كەزدەسۋدە ەلىمىزدىڭ ءجۇز جىلعا جۋىق تاريحى بار باس گازەتىنىڭ بۇگىنگى تىنىسى باياندالدى. مازمۇندىق ساپانىڭ كۇشەيگەنى, ءار سالاعا ارنايى ايدارلار مەن بەتتەر اشىلعانى, حالىقارالىق ساراپتامالىق ماقالالاردىڭ كوبەيگەنى ءسوز بولدى. ءوز كەزەگىندە ءسوز العان مۇعالىمدەر پەداگوگيكا سالاسىنداعى وڭ ىزدەنىستەرگە, ادىستەمەلەرگە نەگىزدەلگەن ء«تالىم» جانە ء«بىلىم» بەتىنە بايلانىستى وڭ پىكىرلەرىن ءبىلدىردى. وقىعىسى كەلگەن تاقىرىپتار جايىندا ويلارىن ءبولىستى.
ماسەلەن, №9 مەكتەپ-گيمنازيادا وتكەن كەزدەسۋدە ءسوز العان تاريح ءپانىنىڭ مۇعالىمى بوتاگوز نۇرسەيىتوۆانى ەلىمىزگە تاعدىر-تالايىمەن كەلگەن ۇلتتار مەن ۇلىستاردىڭ تاريحى قىزىقتىرادى. «ستاليندىك رەپرەسسيانىڭ زۇلماتىن باسىنان وتكەرگەن ۇلىستاردىڭ ادەت-عۇرىپ, سالت-ءداستۇرى, مادەنيەتى تۋرالى كوبىرەك جازىلسا», دەيدى بوتاگوز. ال اللا پەتروۆسكايا بۇگىنگى جاستاردىڭ تاعدىرىنا كوبىرەك الاڭدايدى.
ول عالامتورداعى جاڭالىق, وقيعالارعا ەلىكتەگەن جاس وسكىندەردىڭ اراسىندا ءسۋيتسيدتىڭ, ءدىني اداسۋشىلىقتىڭ تامىرى نەدە, سوعان بايلانىستى ساراپتامالىق ماقالالار كوبىرەك جازىلسا دەگەن ۇسىنىسىن جەتكىزدى. سونىمەن قاتار كوشەلەرگە جاڭا ەسىمدەر بەرىلىپ جاتىر. ادامنىڭ اتى كوشەگە قانداي ەڭبەگى ءۇشىن بەرىلەدى؟ بارماق باستى, كوز قىستىمەن, تامىر-تانىسپەن ءوتىپ كەتكەندەر جوق پا, نەگە بەلگىسىز ەسىمدەر ەلىمىزدەگى داڭقتى تۇلعالارمەن الماستىرىلمايدى دەستى مۇعالىمدەر.
قازاق ءتىلى مەن ادەبيەتى ءپانىنىڭ مۇعالىمى ايگۇل ەسىمبەكوۆانى ۇلىستىڭ ۇيىتقىسى بولىپ وتىرعان وڭتۇستىك وڭىرىنە قاراتا ايتىلاتىن وعاش سوزدەر ويلاندىرادى ەكەن. سوندىقتان ول ۇلتتىڭ ۇستىنى بولىپ وتىرعان ايماقتىڭ جاقسىلىعى كوبىرەك جازىلسا دەگەن نيەتتە. ال شىنار ايدوسوۆانى قوعامداعى مۇعالىمنىڭ بەدەلى تولعاندىرادى. بۇرىن وقۋشىلار ۇستازىن قاتتى قۇرمەتتەيتىن ەدى. قادىرىنە جەتەتىن, ەڭبەگىن باعالايتىن. قازىر مۇعالىم بيلىكتەگىلەردىڭ ايداعانىمەن جۇرەتىن پەندەگە اينالىپ بارادى. كوشە سىپىرادى, اۋلا تازالايدى. سايلاۋ وتەتىن قارساڭدا ءۇي-ءۇيدى ارالاپ قۇجات جينايدى. بۇعان قاشان توقتام بولادى؟!
№41 ورتا مەكتەپتە دە وزەكتى ماسەلەلەر كوتەرىلدى. مەكتەپ ديرەكتورى اينا ابىلايقىزى ءبىلىم وشاعىندا ەكى مىڭعا جۋىق وقۋشى وقىپ جاتقاندىعىن ايتادى. مەكتەپ ۇجىمى ەلباسىنىڭ «بولاشاققا باعدار: رۋحاني جاڭعىرۋ» ماقالاسىنا بايلانىستى ەگەمەندىكتەرمەن ەمەن-جارقىن اڭگىمە-دۇكەن قۇردى. وزدەرىن تولعاندىرعان ساۋالدارىنا جاۋاپ الدى. وقۋشىلاردىڭ كونتسەرتتىك باعدارلامالارىمەن تانىستىردى.
وڭتۇستىككە بەلگىلى ۇستاز, تاريحشى ءومىر شىنىبەك ۇلى ارنايى ءسوز الىپ, ەل گازەتى «ەگەمەندەگى» جاقسى ىزدەنىستەرگە ءىلتيپاتىن ءبىلدىردى. گازەت باسشىسى دارحان قىدىرالىنىڭ وڭتۇستىككە كەلگەن ساپارىندا ءوزىن ىزدەپ تاۋىپ, پەداگوگيكا سالاسىندا پىكىرىن تىڭداعاندىعىنا قاراپايىم مۇعالىمدى باعالاعانىنا ءسۇيىنىشىن ءبىلدىردى. باس گازەتتىڭ ۇستازدار قاۋىمى ءۇشىن ۇلكەن اقىلشى, كومەكشى ەكەندىگىن ايتتى.
مۇعالىمدەردى تولعاندىراتىن ساۋال كوپ. لاتىن ءالىپبيى جايى, ۇشتىلدىلىك ماسەلەسى دە كوتەرىلدى. قاي-قايسىسى دا مۇعالىمدەردى اينالىپ وتپەيدى. تىكەلەي اينالىساتىن نەگىزگى بۋىن بولعاندىقتان الاڭداۋلارى زاڭدى. ويتكەنى بۇگىن ۇستازى مىقتىنىڭ وزاتىن زامانى.
باقتيار تايجان,
عالىمجان ەلشىباي,
«ەگەمەن قازاقستان»
وڭتۇستىك قازاقستان وبلىسى
