وبلىستىق «قازاقستان حالقى اسسامبلەياسى» عيماراتىندا وتكەن يگى شاراعا وبلىستىق ءماسليحاتتىڭ دەپۋتاتتارى, كاسىپكەرلەر, ەتنومادەني بىرلەستىكتەردىڭ توراعالارى مەن بەلسەندى مۇشەلەرى, وبلىستىق اسسامبلەيا جانىنداعى قۇرىلىمداردىڭ جەتەكشىلەرى جانە ءوڭىر تۇرعىندارى قاتىستى.
قايىرىمدى جانداردىڭ باسىن قوسقان شارانىڭ باستى ماقساتى كوپشىلىكتىڭ دەمەۋىمەن ناۋقاس بۇلدىرشىندەرگە كومەك قولىن سوزۋ بولىپ تابىلادى. جيىندى اشىپ, ءسوز سويلەگەن وبلىستىق قازاقستان حالقى اسسامبلەياسى توراعاسىنىڭ ورىنباسارى ءمۇراتالى قالمۇراتوۆ فورۋمنىڭ ماڭىزىنا توقتالىپ, قايىرىمدىلىق شارالارىن ۇيلەستىرۋ بۇگىندە اسسامبلەيا جۇمىسىنىڭ باستى باعىتىنا اينالعانىن ايتىپ ءوتتى.
فورۋم اياسىندا وبلىستىق ءازىل-سىقاق تەاترىنىڭ ارتىستەرى «ىنتىماق اۋەندەرى» اتتى مۋزىكالىق كومەدياسىن كوپشىلىكتىڭ نازارىنا ۇسىندى. سونىمەن قاتار, مۇقتاج جاندارعا كومەكتەسۋگە قاشاندا ءازىر ەكەندىكتەرىن بىلدىرگەن قايىرىمدى جاندار ارنايى قويىلعان جاشىككە قارجى سالدى.
ءىس-شارا سوڭىندا ارنايى قۇرىلعان كوميسسيانىڭ توراعاسى, وقو قازاقستان حالقى اسسامبلەياسى جانىنداعى قوعامدىق كەلىسىم كەڭەسىنىڭ جەتەكشىسى ورىنباي راحمانبەرديەۆ بيلەتتەن جانە قايىرىمدىلىق اكتسياسىنان قولما-قول 4589100 تەڭگە جينالعانىن, تاعى بىرقاتار جومارت جانداردىڭ 1 400 000 تەڭگەنى ناۋقاس بالالاردىڭ جەكە شوتىنا اۋدارۋعا ۋادە بەرگەنىن حابارلادى. جيىندا 5 بالانىڭ اتا-اناسىنا 500 مىڭ تەڭگەدەن تاپسىرىپ, قالعان قارجى دا تولىعىمەن الماتى, استانا قالالارىنداعى مەديتسينالىق ۇيىمداردا ەم الۋ ءۇشىن كەزەكتە تۇرعان وڭتۇستىكقازاقستاندىق بالالاردىڭ ەمدەلۋىنە جۇمسالاتىنىن ايتتى.
ايتا كەتۋ كەرەك, قايىرىمدىلىق شاراسىنا «شىمكەنت قۇس» جشس, «ورداباسى قۇس» جشس, «بال تەكستيل» جشس, «امانگەلدى» جشس جانە قازىعۇرت اۋدانىنىڭ بىرقاتار كاسىپكەرلەرى بەلسەنە قاتىستى.
قازاقستان حالقى اسسامبلەياسىنىڭ 24 سەسسياسىندا مەملەكەت باسشىسى نۇرسۇلتان ءابىش ۇلى نازارباەۆ ەلىمىزدەگى قايىرىمدىلىق ماقساتىنداعى ءىس-شارالاردى ۇيلەستىرۋدى قازاقستان حالقى اسسامبلەياسىنا جۇكتەدى.
وسى باعىتتا وتكەن جىلى وبلىس اۋماعىندا اسسامبلەيانىڭ ۇيىتقى بولۋىمەن قايىرىمدىلىق ءىس-شارالارى ۇيلەستىرىلىپ, 27 مىڭنان استام ادامعا جالپى – 85 ملن تەڭگەنىڭ كولەمىندە زاتتاي جانە قارجىلاي كومەك كورسەتىلدى. 6 ناۋقاس ءبۇلدىرشىننىڭ ەلىمىزدەگى ىرگەلى مەديتسينالىق مەكەمەلەردە كەزەكسىز ەم الۋىنا ىقپال ەتىلدى.
بيىلعى قاڭتار-قىركۇيەك ايلارىندا وڭىردەگى 400-گە جۋىق قايىرىمدىلىق ءىس-شارالارى وتكىزىلىپ, قۇنى 30 ملن تەڭگەدەن استام كومەك كورسەتىلدى.
