اعىمداعى جىلى باستى ءۇش مۇز قالاشىعىن بەزەندىرۋدىڭ تۇجىرىمداماسى مەن نوبايلارى ازىرلەنگەن. نەگىزگى جانە ەڭ ۇلكەن مۇز قالاشىعى بيىل ەكسپو كورمەسىنىڭ اۋماعىندا ورنالاسقان. مۇزايدىنىن بەزەندىرۋدىڭ نەگىزگى تۇجىرىمداماسى رەتىندە «ەكسپو-2017: بولاشاق ەنەرگياسى» كورمەسى تاڭدالدى, سونداي-اق دۇنيەجۇزىلىك كورمەلەر تاريحىنداعى اسا تانىمال ساۋلەتتىك سيمۆولدار بويىنشا وزىندىك تۋر وتكىزۋ يدەياسى تۋىندادى. مىسالى, بيىل استاناداعى مۇز قالاشىعىنىڭ قوناقتارى 1851 جىلعى دۇنيەجۇزىلىك كورمەدە لوندونداعى گايد-پاركتە سالىنعان حرۋستال سارايدىڭ فراگمەنتىن, 1889 جىلعى دۇنيەجۇزىلىك كورمەنىڭ كىرەبەرىسىندەگى اركا بولعان, ءپاريجدىڭ سيمۆولىنا اينالعان ەيفەل مۇناراسىن جانە ت.ب. تاماشالاي الادى.
«بۇدان بولەك, ەرەسەكتەرگە ارنالعان ەكى سىرعاناق جاسالادى. ولاردىڭ بيىكتىكتەرى – 5 مەتر, ال ۇزىندىقتارى 40 مەتر بولادى. بالالارعا ارنالعان ەكى سىرعاناقتىڭ بيىكتىگى – 2,5 مەتر, ال ۇزىندىقتارى – 14 مەتر. قالاشىقتا مۇزدان جاسالعان شىرشا كومپوزيتسيالارى, تانىمال كينوكوميكستەر مەن مۋلتفيلمدەر كەيىپكەرلەرىنىڭ مۇسىندەرى, ديسنەي لەند سارايى مەن فۋتۋريستىك ستيلدە ورناتىلعان مۇز مۇنارالار, سونىمەن قاتار ءتۇرلى-ءتۇستى مۇزدان اياز اتا مەن اقشاقاردىڭ مۇسىندەرى, ءتۇرلى جارىق-يلليۋميناتسيالىق شاعىن ارحيتەكتۋرالىق پىشىندەر جاسالادى», دەيدى قالالىق مادەنيەت, مۇراعاتتار جانە قۇجاتتاما باسقارماسى ماماندارى.
جارىق-ديناميكالىق جارىقتاندىرىلعان مۇزدان جاسالعان لابيرينت كىشكەنتاي قوناقتاردىڭ ەرەكشە قىزىعۋشىلىعىن تۋدىرماق. ونىڭ ۇزىندىعى 80 مەتردەن اسادى. مۇنىمەن قوسا, 2018 جىل قارساڭىندا ەلىمىزدىڭ باس شىرشاسى دا «نۇر الەم» سفەراسىنىڭ ماڭىندا ورنالاسادى.
ۇيىمداستىرۋشىلاردىڭ مالىمەتىنشە, تاعى ءبىر مۇز قالاشىعى قالالىق اكىمدىك الدىنداعى الاڭدا اشىلادى. وندا دا ەكسپو اۋماعىنداعىداي ۇلكەن جانە ەكى كىشكەنتاي سىرعاناق بولادى. مۇنىمەن قوسا مۇزدان اياز اتا مەن اقشاقاردىڭ مۇسىندەرى, شىعىس كۇنتىزبەسىندەگى شوقجۇلدىزدارداعى 12 جانۋاردىڭ فيگۋرالارى قويىلادى.
ءۇشىنشى مۇز قالاشىعى «ستۋدەنتتىك» ساياباقتا ورنالاسادى. مۇندا دا ۇلكەن سىرعاناق جاسالادى. استانا تۇرعىندارى مەن قوناقتارىنا ارنالعان مۇز قالاشىقتار 18 جەلتوقساننان باستاپ اشىلادى دەپ جوسپارلانعان.
سونىمەن قاتار جاڭا جىل جاقىنداعاندا استانالىق ساياباق اۋماعىنان ەلوردا تۇرعىندارى مەن قوناقتارى ءۇشىن اياز اتا رەزيدەنتسياسى اشىلماق. كەلۋشىلەردىڭ بارلىعى ونىمەن سۋرەتكە ءتۇسىپ, ىزگى تىلەكتەرىن تىڭداۋ مۇمكىندىگىنە يە بولادى. رەزيدەنتسيا 7-10 قاڭتاردا جۇمىس كۇندەرى ساعات 18.00-دەن باستاپ, ال دەمالىس كۇندەرى ساعات 12.00-دەن باستاپ جۇمىس ىستەيدى. رەزيدەنتسياعا كىرۋ باعاسى شامامەن 1000 تەڭگەنى قۇرايدى. تۇرمىسى تومەن وتباسىلار بالالارى ءۇشىن رەزيدەنتسياعا كىرۋ تەگىن.
اسحات رايقۇل,
«ەگەمەن قازاقستان»
