كۇدىكتى كوlesa.kz سايتىنا اۆتوكولىك بولشەكتەرىن اناعۇرلىم تومەن باعامەن ساتۋ تۋرالى حابارلاندىرۋ بەرىپ, قازاقستاننىڭ توعىز وڭىرىنەن, (قوستاناي, قاراعاندى, اقمولا, اقتوبە, جامبىل, باتىس قازاقستان, ماڭعىستاۋ, شىعىس قازاقستان وبلىستارى, الماتى قالاسى) قانشاما ادامداردى الداپ سوققان.
قوستانايلىق پوليتسەيلەر كۇدىكتىنىڭ جەكە باسىن انىقتاۋ ءۇشىن ايتارلىقتاي ۇلكەن جۇمىس اتقاردى.
– ۇستىمىزدەگى جىلعى ءساۋىر ايىندا بىزگە قوستاناي وبلىسىندا ينتەرنەت جەلىسىندەگى كوlesa.kz ارقىلى الاياقتىق جاساپ جۇرگەن توپ بار ەكەندىگى تۋرالى اقپارات ءتۇستى. الاياقتىق سىزباسىن جاساعاندار سايتقا كەز كەلگەن شەتەلدىك ماركالى اۆتوكولىكتىڭ بولشەكتەرىن ساتاتىنى تۋرالى حابارلاندىرۋلار ورنالاستىرادى. ولار اۆتوكولىكتىڭ بولشەكتەرىن وتە جاقسى بىلگەن, تاجىريبەسى بار, سوندىقتان تۇتىنۋشىلاردى دا سوزىنە يلاندىرا ءبىلىپتى. ولار ساتىپ الۋشىلارعا زاتتىڭ باعاسىن الدىن الا تولىق تولەتىپ وتىرعان. اقشا تۇسىسىمەن حابارلاندىرۋ الىنىپ تاستالادى دا, ساتىپ الۋشى ولارمەن بايلانىسقا شىعا الماي قالادى, – دەدى قوستاناي وبلىسى ءىىد كپب اسا ماڭىزدى ىستەر جونىندەگى اعا جەدەل ۋاكىلى, پوليتسيا پودپولكوۆنيگى جانار مۇعالوۆا.
الاياقتار «سۇرانىستى» وزدەرى تۇرعان قوستاناي وبلىسى تۇرعىندارىنان الماۋعا تىرىسقان, ال بۇل قىلمىستى اشۋدى, كۇدىكتىلەردى انىقتاۋدى كۇردەلەندىرە تۇسكەن. ولار ەسەبىنە اقشانى ءتۇرلى بانكتەر كارتوچكاسىمەن الىپ, ونى قوستانايدا قولما-قول اقشاعا اينالدىرىپ وتىرعان. قوستانايداعى بانكوماتتاردان اقشا العاندا ەرەكشە ساقتىقتى دا ويلاستىرعان.
پوليتسەيلەر كۇدىكتىلەردى ىزدەستىرۋ بارىسىندا ءتۇرلى شارالاردى جان-جاقتى قاراستىردى. مونيتورينگتەر وتكىزگەن, كوlesa.kz سايتىنىڭ قىزمەتكەرلەرىمەن تىكەلەي جۇمىس ىستەگەن, وسى سايتتا الاياقتار جاريالاعان 100-دەن اسا حابارلاندىرۋ شىققانى بەلگىلى بولعان. اۆتوكولىك بولشەكتەرىن ساتىپ الۋ ءۇشىن ادامدار قازاقستاننىڭ ءار شالعايىنان ولاردىڭ ەسەبىنە ءتۇرلى بانكتەر ارقىلى 50 مىڭنان 250 مىڭعا دەيىن اقشا اۋدارعان. پوليتسەيلەردىڭ تياناقتى جۇمىستارىنىڭ ارقاسىندا كۇدىكتىنىڭ قوستاناي قالاسىندا تۇراتىندىعى انىقتالدى, وعان ءتىنتۋ جاسالعاندا بۇلتارتپايتىن ايعاقتار تابىلدى.
قوستاناي وبلىسى ىشكى ىستەر دەپارتامەنتى كريمينالدىق پوليتسيا باسقارماسىنىڭ باستىعى, پوليتسيا پولكوۆنيگى امانگەلدى مۇحامەتقاليەۆتىڭ ايتۋىنشا, عالامتور الاياعىن ۇستاۋ, ونىڭ توبىنداعى ادامداردى انىقتاۋ, قىلمىسىن مويىنداتۋ وڭاي بولماعان. الاياقتاردان زارداپ شەككەندەر سانى تەك 36 عانا ەمەس, ودان دا كوبەيۋى ىقتيمال. تەرگەۋ بارىسىندا ونىمەن بىرگە الاياقتىق جاساعان تاعى ءبىر ادام انىقتالدى, ول ازىرگە كەپىلمەن ءجۇر. قازىر كۇدىكتى قاماۋدا وتىر, سوتقا دەيىنگى تەرگەۋ امالدارى ءجۇرىپ جاتىر.
ءنازيرا جارىمبەت,
«ەگەمەن قازاقستان»
قوستاناي
