سىرداريا اۋداندىق حالىققا قىزمەت كورسەتۋ ورتالىعى ءبولىمىنىڭ باسشىسى جۇمابەك ءاشىم ۇلى باستاعان ۇجىم جۋىردا 100 جاسقا جەتكەن ءساليما كۇدەرباەۆانىڭ ۇيىنە بارىپ, ءجۇز جىلدىق مەرەيلى جاسىمەن قۇتتىقتاپ, جەكە كۋالىگىن تابىستادى.
ءساليما اپا وڭتۇستىك قازاقستان وبلىسىنىڭ شالقيا اۋىلىندا دۇنيەگە كەلگەن ەكەن. اتا-اناسىنان جاستاي ايىرىلىپ, تاعدىردىڭ تالاي تەپەرىشىن كورگەن. 1933 جىلى تۇرمىسقا شىعىپ, قىزىلوردا وبلىسىنا كەلەدى. جاستايىنان قارا جۇمىسقا جەگىلىپ, ەڭبەكپەن شىڭدالىپ وسكەن.
«كەسەك تە قۇيدىق, ماساق تا تەردىك, ولمەگەننەن باسقانىڭ ءبارىن كوردىك», دەيدى كەيۋانانىڭ ءوزى. 1941 جىلى سوعىس باستالىپ, جولداسى سوعىسقا اتتانادى. ەر ەتىگىمەن قان كەشىپ, ات اۋىزدىعىمەن سۋ ىشكەن وتتى جىلداردا ءساليما اپا تىلدا جۇمىس ىستەيدى. جولداسىنىڭ دا جارىق دۇنيەنى كورەر جازۋى بار ەكەن. مايداننان جارالانسا دا, امان ورالادى.
ەكەۋى 2 قىز, 4 ۇل تاربيەلەپ وسىرگەن. كەيۋانا تەرەڭوزەك كەنتىندەگى ناۋبايحانادان زەينەتكە شىققان. كوپتەگەن ماراپاتتىڭ يەسى. سوعىس ارداگەرىنىڭ جەسىرى, تىل ارداگەرى قازىر نەمەرە-شوبەرەنىڭ قىزىعىن كورىپ وتىر. وسىنداي ونەگەلى ءومىر ءسۇرىپ, ءجۇز جىل عۇمىر كەشكەن كەيۋاناعا ورتالىق قىزمەتكەرلەرى تولقۇجاتىن تاپسىرىپ, باتاسىن الدى. بىلگەنگە بۇل دا تاريحي ءساتتىڭ ءبىرى عوي.
ەرجان بايتىلەس,
«ەگەمەن قازاقستان».
قىزىلوردا وبلىسى
