اقتاۋ قالاسىنداعى دوستىق ۇيىندە ماڭعىستاۋ وبلىسى قازاقستان حالقى اسسامبلەياسىنىڭ XحI سەسسياسى ءوتتى. «رۋحاني جاڭعىرۋ – ۇلت جاڭعىرۋى» دەپ اتالاتىن القالى جيىنعا اسسامبلەياعا مۇشە وڭىردەگى 20-دان استام ەتنومادەني بىرلەستىكتىڭ وكىلدەرى تۇگەل قاتىستى. كۇن تارتىبىندە ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا ايتىلعان مىندەتتەردىڭ ماڭعىستاۋ وبلىسىندا جۇزەگە اسىرىلۋى جانە قازاقستان حالقى اسسامبلەياسىنىڭ XXV سەسسياسىندا ايتىلعان تاپسىرمالاردىڭ ورىندالۋ بارىسى تالقىلاندى.
مەملەكەت باسشىسى «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا جاڭا تاريحي كەزەڭگە ءتان قاتەرلەر مەن تاۋەكەلدەرگە جان-جاقتى باعا بەرە وتىرىپ, رۋحاني جاڭعىرۋ ارقىلى بولاشاققا دەگەن ءوزىنىڭ تەرەڭ كوزقاراسىن ءبىلدىرىپ, سول ارقىلى تۋىنداعان مىندەتتەردى حالىق نازارىنا ۇسىنىپ, ماڭىزدى ماسەلەلەردى ورىنداۋدى تاپسىردى. ەلدىڭ تاعدىرى مەن ەرتەڭى – مەملەكەت قۇراۋشى ۇلت رەتىندە قازاقتىڭ قولىندا بولسا, جارقىن بولاشاقتىڭ كەپىلى بولىپ تابىلاتىن تۇراقتىلىق پەن تاتۋلىق, ءوزارا تۇسىنىستىك, قۇرمەت پەن سىيلاستىق قازاقستاندى مەكەن ەتەتىن بارلىق ۇلت وكىلدەرىنە قاتىستى. سوندىقتان مەملەكەت باسشىسى نۇرسۇلتان نازارباەۆ وسىدان 22 جىل بۇرىن قازاقستاندىقتاردى بىرىكتىرۋدىڭ بىرەگەي مۇمكىندىگى رەتىندە قازاقستان حالقى اسسامبلەياسىن قۇرعان بولاتىن.
– بۇگىندە ۇيىم حالىقتىق وكىلدىكتىڭ ەرەكشە تەتىگى رەتىندە مەملەكەتتىڭ قوعامدىق باقىلاۋ جۇيەسىندە ەرەكشە رولگە يە. ءدال وسى مىندەتتى اتقارىپ جۇرگەن قازاقستان حالقى اسسامبلەياسىنىڭ ءرولى جاڭعىرۋ جولىندا ايرىقشا. اسسامبلەيا ەلىمىزدە تۇراتىن بارلىق ەتنوستاردىڭ بىرەگەي دە ءتول مادەنيەتىن ساقتاپ, قوعامدىق كەلىسىمدى نىعايتۋ مەن حالىق بىرلىگىن جەتىلدىرۋ جولىندا كوپتەگەن جۇمىس اتقارۋدا, دەدى جيىندا ماڭعىستاۋ وبلىسىنىڭ اكىمى ەرالى توعجانوۆ. ايماق باسشىسى وبلىستىڭ الەۋمەتتىك-ەكونوميكالىق دامۋىن ساراپتاي كەلە اسسامبلەيا تاراپىنان اتقارىلعان شارالارعا توقتالدى. كورەيلەردىڭ قازاقستاندا قونىستانعانىنا 80 جىل تولۋىنا وراي مەرەيتوي, تۇپقاراعان اۋدانىندا تاراس شەۆچەنكو مۇراجايىنىڭ 85 جىلدىعى, كورەي ەتنومادەني بىرلەستىگىنىڭ 25 جىلدىعى كەڭ كولەمدە اتاپ وتىلگەن. «رۋحاني جاڭعىرۋ» باعدارلاماسى اياسىندا وتپان تاۋعا ءۇش ءبيدىڭ ەسكەرتكىشى قويىلدى.
ءوڭىر باسشىسى اسسامبلەيانىڭ عىلىمي-ساراپشى توبىنا ماڭعىستاۋدىڭ ءالى دە بەيمالىم جەرلەرىن زەرتتەپ, تاريحي-مادەني قۇندىلىقتارىن جاڭعىرتۋعا تاپسىرمالار بەردى. ول ءۇشىن الەۋمەتتىك زەرتتەۋلەر, الەۋمەتتىك ساۋالنامالار جانە عىلىمي-مەتوديكالىق شارالار جۇرگىزۋ كەرەكتىگىن ايتتى. بىرقاتار باسقارما باسشىلارىنا مەملەكەتتىك ەتنوساياساتتى ءتيىمدى جۇزەگە اسىرۋدى تاپسىردى. اسىرەسە باق وكىلدەرى ارقىلى كوپۇلتتى, تابىستى وتباسىلاردى كورسەتىپ, وتباسى قۇندىلىعىن ناسيحاتتاۋ ءۇشىن كەشەندى جوسپار دايىنداۋ قاجەتتىگىن اتاپ ءوتتى.
سەسسيا سوڭىندا ۇلتتىق مادەني ورتالىقتاردىڭ جەتەكشىلەرى مەن وبلىستىق اسسامبلەيانىڭ بەلسەندى مۇشەلەرىن ماراپاتتالدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
