وتىرىس بارىسىندا ۇلتتىق كوميسسيانىڭ الدىڭعى وتىرىسىنىڭ قورىتىندىسى بويىنشا قۇرىلعان ءتورت ارنايى جۇمىس توبىنىڭ قۇرامى مەن جۇمىستارىنىڭ جوسپارى تالقىلانىپ, بەكىتىلدى. اتاپ ايتقاندا, ورفوگرافيالىق, ادىستەمەلىك, تەرمينولوگيالىق جانە ساراپتامالىق-تەحنيكالىق جۇمىس توپتارى قۇرىلدى, ولار لاتىن گرافيكاسىن ءبىلىم جۇيەسىنە بىرتىندەپ ەنگىزۋدىڭ ەرەجەلەرى مەن ادىستەرىن ازىرلەيدى, ءتىلدىڭ تەرميندىك قورىن جۇيەلەيدى, سونداي-اق لاتىن گرافيكاسىن ات-تەحنولوگيالارعا جانە اقپاراتتىق كەڭىستىككە بەيىمدەۋمەن اينالىسادى. بۇدان وزگە, مادەنيەت جانە سپورت مينيسترلىگى جانىنداعى عىلىمي-ادىستەمەلىك ورتالىقتى قۇرۋ مۇمكىندىگى قاراستىرىلدى.
ۇلتتىق كوميسسيا جۇمىسىنىڭ باعىتتارى بويىنشا «نۇر وتان» پارتياسى توراعاسىنىڭ ءبىرىنشى ورىنباسارى م.قۇل-مۇحاممەد, قازاقستان حالقى اسسامبلەياسى توراعاسىنىڭ ورىنباسارى – پرەزيدەنت اكىمشىلىگى قازاقستان حالقى اسسامبلەياسى حاتشىلىعىنىڭ مەڭگەرۋشىسى د.مىڭباي, پارلامەنت ءماجىلىسىنىڭ دەپۋتاتى ب.مامىراەۆ, مادەنيەت جانە سپورت ءمينيسترى ا.مۇحامەدي ۇلى, ءبىلىم جانە عىلىم ءمينيسترى ە.ساعاديەۆ, اقپارات جانە كوممۋنيكاتسيالار ءمينيسترى د.اباەۆ, ا.بايتۇرسىنوۆ اتىنداعى ءتىل ءبىلىمى ينستيتۋتىنىڭ ديرەكتورى ە.قاجىبەك, ءتىل ءبىلىمى ينستيتۋتىنىڭ ءتىل مادەنيەتى ءبولىمىنىڭ مەڭگەرۋشىسى ن.ءامىرجانوۆا, ا.بايتۇرسىنوۆ اتىنداعى ءتىل ءبىلىمى ينستيتۋتىنىڭ باس عىلىمي قىزمەتكەرى ج.ءالىمحان, قازاقستان رەسپۋبليكاسى كاسىپوداقتار فەدەراتسياسى توراعاسىنىڭ كەڭەسشىسى ە.سايىروۆ جانە ت.ب. ءسوز سويلەدى.
ەسكە سالا كەتەيىك, قازاق ءتىلى ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيا – بيىل قاراشا ايىندا قۇرىلعان ۇكىمەت جانىنداعى ساباعاتتىق-كەڭەسشى ورگان.
پرەمەر-مينيستر ب.ساعىنتاەۆتىڭ توراعالىعىمەن كوميسسيا قۇرامىنا: توراعا ورىنباسارى – پرەمەر-ءمينيستردىڭ ورىنباسارى ە.دوساەۆ, سونداي-اق پرەزيدەنت اكىمشىلىگىنىڭ, «نۇر وتان» پارتياسىنىڭ وكىلدەرى, پارلامەنت دەپۋتاتتارى, جوو وكىلدەرى, تانىمال عالىمدار جانە قوعام قايراتكەرلەرى كىردى.
شارالار جوسپارىنا سايكەس, قازاق ءتىلى ءالىپبيىن لاتىن گرافيكاسىنا 2025 جىلعا دەيىن كەزەڭ-كەزەڭمەن كوشىرۋ جوسپارلانعان. ءبىرىنشى كەزەڭ 2018-2020 جىلداردى, ەكىنشى كەزەڭ – 2021-2023 جىلداردى, ءۇشىنشىسى 2024-2025 جىلداردى قامتيدى.
