تۇرعىندارعا بۇل ىستە پروكۋرورلار مەن سالا ماماندارىنىڭ كەڭەسى جەتىسپەي جاتادى. قوستانايدا اشىلعان قۇقىق قورعاۋ قىزمەتتەرى ورتالىعى ەندى وسىنداي قيىنشىلىقتاردى ارتقا تاستايتىن بولادى. ەلىمىزدىڭ باس پروكۋرورىنىڭ باستاماسىمەن اشىلىپ جاتقان ورتالىقتار ازاماتتارعا قۇقىق قورعاۋ ىسىندە جاقسى قولايلىلىق تۋعىزادى. باس پروكۋراتۋرانىڭ استاناداعى عيماراتىندا اشىلعان وسىنداي ورتالىق ءوز جەمىسىن بەرىپ وتىر. ءۇش ايدىڭ ىشىندە وعان 2,5 مىڭ ادام كەلىپ, قۇقىعىن قورعاۋدا كومەك پەن كەڭەستەر العان. سونىمەن قاتار اقتوبە, قىزىلوردا قالالارىنداعى قۇقىق قورعاۋ قىزمەتتەرى ورتالىقتارىنا اي سايىن شامامەن 200 ادام كەلەدى. قازاقستانداعى ءتورتىنشى ورتالىقتىڭ اشىلۋ سالتاناتىنا باس پروكۋروردىڭ ورىنباسارى مارات احمەتجانوۆ ارنايى كەلىپ قاتىستى.
– تۇرعىنداردىڭ كابينەتتەن كابينەتكە جۇگىرىپ سەندەلمەي-اق, ء«بىر تەرەزە» ۇستانىمىمەن ءبىر جەردەن قۇقىقتىق قىزمەت كومەگىنە جۇگىنۋىنە مۇمكىندىك تۋدى. كەلۋشىلەرگە نوتاريۋس, ادۆوكات, مەدياتور, سالىق سالاسى قىزمەتكەرلەرىنىڭ, پسيحولوگ مامانداردىڭ كومەگى كورسەتىلەدى. بۇل مەملەكەتتىك جانە قۇقىق قورعاۋ ورگاندارىنا ازاماتتاردىڭ سەنىمىن ارتتىرۋ بولىپ تابىلادى. بۇدان بىلاي قىلمىستىق پروتسەستەر ەلەكتروندى تسيفرلاندىرىلادى دا, ازاماتتار وسى ارادان-اق كومەك الا الاتىن بولادى, – دەدى مارات مۇرات ۇلى.
ورتالىقتا كەزەكشى پروكۋرورلار ازاماتتاردىڭ الەۋمەتتىك-ەكونوميكالىق ارىزشاعىمدارىن, اكىمشىلىك ءوندىرىس, سوتقا دەيىنگى تەرگەۋ مەن ازاماتتىق جانە قىلمىستىق ىستەردىڭ سوت بارىسى تەرگەۋى ماسەلەلەرىن قارايدى. كەز كەلگەن ازامات الدىن الا جازىلماي-اق ورتالىققا كەلىپ, قاجەتتى زاڭدى كەڭەسىن الىپ, ارىز-شاعىمىن بەرە الادى. ماماندار بارلىق ماسەلەنىڭ كەشىكپەي, ۋاقتىلى شەشىمىن تابۋعا كومەك كورسەتەدى, كەڭەس بەرىپ, باعىتتايدى. قۇقىق قورعاۋ قىزمەتتەرى ورتالىعىندا كەزەكشىلىك ەتكەن پروكۋرورلاردىڭ جەدەل قاجەتتىلىك ءۇشىن ايماقتىق پروكۋراتۋرا مەن وزگە دە وكىلەتتى ورگانداردان اقپاراتتار الۋعا قولجەتىمدىلىگى ساقتالعان.
ورتالىقتىڭ اشىلۋىنا وبلىستىق اكىمدىك زور قولداۋ ءبىلدىردى, عيماراتتى جوندەپ, جابدىقتاۋعا 13 ميلليون تەڭگە قارجى جۇمسالدى. وبلىس اكىمى ارحيمەد مۇحامبەتوۆ جاڭا نىساننىڭ قۇقىق قورعاۋ قىزمەتىنىڭ بارلىق سالاسى بويىنشا تۇرعىندارعا كومەگى زور بولاتىنىنا سەنىمدى ەكەنىن ايتتى. ءوڭىر باسشىسى مۇنداي ورتالىقتار وبلىستىڭ باسقا دا اۋدان-قالالارىندا اشىلاتىنىنان حاباردار ەتتى. قازىر ول ءۇشىن عيماراتتاردى جوندەۋ, باسقا دا دايىندىق جۇمىستارى ءجۇرىپ جاتىر.
ورتالىق ەلەكتروندى كەزەك جۇيەسىمەن قامتاماسىز ەتىلگەن. ال ۋاقىت جوعالتپاۋ ءۇشىن «ازاماتتارعا ارنالعان ۇكىمەت» مەملەكەتتىك كورپوراتسياسى ۇسىناتىن ەلەكتروندى فورماتتاعى قىزمەت الۋعا دا مۇمكىندىك بار. كەزەكشى پروكۋرورلار اۋماقتىق بولىمشەلەر مەن باسقا دا وكىلەتتى ورگانداردان نەگىزگى قاجەتتى اقپاراتتاردى جەدەل الا الادى. سەگىز كابينەت كەلۋشىلەرگە ءتۇرلى قۇقىقتىق قىزمەت كورسەتەدى. وبلىس پروكۋرورىنىڭ ءبىرىنشى ورىنباسارى مارات ابىشەۆتىڭ ايتۋىنشا, تاياۋ ارادا مۇندا ەلىمىزدەگى وسىنداي ورتالىقتار اراسىندا ءبىرىنشى رەت ونلاين-رەجىم ىسكە قوسىلاتىن بولادى.
ءنازيرا جارىمبەت,
«ەگەمەن قازاقستان»
قوستاناي
سۋرەتتى تۇسىرگەن
باعدات احمەتبەكوۆ
