سونداي-اق قازىرگى ۋاقىتتا حقكو-نا بارماي-اق ەلەكتروندىق ۇكىمەت پورتالى ارقىلى تۇراقتى تىركەۋگە تۇرۋ جانە ازاماتتاردى تىركەۋدەن شىعارۋ مەحانيزمىن 2018 جىلى ىسكە قوسۋ جوسپارلانىپ وتىر. بۇل تۋرالى قر ىشكى ىستەر ءمينيسترىنىڭ ورىنباسارى ەرلان تۇرعىمباەۆ مالىمدەدى, دەپ حابارلايدى قازاقستان رەسپۋبليكاسى ءىىم ءباسپاسوز قىزمەتى.
حالىققا مەملەكەتتىك قىزمەت كورسەتۋدىڭ ساپاسىن جاقسارتۋ بويىنشا ءىىم جۇيەلى شارالار قابىلداپ وتىرعانىن اتاپ وتكەن ىشكى ىستەر ءمينيسترىنىڭ ورىنباسارى ەرلان تۇرعىمباەۆتىڭ ايتۋىنشا, بۇگىنگى كۇنى مينيسترلىك مەملەكەتتىك قىزمەتتىڭ 39 ءتۇرىن كورسەتەدى, ۆەدومستۆونىڭ قىزمەتكەرلەرى 286 حالىققا قىزمەت كورسەتۋ ورتالىعىندا جانە 14 ارنايى حالىقققا قىزمەت كورسەتۋ ورتالىعىندا جۇمىس ىستەۋدە.
«2017 جىلدىڭ 10 ايى ىشىندە ازاماتتارعا 19 ملن. 742 مىڭنان استام قىزمەت كورسەتىلدى, ونىڭ باسىم كوپشىلىگى – مەكەنجاي انىقتامالارىن بەرۋ, اۆتوكولىكتەردى تىركەۋ, حالىقتى قۇجاتتاندىرۋ جانە ازاماتتاردى تۇرعىلىقتى جانە ۋاقىتشا تۇرۋ ورىندارىنا تىركەۋ. مەملەكەتتىك قىزمەت كورسەتۋدى جەڭىلدەتۋ جانە پروتسەستەردى جىلدامداتۋ ءۇشىن ءىىم ولاردى ەلەكتروندىق ۇكىمەت پورتالى ارقىلى اۆتوماتتاندىرۋدى بەلسەندى ەنگىزۋدە. سونىمەن قاتار 2017 جىلدىڭ باسىندا حقكو-نا بارماي-اق ونلاين رەجيمدە «ەلەكتروندىق ۇكىمەت» پورتالى ارقىلى ۋاقىتشا تىركەۋ جۇرگىزۋ مۇمكىندىگى تۋدى», دەيدى ەرلان تۇرعىمباەۆ. سونداي-اق 1 قاراشادان باستاپ ۋاقىتشا جانە تۇراقتى تىركەۋ كەزىندە تۇرعىن ۇيگە مەنشىك قۇقىعى تۋرالى 2-نىساندى انىقتامانى تالاپ ەتۋ جويىلدى (تەك 25 كۇن ىشىندە 138 مىڭ ادام تىركەۋگە تۇردى, ونىڭ ىشىندە 115 مىڭ ادام – تۇراقتى تىركەۋگە جانە 23 مىڭ ادام ۋاقىتشا تۇراتىن ورنى بويىنشا تىركەلدى). قازىرگى ۋاقىتتا حقكو-نا بارماي-اق ەلەكتروندىق ۇكىمەت پورتالى ارقىلى تۇراقتى تىركەۋگە تۇرۋ جانە ازاماتتاردى تىركەۋدەن شىعارۋ مەحانيزمى پىسىقتالدى, ونى 2018 جىلى ىسكە قوسۋ جوسپارلاندى.
اقپارات جانە كوممۋنيكاتسيالار, ادىلەت, ىشكى ىستەر مينيسترلىكتەرىنىڭ اقپاراتتىق جۇيەسىن بىرىكتىرۋ نەگىزىندە «ەلەكتروندىق ءۇي كىتاپشاسى» جاسالىندى, ول ءاربىر ەلدى مەكەن بويىنشا حالىقتىڭ كوشىپ-قونۋىنا مونيتورينگ جۇرگىزۋدى جاقسارتادى, ءۇيدىڭ يەسىنە ونىڭ مەنشىگىندە تىركەۋگە تۇرعان ادامدار تۋرالى مالىمەت الۋعا مۇمكىندىك بەرمەك
