جاڭا ورتالىقتا قۇقىق قورعاۋ ورگاندارى قىزمەتكەرلەرىنىڭ وقۋ-جاتتىعۋ جيىندارىن وتكىزۋگە بارلىق جاعداي جاسالعان. مۇندا زاماناۋي ينتەراكتيۆتى تير, قارۋ-جاراق قويماسى, ترەناجەر زالى, كۇرەس زالى, كەدەرگى جولاقتارى بار سپورتتىق قالاشىق, ءماجىلىس زالى, 50 توسەك-ورىندىق كازارمالىق ءۇي-جاي مەن اسحانا بار.
ورتالىق سوڭعى ۇلگىدەگى بەينەباقىلاۋ جانە ارنايى بايلانىس جۇيەلەرىمەن, كابينەتتەرى قازىرگى زامانعا ساي قۇرىلعىلارمەن جابدىقتالعان. كەلەر جىلى بۇل جەردە اتىس ءتيرى مەن تاعى ءبىر سپورت الاڭى پايدا بولماق. الداعى ۋاقىتتا ورتالىققا وبلىسىمىزدىڭ بارلىق اۋدان-قالاسىنان پوليتسيا قىزمەتكەرلەرى كەلىپ, التى كۇندىك وقۋ-جاتتىعۋ جيىندارىنا قاتىسىپ, كاسىبي بىلىكتىلىكتەرىن ارتتىراتىن بولادى.
ء«بىر جارىم جىل بۇرىن بۇل عيمارات بوس تۇرعان ەدى. قاجەتتى قاراجاتتى بولدىك. ەندى وبلىستىق ءىىد جەكە قۇراممەن تەوريالىق جانە تاجىريبەلىك تۇرعىدا وقىتۋ وتكىزۋ ءۇشىن جاقسى بازا بار. مۇندا دايىندىقتىڭ بارلىق تۇرىنەن ءوتۋ ارقىلى قيىن دا قاۋىپتى قىزمەتتەرىڭىزدە كەزدەسەتىن كەز كەلگەن جاعدايعا دايىن بولعاندارىڭىزدى قالايمىز. وسى رەتتە سىزدەرگە ايتار جاڭالىعىم, كەلەسى جىلى ىشكى ىستەر قىزمەتكەرلەرىنە ارنالعان ءۇيدىڭ قۇرىلىسىن باستايمىز», – دەدى وبلىس اكىمى دانيال احمەتوۆ جاڭا ورتالىقتىڭ اشىلۋ سالتاناتىندا.
رەتى كەلگەندە ايتا كەتەيىك, بيىل وبلىستىق بيۋدجەتتەن ءىىد ماتەريالدىق-تەحنيكالىق قورىن جاقسارتۋ ماقساتىندا 3,5 ملرد تەڭگە ءبولىنىپ, 276 اۆتوكولىك پەن 10 اۆتوبۋس ساتىپ الىنعان-دى. بۇل رەتتە شىعىس قازاقستان وبلىسىنىڭ ىشكى ىستەر قۇرىلىمىن اۆتوكولىكپەن قامتاماسىز ەتۋ جانە تەحنيكالىق قارۋلاندىرۋ بويىنشا رەسپۋبليكادا العاشقى ورىندا تۇرعانىن ەرەكشە اتاپ وتۋگە بولادى.
ازامات قاسىم,
«ەگەمەن قازاقستان»
وسكەمەن
