ياعني ادامي كاپيتال ساپاسىن جاقسارتۋمەن قاناتتاس ءبىلىم بەرۋ جۇيەسىنە جاۋاپكەرشىلىك جۇكتەيدى. بۇل ءوز كەزەگىندە ەلىمىزدىڭ جوعارى وقۋ ورىندارىنداعى پروفەسسور-وقىتۋشىلار قۇرامىنا جاڭا جوبالار جاساقتاۋ قاجەتتىلىگىن كورسەتتى. ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ قارجى جانە نەسيە كافەدراسىنىڭ دوتسەنتى, ەكونوميكا عىلىمدارىنىڭ كانديداتى جۇماگۇل ماقاشەۆا وسى باعىتتا ەڭبەك ەتىپ كەلە جاتقان عالىمداردىڭ ءبىرى. جولداۋ جاريالانعاننان بەرى وقىتۋدىڭ جاڭا جوباسى مەن مودەلىن جاساقتاعان اقتوبەلىك جاس عالىمنىڭ باستى ماقساتى – قارجى جۇيەسى بويىنشا ماماندىق الاتىن ستۋدەنتتەردىڭ ىرگەلى بىلىمىنە ەلەۋلى وزگەرىس ەنگىزۋ.
ياعني جۇماگۇل جامانسارىقىزى وقىتۋ بارىسىندا قارجىگەر-تەورياشىلاردى ەمەس, قارجىگەر-تاجىريبەشى ماماندارىن ازىرلەۋگە باسىمدىق بەرەدى. بۇل جوبا وقىتۋدىڭ وڭتايلى مودەلىنە ارقا سۇيەيدى. ول وتاندىق قارجى نارىعى سۋبەكتىلەرىنىڭ تاجىريبەلەرىن پايدالانۋدى كوزدەي وتىرىپ, شاكىرتتەرگە قارجى ينستيتۋتتارىنىڭ تەرەڭ يىرىمدەرىن ءتۇسىندىرۋدى مۇرات تۇتادى. ستۋدەنتتەردىڭ وندىرىستىك تاجىريبەسى مەن ديپلوم جۇمىسى بولاشاقتا بىلىكتى مامان بولۋدىڭ باستى كىلتى. سوندىقتان جۇماگۇل ستۋدەنتتەردىڭ عىلىمي ىزدەنىستەرىنە جەتەكشى بولۋدان وزىنە كۇش-قۋات الاتىنىن ايتادى.
قازىر كوپتەگەن جوعارى جانە ارناۋلى وقۋ ورىندارىندا بولاشاق قارجىگەر ماماندار بىرىڭعاي تەوريالىق ىلىمدەرمەن قارۋلانعانىمەن, ونى تاجىريبەلىك تۇرعىدان ىسكە اسىرا الماي جاتادى. وسى ولقىلىقتىڭ ورنىن تولىقتىرۋ ءۇشىن تەوريا مەن تاجىريبەنى ءبىر ارناعا توعىستىرۋعا ارنالعان ارنايى عىلىمي-ادىستەمەلىك تۇجىرىمدامالىق جۇيە جاساقتالدى, دەيدى ول. اۆتورلىق جوباعا سايكەس, اقتوبە قالاسىنداعى قارجى ينستيتۋتتارىنا جىل سايىن ەكسكۋرسيالار جاساۋ قاراستىرىلعان. عىلىمي-زەرتتەۋ جۇمىستارىنىڭ ناقتىلىعى مەن ومىرشەڭدىگىنە كوڭىل ءبولىنۋى, كاسىپكەرلەر مەن قارجى ماماندارىنىڭ قاتىسۋىمەن دارىستەر, پىكىرتالاستار مەن ىسكەرلىك ويىندار وتكىزىلۋى – جوبانىڭ باستى ەرەكشەلىكتەرىنىڭ ءبىرى.
ول ۋنيۆەرسيتەت قابىرعاسىندا باعالى قاعازدارمەن جۇمىس ىستەۋ داعدىلارىن مەڭگەرۋى ءۇشىن ستۋدەنتتەردىڭ ارناۋلى ساۋدا الاڭدارىندا وتەتىن باعالى قاعازداردى ساتىپ الۋ جانە ساتۋ ىسىنە ۇنەمى قاتىسۋىن قاداعالاپ وتىرادى. «قارجى الماناحى» ءۇش ساتىلى باعدارلاماسى دا تەوريا مەن پراكتيكالىق ماسەلەلەردىڭ تۇتاستىعى مەن بىرلىگىن, دەپوزيتتىك ەسەپتەر اشۋدىڭ ءمانى مەن ماڭىزىن, بانكىلىك وپەراتسيالاردىڭ ادامعا جانە مەملەكەتكە تيگىزەر پايداسىن قاراستىرادى.
«بۇگىندە جوعارى كۋرستا وقيتىن ستۋدەنتتەرىمنىڭ دەپوزيتتىك جيناق قاراجاتتارى دا, دەپوزيتتىك وپەراتسيالارمەن جۇمىس ىستەۋ تاجىريبەلەرى دە بار», دەيدى جۇماگۇل ماقاشەۆا. ايتۋىنشا, جوعارى كۋرس ستۋدەنتتەرىنىڭ 57 پايىزى قازاقستاندىق قور بيرجاسىنا وتسە, 33 پايىزى باعالى قاعازدار جونىندەگى ارناۋلى جوبالاردىڭ يەلەرى اتانىپتى. ال 10 پايىزى نيۋ-يورك قور بيرجاسىنىڭ تۇتىنۋشىلارى. باسىم بولىگىنىڭ تاپقان پايداسى قازىردىڭ وزىندە 30 پايىزدى قۇراپ ۇلگەردى. سونداي-اق ستۋدەنتتەر تاعى دا اكتسيالار ساتىپ الىپ, ىلكىمدىلىك تانىتا باستاعان. وسى ارقىلى ودان ءدارىس الاتىن بولاشاق قارجىگەرلەر قور نارىعىنا تۇراقتى تۇردە مونيتورينگ جاساۋدى كۇندەلىكتى داعدىعا اينالدىرىپ وتىر. قارجىلىق ساۋاتتىلىق دەگەن دە وسى ەمەس پە؟!
تەمىر قۇسايىن,
«ەگەمەن قازاقستان»
اقتوبە
