بۇل سوعىستىڭ اياقتالعانىنا دا شيرەك عاسىردان ارتىق ۋاقىت وتسە دە, اكەلگەن قايعىسى جاۋىنگەرلەردىڭ قانىمەن, انالاردىڭ كوز جاسىمەن تاريح بەتتەرىندە وزىندىك ءىز قالدىردى. ول سالتاناتتى شاراعا وبلىس كولەمىندە جينالعان اۋعان سوعىسى ارداگەرلەرىنىڭ, سول دالادا ماڭگىلىك جاستىعىن قالدىرعان بوزداقتاردىڭ تۋعان-تۋىستارىنىڭ جانارلارى وسىنى ۇقتىردى.
ءىس-شارا اۋداندىق مادەنيەت ءۇيى ونەرپازدارىنىڭ تەاترلاندىرىلعان كورىنىسىنەن باستاۋ الدى. قىرشىنىنان قيىلعان جاس ءومىر, نۇرالىق ءتورت بوزداق جايلى قويىلىم مەن ماڭگىلىك جولعا قاراپ بالاسىن توسقان انا كەلبەتىن سومداعان ەسكەرتكىش جينالعان قاۋىم جانارىنا جاس ۇيالاتتى.
كوپشىلىك الدىندا اۋدان اكىمى نيقانباي ومارحانوۆ تاريح جىلناماسىنان ءوزىنىڭ قارالى, ناۋبەت جىلدارىمەن ورىن العان زۇلماتتىڭ ءبىرى – اۋعان سوعىسى ارداگەرلەرىنە, بۇگىنگى كۇننىڭ باتىرلارىنا قۇرمەت كورسەتىپ, ىزگى تىلەگىن ءبىلدىردى. ەسكەرتكىشتىڭ اۆتورى, ءمۇسىنشى يگور باگراموۆ.
قاراعاندى قالاسىنىڭ اۋعان سوعىسى ارداگەرلەرى جانە مۇگەدەكتەر وداعى قوعامدىق بىرلەستىگىنىڭ توراعاسى تالعات بولات ۇلى دا اۋعان سوعىسى ارداگەرلەرىنە كورسەتىلىپ جاتقان قۇرمەت ءۇشىن ىزگى ءىلتيپاتىن ءبىلدىردى.
سالتاناتتى شاراعا اۋعان سوعىسى دالاسىندا ەرلىكپەن قازا تاپقان نيكولاي پلەشاكوۆتىڭ اناسى ليۋبوۆ تروفيموۆنا مەن قادىرباي سەمباەۆتىڭ قارىنداسى ينديرا سەمباەۆا ارنايى شاقىرىلدى.
جينالعان كوپشىلىك ەسكەرتكىشكە تاعزىم جاساپ, گۇل شوقتارىن قويدى. اۋدان يمامى قۇمار قونىسكەرەي بوزداقتار رۋحىنا قۇران باعىشتادى.
جالپى, نۇرا اۋدانى بويىنشا 96 ورىمدەي جاس بوزداق تابيعاتى دا, تاريحى دا وزگەشە اۋعان سوعىسىنىڭ جان تۇرشىگەرلىك قيىندىعىنىڭ كۋاگەرى بولىپ, وق پەن وتتىڭ استىندا وتان الدىنداعى بورىشىن وتەگەن.
ميراس اسان,
«ەگەمەن قازاقستان»
قاراعاندى وبلىسى,
نۇرا اۋدانى
