اڭگىمە بارىسىندا ەكىجاقتى قاتىناستار جانە ونى كەلەشەكتە ودان ءارى دامىتۋ ماسەلەلەرى تالقىلاندى. يسپان سەناتورى ءبىزدىڭ ەلىمىزدەگى دەموكراتيالىق رەفورمالار مەن ەكونوميكالىق جاڭعىرۋدىڭ بارىسىمەن تانىستىرىلدى جانە ونى جوعارى باعالادى.
جۇزدەسۋشىلەر ەكىجاقتى جانە كوپتاراپتى سيپاتتاعى پارلامەنتارالىق ۇنقاتىسۋدى نىعايتۋ جايىندا ايتتى. ح.لۋكاس حيمەنەس قازاقستاندىق سەناتورلاردى ءوزارا ءىس-قيمىلدى ۇدەتۋ ءۇشىن يسپانياعا ساپارلاپ كەلۋگە شاقىردى.
د.نازارباەۆا قازاقستان مەن يسپانيا اراسىنداعى ساۋدا اينالىمىن ورىستەتۋ قاجەتتىگىن اتاپ ءوتتى جانە «ەكسپو-2017» حالىقارالىق كورمەسىنە قاتىسقانى ءۇشىن يسپان تاراپىنا العىس ايتتى. «جوعارى مارتەبەلى كورول فەليپە VI-ءنى كورمەنىڭ قۇرمەتتى قوناعى رەتىندە قابىلداۋ بىزگە زور مارتەبە بولدى. يسپانيا ۇلتتىق كۇنىنىڭ سالتاناتتى اشىلۋىنا دەپۋتاتتار كونگرەسىنىڭ توراعاسى ا. پاستور قاتىستى. بۇل ءبىزدىڭ قاتىناستارىمىزدىڭ كەزەكتى دامۋ قادامى بولىپ ەسەپتەلەدى», - دەپ اتاپ ءوتتى سەناتور. ەكسپو اياسىندا «استانا» حالىقارالىق قارجى ورتالىعى, حالىقارالىق IT-ستارتاپتار تەحنوپاركى جانە بۇۇ اياسىنداعى «جاسىل» تەحنولوگيالاردى دامىتۋ جانە ينۆەستيتسيالىق جوبالار ورتالىعىنىڭ جۇمىس ىستەيتىنى تۋرالى يسپان پارلامەنتشىسى حاباردار ەتىلدى.
يسپانيا سەناتى كونستيتۋتسيالىق ماسەلەلەر جونىندەگى كوميتەت توراعاسى مەملەكەت باسشىسى ن.نازارباەۆتىڭ جاسىل تەحنولوگيالاردى دامىتۋعا ەرەكشە نازار اۋداراتىنىن اتاپ ءوتتى.
