى بابامىز جەرۇيىق ىزدەپ, جەلماياسىمەن جورتىپ ءجۇرىپ جۋالى جەرىن كورگەندە ء«شوبىڭ سەمىز, قارىڭ مول, توپىراعىڭ ماي ەكەن, قادىرىڭدى ەگىن سالعان ەل بىلەر. باسقانىڭ ءبارىن قيساڭ دا, جۋالىنى قيمايسىڭ, وڭگەرىپ الىپ كەتەر ەم, ات ساۋىرىنا سىيمايسىڭ» دەپ تامسانىپتى دەسەدى. سونىمەن قاتار كەزىندە باتىس پەن شىعىستى بايلانىستىرىپ, اۋليەاتا جولىمەن ءجۇرىپ وتكەن كەرۋەننىڭ جۋالى جەرىنە ايالداعانى تۋرالى دا دەرەكتەر بار. بۇدان كەيىن, بۇگىندە اۋداننىڭ ىرگەسىنەن قازىلىپ جاتقان كونە قالاشىقتىڭ ورنى دا بۇل جەردىڭ ەجەلدەن بەرى تاريحي ولكە ەكەنىن دالەلدەي تۇسەدى.
اۋدان اكىمى باقتيار كوپبوسىنوۆتىڭ باستاماسىمەن وسى جەردەن تاريحي دەرەكتەر نەگىزىندە شوگىپ جاتقان تۇيەنىڭ ءمۇسىنى تۇرعىزىلۋدا. بيىك توبەگە جول بويىنان تۇرعىزىلىپ جاتقان ويسىلقارا ت ۇلىگىنىڭ كەلبەتى جولاۋشىلاردى تاڭداندىرماي قويمايدى. ال مۇنى جەرگىلىكتى جۇرت «دالا كەمەسى» دەپ اتايدى. سەبەبى بيىك توبەنىڭ باسىنا ورناتىلعان شوككەن تۇيەنىڭ ءمۇسىنىن جان-جاعىنان سۋ قورشاپ تۇر. سوندا سىرت كوزگە ءبىر قاراعان ادامعا بۇل جەر كىشىگىرىم ارال سياقتى دا, شوككەن تۇيە الىپ كەمە سياقتى اسەر بەرەدى.
الىپ ءمۇسىندى اۋليەاتا وڭىرىنە بەلگىلى ءمۇسىنشى-سۋرەتشى قويشىباي, باۋىرجان جانە پەردەعالي تورەمۇراتوۆتار سومداپ جاتىر. اۋەلى مۇسىنشىلەر ءمۇسىننىڭ نوبايىن سىزىپ العان سوڭ ونى سومداۋعا كىرىسكەن. ودان كەيىن تۇعىرىن تاس, ارماتۋرامەن شاتپاقتاپ, بەتونمەن مىقتاپ بەكىتىپتى. سول تۇعىرعا جۋان-جىڭىشكە ارالاس سىمدارمەن شاباقتالعان, بيىكتىگى 5 مەتر, ۇزىندىعى 10 مەتر بولاتىن الىپ تۇيەنىڭ شوگىپ جاتقان سۇلباسى قوندىرىلعان. بۇل شارۋاعا يۋري جانە ۆالەري ەسىمدى دانەكەرشى جىگىتتەر كومەك بەرىپتى. ء«مۇسىن كوپشىلىككە تاستان قالانىپ جاسالعانداي اسەر بەرۋى كەرەك. سوندىقتان ءبىز ونىڭ ءپىشىنىن جۇمىر ەتىپ سومداۋعا ءتيىسپىز. بۇل جۇمىس تولىق اياقتالعان سوڭ, الىپ ءمۇسىندى بوياۋ جۇمىستارىنا كىرىسەمىز» دەيدى بۇل جۇمىسقا باسشىلىق جاساپ, ءوزى دە سول جۇمىستىڭ بەل ورتاسىندا جۇرگەن №1 اۋداندىق بالالار ونەر مەكتەبىنىڭ ديرەكتورى قانات مۇراتاەۆ.
بۇل ءمۇسىننىڭ تاعى ءبىر كەرەمەتى بار بولىپ شىقتى. بولاشاقتا ءمۇسىننىڭ ىشىنەن كورمە بولمەسىن جاساقتاۋ ويدا بار ەكەن. ءتىپتى بۇل ماقساتتا ەسكەرتكىشتىڭ ءبىر بۇرىشىنان ەسىك تە جاسالىپ قويعان. ەندى ءارى-بەرى وتكەن جولاۋشىلار ءۇشىن شوككەن تۇيە مەنمۇندالاپ تۇراتىن بولادى.
حاميت ەسامان,
«ەگەمەن قازاقستان»
جامبىل وبلىسى
